Manalä duyñuchaculcäśhan allpacuna
13
Josue yaśhaña cayaptinmi Tayta Dios nin:
“Anchap yaśhañam cayanqui.
Ñatac achcalämi duyñuchacunayquipä allpacuna cayan.
2 Chaycunamá jinantin Filisteo läducunäpa,
Gesur läducunäpa allpancunalä cayan.
3 Chaycunam Egiptopi inti ishpimunan lädupi Sihor wayupïta aśhta nurti lädućhu cä Ecron malcap culindancama cayalcan.
Caycunactamari Canaan lädu allpa nipäcula;
chay lädu malcacunäćhümá Filisteo nunacunäpa picha mandänin cayalcan:
Gaza,
Asdod,
Ascalon,
Gat,
Ecron malcacunäćhu.
Chay lädućhütacmi cayan Aveo läducunäpa allpacunapis.
4 Aveo läducunäpa cayan sur lädućhümari.
Chayurá Canaan lädu allpacuna cayanlämi duyñuchaculcänayquipä Sidon läducunäpa Mehara malcanpïta aśhta Amhor läducunäpa culindanćhu Afeccama.
5 Chaynütacmi cayanlä Gibli läducunäpa allpancunapis,
inti ishpimunan lädu Libano allpacunäpis,
Hermon ulꞌup saytan Baal-gaad malcapïta aśhta Hamatman yaycunancama.
6 Yaꞌami Israel caśhtacunäpa puntanpïta alupacüśha Libano lädućhu lluy yaćhäcunäta aśhta Misrefot-maimcama,a
jinaman llapan Sidon läducunätapis.
Amñatacmi ichá nishämannülla Israel caśhtacunäman allpacunäta tücachinqui.b
7 Chayurá cay allpacunäta isun ayllucunäman,
jinaman Manases ćhawpi ayllumanpis tücaycachiy” nil.
Manases, Ruben, Gad ayllumanmi allpacta tücachin
8 Ñatac Jordan mayup inti ishpimunan lädućhu cä ćhaclacunätam Tayta Diospa uywaynin Moises tücachilaña Ruben,
Gad ayllucunäman,
jinaman Manases ćhawpi ayllumanpis.c
9 Paycunamanmi tücachila:
Arnon mayup patan Aroerpïta lluy malcantinta,
wayup ćhawpinćhu cä malcacta;
jinaman Medeba pampancunactapis Dibon malcäcama.
10 Chaynütacmi tücachila Hesbonpa mandacünin Sehon mandaśhan lluy malcancunactapis aśhta Amhor läducunäpa culindancama.
11 Chaynütacmi tücachila Galaadpa allpancunactapis,
Gesur läducunap,
Maaca läducunap allpantapis,
jinaman Hermon ulꞌucunätapis,
Basanpa allpancunactapis aśhta Salca malcäcama.
12 Chaynütacmi tücachila Basanpa mandacünin Og mandaśhan Astarot,
Edrei malcacunactapis.
Og mandacücällañamari quïdala Moises llallilcul camacäśhan Refai ayllucunapïta.
13 Ñatac israelcunaca manamá Gesur läducunätawan Maaca läducunäta allpanpïta alapaculcälachu.
Chaymi paycuna canancamapis Israelpa allpanćhu yaćhapäcun.
14 Levi ayllucunämanñatacmi allpacta Moises mana tücachilachu.
Tayta Dios limalicuśhanmannümari paycunap tücänin cala Israel caśhtacuna Tayta Diosman cañaywan uycapäcuśhancunaca.d
15 Ruben ayllumanñatacmi aycam capäcuśhanmannu allpacta Moises tücachila.
16 Chaynu tücala Arnon mayup patan Aroerpi,
pampap ćhawpinćhu cä malcapis,
chaynütac Medebap lluy pampancunapis,
17 aśhta Hesboncama,
jinaman pampäćhu lluy malcacunäpis:
Dibon,
Bamot-baal,
Bet-baal-meon,
18 Jahaza,
Cademot,
Mefaat,
19 Quiriataim,
Sibma,
jinaman pampap ulꞌunninćhu cä Zaret-sahar,
20 Bet-peor,
Bet-jesimot,
chaynütac Pisga ulꞌup wätancunapis tücala.
21 Chayurá Ruben ayllupämi cala pampaćhu malcacunäpis,
Hesbonćhu mandä Amhor läducunäpa mandacünin Sehonpa allpancunapis.
Mandacü Sehonta paypa munayninćhu cä Madian läducunäpa puydïnincunactawanmi Moises wañüchila.
Chay puydïcunaca cala:
Evi,
Requem,
Zur,
Hur,
Rebapis.
22 Chaynütacmi israelcunaca pilyapäcul wañuchipäcuśhanćhu Beorpa licacü chulin Balaamtapis wañülächila.
23 Cay malcacunämari allpantin-cama Ruben aylluman aycam capäcuśhanmannu tücachisha cala.
Paycunap tücänincunam ćhäla Jordan mayup patancama.
24 Chaynütacmi Gad ayllucunämanpis aycam capäcuśhanmannu allpacta Moises tücachila.
25 Paycunaman tücala:
Jazer malca,
Galaad lädu lluy malcacuna,
Amon läducunäpa ćhawpipi malcanpis,
aśhta Rabap chimpanćhu cä Aroer malcäcama.
26 Chaynütacmi tücala Hesbon malcapïta aśhta Ramat-mizpa,
Betonim malcäcama,
jinaman Mahanaim malcapïta Debir malcap culindancama.
27 Chaynütacmi pampannincunaćhüpis tücala Bet-aram,
Bet-nimran,
Sucot,
Zafon,
jinaman Hesbon malcaćhu mandä Sehonpa parti allpancunapis.
Chayurá allpancuna cala Jordan mayup inti yalamunan lädupïta aśhta Cineret ućhap manyancamam.
28 Cay malcacunämari allpantin-cama Gad aylluman aycam capäcuśhanmannu tücachisha cala.
29 Chaynütacmi ćhawpi ayllu Manasescunätapis aycam capäcuśhanmannu Moises tücachila.
30 Paycunaman tücala:
Mahanaim malcapïta nurti lädumanmi.
Chaymi Basan lädućhu Og mandaśhan lluy allpacunaca paycunapä cala,
jinaman Jair caśhtacuna yaćhaśhan süta ćhunca (60) malcacunäpis.
31 Paycunapätacmi ćhawpipïta cala:
Galaad,
Astarot,
Edrei allpacunäpis.
Caycuna Basan lädućhu Og mandacuśhan malcacunamari cala.
Chay allpacunam Manasespa chulin Maquirpa ćhawpi aylluncunapä aycam capäcuśhanmannu cala.