Efrain, Manases ayllucunäman tücachishan allpacuna
16
Josepa milayninpa tücachishan allpacunañatacmi cala:
inti ishpimunan lädu Jordan mayupi allayculmi Jerico pucyunpa pasala.
Chaypïta chunyäninpam Bet-el lädu ulꞌunnincunaman lila.
2 Chay Bet-elpïñatacmi ütac Acchi nipäcuśhanpïtam pasala Arqui läducunäpa allpancunap Atarotcama.
3 Chaypïta inti jiꞌalpunan lädumanñatacmi pasala Jafle läducunäpa allpanpa aśhta ulay lädu Bet-horonpa culindancama,
jinaman Gezercama;
chaypïta lamarcämanñam yalamula.
4 Cay allpacunactamari Josepa chulin Manaseswan Efrain ćhasquipäcula.
Efrainman tücaśhanpa culindancuna
5 Efrain ayllucunap aycam capäcuśhanmannu allpancuna caycunam:
inti ishpimunan lädupi cala Atarot-adar malcapïta aśhta janayćhu cä Bet-horon malcäcamam.
6 Chaypïta Mediterraneo lamarcäcamam cala.
Nurti lädu manyan Micmetatpïtam filtamula inti ishpimunan lädu Taanat-siloman;
chaypïta Janoamanmi ćhäla.
7 Chay Janoapïtam jiꞌalpamula Atarotman,
Naaratman Jericopa pasaśhtin Jordan mayuman ćhänancama.
8 Chay Tapuapïtam inti jiꞌalpunan läduman culindan pasala,
Caná nishan wayunpa pasal Mediterraneo lamarcäman ćhäla.
Cay allpacunactamari Efrain ayllucunaca aycam capäcuśhanmannu tücäninpä ćhasquipäcula.
9 Manases ayllup allpan tücaśhancäćhu Efrain ayllucuna malcacunacta malcantin-camactam ćhasquipäcula.
10 Ñatac cay Efrain ayllucunaca manam alapaculachu Gezerćhu yaćhä Canaan nunacunäta.a
Aśhwanpa paycunaćhu yaćhapäcunanpä caćhaycapäcuptinmi canancamapis chaynülla cayalcan.
Ñatac sumä ñacay lulaycunactam paycunacta lulachipäcula.