2 Sur lädupi culindanmi allaycula Puchucü Lamarpa ulapay lädu ćhawpinpïta.

3 Chaypi sur lädu Acrabimpam wichayta pasala Zin chunyänincama.

Chaypïta Cades-barnea malcap sur lädunpa pasalmi Hezron malcäcama ćhäla.

Chaypïtam Adarpïta pasal Carca malcaman muyumula.

4 Chaypïta pasala Asmonpa,

jinal Egipto lädu mayumanmi yalula.

Chaypi pasalñatacmi Mediterraneo lamarćhu camacäla.

Chaycamamari Sur läduman Juda ayllup allpan ćhäla.

5 Ñatac inti ishpimunan lädupi culindacunañatacmi Puchucü Lamarpi aśhta Jordan mayuman yaycunancama cala.

Nurti läduman culindanñatacmi Jordan mayup yaycuycunancäpïta allaycula.

6 Chaypi ishpila Bet-hoglapa,

jinaman Bet-arabap nurti lädunpam lila aśhta Rubenpa chulin Bohan wancacta ćhulaśhancama.

7 Chaypïta Acor pampampa Debir lädumanmi ishpila.

Chaypi muyumula Adumin wichaypa ñawpäninćhu cä Gilgal lädupmi.

Cay Gilgal cayäla Aduminpa chimpan yacu wayu sur lädućhümi.

Chaypïta En-semesćhu yacup pasal Rogel pucyumanmi yalula.

8 Chaypïta Jebus läducunäpa malcan Jerusalenpa sur lädun Hinom wayuntam pasala;

jinaman Hinom pampap inti jiꞌalpunan lädun ulꞌunta pasalmi Refaim wayup nurti lädunman ćhäla.

9 Chaypïta culindan pasala Neftoa nishan pucyunpam,

jinaman Efron ulꞌućhu cä malcacunäpa pasal Baalaman jiꞌalpamula.

Baala malcap jucnin śhutinmi Quiriat-jearim cala.

10 Chay Baala malcapïta muyumula inti jiꞌalpunan lädu Seir ulꞌunpam,

jinaman Jearim ulꞌup wätanpa pasal nurti lädupi Quesalon malcap pasala,

chaynütac Bet-semes malcaman pasal Timna malcäcama ćhäla.

11 Chaypïtam Ecron malcap nurti lädunta pasal Sicron läduman muyumula.

Chaypïta Baala ulꞌunta pasal Jabneel läduman yalamulmi Mediterraneo lamarćhu camacäla.

12 Inti jiꞌalpunan lädu culindanñatacmi Mediterraneo lamarca cala.

Lluy caycunam Juda ayllucunap aycam capäcuśhanmannu tücachishanpa culindancuna cala.

13 Chayurá Jefonep chulin Calebmanpis allpacta Josue tücachila Juda ayllup tücänin caśhancäćhümi.

Tayta Dios camachishanmannümari tücachila Anacpa taytan śhalcachishan Quiriat-arba malcactapis.

Quiriat-arbap jucnin śhutinmi Hebron cala.

14 Chay Hebron malcapïtam Caleb alapacüla Anacpa quimsa chulincunacta:

Sesai,

Ahiman,

Talmai nishancunacta.^a

15 Chaypïtam Debir malcaćhu nunacunäta camacänanpä Caleb lila.

Chay malcap punta śhutin Quiriat-sefermi cala.

16 Chayćhümi Caleb limalicula:

“Cay Quiriat-sefer malcaman mayanpis yaycuycul llallïcätá wamla chulí Acsactam walminpä uycuśhä” nil.

17 Niptinmi wawꞌi-caśhan Cenazpa chulin Otoniel malcacta llallïla.

Chaymi Caleb,

wamla chulin Acsacta Otonielwan casarächila.

18 Chay puśhaśhan muyuncäćhümi Acsacta wayapan Otoniel umachäla^b papänin Calebta juc ćhaclacunacta mañacunanpä.

Chaymi sillacuśhan aśhnunpïta Acsa jiꞌalpucuyaptin papänin Caleb nin:

“¿Imactam munayanqui?”

nil.

19 Niptinmi Acsa:

“Allinpä licaycul Neguev allpacta uycayämalꞌa,

ama chaynu caychu,

michcacunactapis^c uycallämayꞌari” nin.

Chaymi Caleb janay lädu ulay lädu pucyuyücunätapis chulin Acsaman uycula.

20 Juda ayllucunaca aycam capäcuśhanmannu malca ćhasquipäcuśhancuna caycunamari.

21 Paycunap malcancuna sur lädućhu Edom malcawan matäninman caycunam cala:

Cabseel,

Edar,

Jagur,

22 Cina,

Dimona,

Adada,

23 Cedes,

Hazor,

Itnan,

24 Zif,

Telem,

Bealot,

25 Hazor-hadata,

Queriot,

Hezron (Hezronpa jucnin śhutin Hazormi cala),

26 Amam,

Sema,

Molada,

27 Hazar-gada,

Hesmon,

Bet-pelet,

28 Hazar-sual,

Beerseba,

Bizotia,

29 Baala,

Iim,

Ezem,

30 Eltolad,

Quesil,

Horma,

31 Siclag,

Madmana,

Sansana,

32 Lebaot,

Silhim,

Ain,

Rimonpis.

Lluy cala ishcay ćhunca isunniyu (29) jatućhä-cama malcacunamari malcantin-cama.

33 Pampacunaćhu malcacunäñatacmi caycuna:

Estaol,

Zora,

Asena,

34 Zanoa,

En-ganim,

Tapua,

Enam,

35 Jarmut,

Adulam,

Soco,

Azeca,

36 Saaraim,

Aditaim,

Gedera,

Gederotaimpis.

Lluy cala ćhunca tawayu (14) jatućhä-cama malcamari malcantin-cama.

37 Chaypïta cala:

Zenan,

Hadasa,

Midgal-gad,

38 Dilean,

Mizpa,

Jocteel,

39 Laquis,

Boscat,

Eglon,

40 Cabon,

Lahmam,

Quitlis,

41 Gederot,

Bet-dagon,

Naama,

Macedapis.

Lluy cala ćhunca sütayu (16) jatućhä-cama malcacunamari malcantin-cama.

42 Chaypïta cala:

Libna,

Eter,

Asan,

43 Jifta,

Asena,

Nezib,

44 Keila,

Aczib,

Maresapis.

Lluy cala isun jatućhä-cama malcacunamari malcantin-cama.

45 Chaypïta Ecron malcapis lluy malcantincunawan cala.

46 Chaynütac Asdodpa sircanćhu cä malcancunapis,

Ecron malcapïta aśhta Mediterraneo lamarcäcamam cala.

47 Paycunapämi cala Asdod,

Gaza malcapis lluy malcantin-cama,

aśhta Egiptop wayuncama,

chaynütac Mediterraneo lamarcäcama.

48 Ulꞌucunäćhüñatacmi caycuna cala:

Samir,

Jatir,

Soco,

49 Dana,

Quiriat-sana (Debir nishatacmi cala),

50 Anab,

Estemoa,

Anim,

51 Gosen,

Holon,

Gilopis.

Lluy ćhunca jucniyümi (11) cala malcantin-cama.

52 Jinaman cala:

Arab,

Duma,

Esan,

53 Janum,

Bet-tapua,

Afeca,

54 Humta,

Quiriat-arba (Hebron nipäculatacmi),

Siorpis.

Lluy isunmi cala malcantin-cama.

55 Chaypïta cala:

Maon,

Carmel,

Zif,

Juta,

56 Jezreel,

Jocdeam,

Zanoa,

57 Cain,

Gabaa,

Timnapis.

Ćhuncamari (10) malcantin-cama cala.

58 Chaypïta cala:

Halhul,

Bet-sur,

Gedor,

59 Maarat,

Bet-anot,

Elteconpis.

Sütamari malcantin-cama cala.

60 Chaypïta:

Quiriat-baal (Quiriat-jearim nishatacmi cala),

jinaman Rabapis.

Ishcaymi cala malcantin-cama.

61 Chunyä ulꞌucunäćhüñatacmi cala:

Bet-araba,

Midin,

Secaca,

62 Nibsan,

Caćhi Malca,

jinaman En-gadipis.

Süta jatućhä-cama malcamari malcantin-cama cala.

63 Ñatac Jerusalenćhu yaćhä Jebus läducunätam ichá alapacuyta Juda ayllucunaca mana atipapäculachu.

Chaymi canancama Jebus läducunaca quïdälälila Jerusalenćhu Juda ayllucunäwan cusca yaćhaśhtin.^d