Canaan lädućhümi Josue tücachin
14
Chayurá caycunamari Israel caśhtacunäpi waquin ayllucunäman Canaan malcaćhu tücala.
Chayćhümi sasirdüti Eleazarwan,
Nunpa chulin Josue,
Israel ayllupi-cama puydïnincuna tücachipäcula.
2 Tayta Dios Moisesta nishanmannümi chay allpacunäta isun ayllu ćhawpiman chüsaypa tücachila.a
3 Ñatac ishcay ayllu ćhawpin ayllucunätá Jordan mayucta manalä chimpalmib Moises chayćhu tücachilaña.
Levi ayllucunätañatacmi ichá allpacunacta mana tücachilachu.
4 Mana tücayächilpis aśhwanpam malcacunacta yaćhapäcunanpä uycula,
uywancunapäpis ichadïructa.
Josepa milaynincunañatacmi ishcay ayllucuna capäcula:
Manaseswan Efrain.
5 Tayta Dios Moisesta nishanmannüllamari israelcunaca allpacunäta aypunacälälila.
Hebron allpactam Calebman tücachin
6 Ñatac Gilgalćhu Josue cayaptinmi Judapa milaynincuna lipäcula.
Chayman Cenez ayllu Jefonepa chulin Caleb lilculmi Josueta nin:
“Am yalpayanquimari Cades-barnea lädućhu cayaptinchic uywaynin Moisesta Tayta Dios ampïwan yaꞌapïta ima nishantapis.c
7 ¿Manachun Cades-barneapi Tayta Diospa uywaynin Moises Canaan malcacta licamü caćhamaptinchic tawa ćhunca (40) watäta liyälá imatá?
Chaypïta cutiycul imam cäcällactamari willayculá.d
8 Chay liwshimänïcunañatacmi lluy nunacunäta jucmanyayman,
manchacuyman ćhulälälila.
Yaꞌañatacmi ichá Tayta Diosnïman masïsu chalapaculá.
9 Chaymari Moises limalicamäla:
‘Tayta Diosnïman masïsu chalapacuśhayquipam ćhaquiqui jaluycuśhan allpaca ampäwan lluy milayniquipä imaycamapis canꞌa’ nil.e
10 Chayurá chay cala chunyä ulꞌu pulishanchiccäćhu Tayta Dios Moisesman limalicuśhanca tawa ćhunca picha (45) watañamari pasälun.
Ñatac Tayta Dios cawsayta uycamaptinmi canan pusä ćhunca picha (85) watätaña liyá.
11 Jinaptinpis Moises licä caćhamäśhanćhu callpá caśhannüllalämari imapäpis canancama callpá cayan.
Jinaman chayćhu pilyanäpä balurní caśhannüllalämari cananpis balurní cayan.
12 Chayurá Tayta Dios limalicamäśhan ulꞌucunäta uycamayñari.
Am,
tuquictamari yaćhayanqui chayćhu Anac caśhtacuna yaćhapäcuśhanta,
malcancuna sumä-cama murällayu caśhantapis.
Chaynu captinpis Tayta Dios limalicuśhanmannümi paypa yanapayninwan allpanpïta alapacüśhä” nil.
13 Niptinmi Jefonep chulin Caleb allin cananpä Josue niycul Hebron allpacta tücäninpä uycula.
14 Chaynu Israelpa Tayta Diosninman masïsu chalapacuśhanpamari Hebron allpaca Ceneo caśhta Jefonep chulin Calebpa tücäninña canancamapis cayan.
15 Chay Hebronpa unay śhutin cala Quiriat-arba nisham;
Anac caśhtacunäpa jatućha callwanf puydï awquillunmari Arba cacula.
Chaypïta chay allpacunaca pilyaypïmi jamaycapäcula.