3 Ñatac Zelofehadpa manam walaśh chulin calachu;

aśhwanpa wamla chulillancunam cala:

Maala,

Noa,

Hogla,

Milca,

Tirsapis.

Cay Zelofehadpa taytanmi Hefer,

Heferpa taytanñatac Galaad,

Galaadpa taytanñatac Maquir,

Maquirpa taytanñatac Manases cala.

4 Paycunam sasirdüti Eleazarman,

Nunpa chulin Josueman,

israelcunap puydïnincunaman lilcul nipäcula:

“Tayta Dios Moisesta nishanmannu yaꞌacunamanpis ayllücunamannu allpacta tücachipämay” nil.^a

Chaymi aylluncunap allpanćhu Tayta Dios nishanmannülla Josue tücaycachila.

5 Ñatac Manases ayllucunaca Jordan mayup chimpan cä Basanćhu,

Galaadćhu allpacta ćhasquipäculañam.

Chaypïta ćhunca partićhu mastalämi ćhasquipäcula Jordan mayup cay-lädu inti jiꞌalpunanćhüpis.

6 Manasespa wamla chulincunamanpis walaśh chulincunamannümi allpacta tücachila.

Galaad lädućhu cä allpañatacmi waquin chulincunaman tücachisha cala.

7 Cay Manasespa allpancunam cala:

Aserpïta aśhta Shiquempa chimpaćhu cä Micmetatcamam.

Chaypïta sur läduman pasala Tapuaćhu yaćhäcunäpä caśhancamam.

8 Chay Tapua allpamari Manases ayllupä cala.

Ñatac Manasespa culindanćhu cä quiquin Tapua malcacá Efrain ayllupämi cala.

9 Chaypïta culindancuna sur läduman lilmi Caná nishan wayup pasala.

Chaynüpam Efrain ayllup malcancuna Manases ayllup malcancunap ćhawpinćhu quïdäla.

Manasespa allpanmi cala wayup nurti lädunpïta Mediterraneo lamarcäcama.

10 Sur läduman cä malcacunäñatacmi Efrainpa cala;

nurti lädumanñatacmi Manases ayllucunäpä cala.

Chay Manasespa allpanmi Mediterraneo lamarcäcama ćhäla.

Nurti lädunpañatacmi Aser ayllucunap allpanwan culindan cala;

inti yalamunan lädupañatacmi Isacar caśhtacunap allpanwan culindan cala.

11 Chayurá Manases aylluca Isacar,

Aser ayllucunap tücächishanćhüpis ćhasquilam quimsan lädućhu malcantin-camacta:

Bet-seanta,

Ibleamta,

Dorta,

Endorta,

Taanacta,

Meguidoctapis.

12 Masqui Manases aylluca chay malcacunacta ćhasquiyalcalpis manam alapacuyta atipapäculachu.

Chayćhümari Canaan läducunaca sumä tacyacaycälila.

13 Ñatac israelcunaca sumä callpanchacälälilñam sumä ñacay lulaycunacta Canaan läducunäta lulachipäcula.

Manatacmari alapacülälilachu.^b

14 Chaypïtam Josepa chulincuna Josueta nin:

“Tayta Dios allinpä licaycälimaptinmi yaꞌacuna achca-achca cayalcá.

Chayurá ¿imapïmi juc partillaćhu tücayalcächimanqui?”

nil.

15 Niptinmi Josue:

“Achca capäculꞌa,

jinaman Efrain ulꞌucuna mana camapäcuśhuptiquiꞌa Ferez,

Refai caśhtacunäpa allpanman lipäculꞌari muntincunacta cuchupäcuy,

chayćhu yaćhapäcunayquipä” nin.

16 Niptinmi Josepa chulincuna:

“Chay ulꞌucunaca manam camapämanchu.

Ñatac chayćhu yaćhä Canaan läducunaca,

Bet-sanćhu,

Jezreel pampaćhu yaćhäcunäpis sumä jïrrupi carritayü-camam cayalcan” nin.

17 Chaymi Josepa milaynin Efraintawan Manasesta Josue nin:

“Amcuna achca-achcam cayalcanqui;

jinaman sumä munayniyümi cayalcanquipis.

Chayurá manam chay allpayülla capäcunquimanchu.

18 Sinuꞌa cay munticunam amcunapä canꞌa.

Chaymi manyancama cućhpalcachil duyñuchacaycälinqui.

Masqui Canaan läducunaca sumä-cama cayalcaptinpis,

jinaman jïrrupi carritancuna cayaptinpis amcunamari alapacülälinqui” nil.