Jinantin Israel malcactam Josue caśhan limalicachin
24
Chaypïtam Josue jinantin Israel läducunäta Shiquem malcaman ayachil lluy puydïnincunäta,
yaśhacunäta,
fiscunäta,
cachacup puydïnincunactapis Tayta Diospa ñawpäninman juntuycula.
2 Jinalculmi Josue lluyta nin:
“Israelpa Tayta Diosninchicmi caynu nil yalpachishunqui:
‘Má,
unay timpu awquilluyqui Taremia chulin Abrahamwan,
Nacorwan Eufrates mayup chimpan lädućhu yaćhapäcula.
Juc taytachacunactatacmi sirbipäculapis.
3 Chay mayup chimpanpïtamari awquilluyqui Abrahamta julalcamul Canaan lädu allpacunäćhu pulichilá.b
Jinaman achca-achcamanmi milaycachilá chulin Isaacta uycuśhäwan.c
4 Chayćhümi Isaacta ishcay chulicta uyculá:
Jacobtawan Esauta.d
Chaypïtam Esautañatac uyculá Seire lädu ulꞌucunäta.
Jacobtañatacmi lluy milaynintinta Egiptoman ćhächilá.f
5 Chaypi julaycamunäpämi Moisestawan Aaronta caćhalá;
jinalmi Egipto nunacunäta imaymana mućhuchicuywan mućhuycachil amcunacta julaycamulá.g
6 Chaypïta awquilluyquicunacta julamuptïmi Egiptocunaca carritancunawan,
sillädancunawan Puca Lamarcäcama atipämula.
7 Chayćhu awquilluyquicuna Tayta Diosta mañaculcaptinmi sumä tutapaywan Egipto nunacunäpïta amcunacta laquipäculac.
Jinaman lamarcätapis Egiptocunäpa janäninman cutiycachilmi anuächilá.
Chaynu Egipto nunacunäwan ima lulaśhätapis amcuna licapäculanquimari.
“ ‘Chaypïta achca watam chunyäcäćhu capäculanqui.
8 Chaypïtam Jordan mayup chimpanćhu yaćhä Amhor läducunäpa allpanman puśhapäculac.
Paycuna amcunawan pilyapäcuptinmi maquiquiman yaꞌa ćhulaycamulá.
Chaynu camacaycüluptïmari allpancunacta duyñuchacaycälilanqui.h
9 Chaypïta Ziporpa chulin Balac,
Moab caśhtacunap mandäninca Israel läducunäwan pilyananpämi śhalcüla.
Chaymi Beorpa chulin Balaamta caćhamula mana allin capäcunayquipä niycachï.
10 Ñatac Balaam mana allin capäcunayquipä nishunayquita yaꞌa mana munaptïmi pay cutipalcul-cutipalcul allin capäcunayquipä nila.i
Chaynüpamá puydï Balacpa maquinpi salbaycapäculac.
11 “ ‘Chaypïta Jordanj mayucta chimpälälil Jerico malcaman ćhäpäcuptiqui paycuna amcunawanmi pilyapäcula.
Chaypïta lluy Amhor,
Ferez,
Canaan,
Het,
Gerges,
Hev,
Jebus läducunäpis amcunawantacmi pilyapäcula.
Yaꞌañatacmi paycunacta maquiquiman ćhulaycamulá.k
12 Manamari amcunachu ispädayquicunawan nï flïchayquicunawan Amhor läducunäpa ishcay mandacüninta llallipäculanqui;
sinuꞌa yaꞌami puntayquita tanracunacta caćhalá allpanpïta alapacünäpä.l
13 “ ‘Jinalculmi amcunaman uycapäculac mana lulaculcäśhayqui ćhaclacunacta,
mana ishpichiculcäśhayqui malcacunacta.
Chayćhu yaćhapäculmi mana lantaculcäśhayqui ulïbuscunapi,
übacunapi micapäculanqui’ nil.m
14 “Chayurá Tayta Diosta manchacuywan sumäpa rispïtuwan sirbiycäliy.
Awquilluyquicuna Eufrates mayup chimpanćhu,
jinaman Egiptoćhu alawaśhan taytachacunacta amcunapïta wicapapäcul Tayta Diosllactari sirbipäcuy.
15 Sïchuśh Tayta Diosta sirbiyta mana munalꞌa cananꞌari aclapäcuy mayanta sirbipäcunayquipäpis.
¿Eufrates mayup chimpanćhu awquilluyquicuna sirbishan taytachacunactachun sirbipäcunqui icha cay allpa yaćhapäcuśhayqui Amhor läducunap taytachancunactachun sirbipäcunqui?
Yaꞌañatacmi ichá lluy ayllücunawan Tayta Diosllacta sirbicuśhä” nil.
16 Niptinmi jinantin malcaca nipäcun:
“Chaycuna imaypis manamá pasanmanchu.
Tayta Diosta unꞌaycul taytachacunactá manamá sirbipäcuśhächu.
17 Tayta Diosmari awquillunchiccunactapis,
yaꞌanchictapis uyway nuna caśhanchicpïta Egiptopi julamälanchic.
Äśhalayllaman camana milagrucunacta lulaśhanta licalanchicmá.
Śhamuśhanchic caminucunäćhu,
pasamuśhanchic malcacunäćhüpis ñawillanćhümari pay caycachimälanchic.
18 Paymá lluy malcacunätapis aśhta cayćhu cä Amhor läducunätapis ñawpäninchicpïta alapacüla.
Chaymari Tayta Diosllacta yaꞌacuna sirbipäcuśhä.
Payllamá Tayta Diosní” nil.
19 Nipäcuptinmi Josue nin:
“Amcuna manamá Tayta Diosta sirbiyta atipapäcunquimanchu.
Payꞌa chuyam,
silüsum.
Manamá ipanchaśhayquicunacta,
juchayquicunacta awantaycuśhunquimanchu.
20 Sïchuśh Tayta Diosta caćhaycul chay malcap taytachancunacta sirbiyalcaptiquiꞌa cuntrayqui muyuculculmi camacaycälälishunqui,
masqui maynu allinta amcunawan lulaycuyalpis” nil.
21 Niptinmi malcaca:
“Chaynuꞌa manamá imaypis pasanmanchu.
Yaꞌacuna Tayta Diosllactamari sirbipäcuśhä” nin.
22 Niptinmi Josue:
“Chayurá quiquiquicunamá limalicuyalcanqui Tayta Diosllacta sirbipäcunayquipä” nin.
Niptinmi malcaca:
“Awari,
chaynümi” nipäcun.
23 Niptinmi Josue:
“Chayurá amcunaćhülä caycü taytachacunactari śhunꞌuyquipi wicapapäcuy.
Israelcunap Tayta Diosninmanꞌari llapan śhunꞌuyquiwan cuticalcämuy” nin.
24 Niptinmi malcaca:
“Tayta Diosllanchictam sirbipäcuśhä;
payllactatacmi cäsuculcäśhäpis” nin.
25 Chay juntunaculcäśhan Shiquem malcaćhümi chay muyunlla israelcunäwan limalicuyta Josue ishpichipäcula.
Jinalculmi camachicuycunacta,
yaćhachicuycunacta niycula.
26 Chaycunactam Tayta Diospa camachicuyninman Josue isquirbiycula.
Chaynütacmi jatun lumicta chuya carpap sircanćhu cä encina lantap siquinman śhaycächila.
27 Jinalculmi jinantin malcäta Josue nin:
“Cay lumim licäninchic cayan.
Paymari uyaliyan Tayta Dios lluy nimäśhanchiccunäta.
Awniyalpis mana lulaycuptiquiꞌa cay lumim cäraycuśhunqui” nil.
28 Chaypïtam lluy nunacunaca malcanta-cama cuticulcänanpä Josue niycula.
Limalicuśhan allpaćhümi Josue, Jose, Eleazar pampaśha cayalcan
29 Chaypi manaläpis unaytam Tayta Diospa uywaynin Nunpa chulin Josue wañucula;
paćhac ćhunca (110) watayümi licula.
30 Chaymi Timnat-seran tücänin allpanćhu pampacula.
Chay cala Efrain ayllup ulꞌuncunaćhümi,
Gaas ulꞌunpa nurti lädunćhu.
31 Chayćhümi Josuepis wiñay-masincunapis Israel caśhtacunäpa allinninpä Tayta Dios lluy ima lulaśhancunactapis licapäcula.
Chaymi Josuewan wiñay-masincuna cawsaśhancama Israel caśhtacunaca Tayta Dios munaśhannu sirbipäcula.
32 Canan má,
Israel caśhtacunaca Egiptopïta apamuśhan Josepa tulluncunactam Shiquemo malcaćhu Joseman tücänin ćhaclanman pampapäcula.
Cay ćhaclactam Jacob lantila Hamorpap chulincunapïta paćhac (100) illaywan.
Hamor cala Shiquem śhutiyu nunap taytanmi.
Chay ćhaclam Josepa milaynincunapäña tücänin licalïla.
33 Chaypïtam Aaronpa chulin Eleazarpis wañucula.
Jinaptinmi chulin Fineespa tücänin Guibea ulꞌuman pampälälila;
chay cala Efrain ayllup ulꞌun lädućhümari.