Levitacunäta tücachinanpämi nin
35
Moab lädup ulꞌunćhu,
Jordan mayup patanćhu,
Jerico malcap chimpanćhu Moises cayaptinmi Tayta Dios nin:
2 “Israel caśhtacunäta nimuy:
‘Allpa tücaśhancunapïta levitacunäpa malcanpa,
jinaman ichadïruncunapäpis uycälichun.
3 Chayćha levitacunaca mayćhu yaćhapäcunanpäpis malcan caycunꞌa,
lluy uywancunapäpis ichadïruncunapis caycunꞌa.
4 Chay malcap muyülïninćhu upäcuśhayqui ichadïruca malcap murällanpa waśha lädućhümi picha paćhac (500) mitru canꞌa.
5 Chay murällap waśha lädupïtam walanga (1,000) mitru canꞌa inti ishpimunan läduman;
inti jiꞌalpunan lädumanpis walanga (1,000) mitru,
ichü lädumanpis walanga (1,000) mitru,
allï lädumanpis walanga (1,000) mitrumari canꞌa.
Malcanñatacmi ćhawpićhu quïdanꞌa,
ichadïruncuna intiru muyülïninćhu captin.
6 “ ‘Levitacunaca ćhasquipäcuśhan malcacunapïta süta malcam pacaculcänanpä canꞌa.
Chaymanmi mayanpis wañuchïca pacacü ayinꞌa.
Cay süta malcäpïpis tawa ćhunca ishcayniyu (42) malca mastalämi uycuśhä canꞌa.
7 Chayurá levitacunäta tawa ćhunca pusäniyu (48) malcactam ichadïruyü-camacta uycuśhä canꞌa.
8 Ćhasquipäcuśhan tücänin malcapïtamari Levi ayllucunäman upäcunꞌa:
achcacta ćhasquilꞌa achcactam uycälinꞌa,
ashllacta ćhasquilꞌa ashllactatacmi uycälinꞌa.
Ayllunpi-cama ayca ćhasquishanmannümari Levi ayllucunäman uycapäcunꞌa’ ”a nil.
Pacacunanpä mayannin malcacuna caśhantam nin
9 Chaypïtam Moisesta Tayta Dios nin:
10 “Israel caśhtacunäta nimuy:
‘Jordan mayupïta Canaan malcaman chimpälälil,
11 mayanpis mana munayal nuna-masinta wañuchïca pacacunanpä malcacta aclapäcuy.b
12 Chay pacacuna malcacunam canꞌa wañücäpa ayllun cutichicunanpïta salbacunanpä.
Chaynüpam chay wañuchïca mana wañunꞌachu,
malcaca manaläpis cäraycuyalcaptin.
13 Lluy malca uycuśhanpïta süta malcacunam pacaculcänanpä canꞌa.
14 Jordan mayup cay lädunćhümi quimsa malcacuna canꞌa;
juc quimsäñatacmi Canaan lädućhu canꞌa.
15 Chay süta malcacunäćhümi pacaculcanꞌa Israel caśhtacunäpis,
mana Israel caśhtacunäpis,
ütac jamapacü nunacunäpis.
Mayanpis mana munayal wañuchïca chayćhümari pacaculcanꞌa.
16 “ ‘Mayanpis nuna-masinta jïrruwan wipyälul wañuchïca nuna wañuchicüñam licalïlun;
chaymi paypis wañuchishatac canꞌa.
17 “ ‘Mayanpis nuna-masinta lumiwan chapïlul wañuchïca nuna wañuchicüñam licalïlun;
chaymi paypis wañuchishatac canꞌa.
18 “ ‘Mayanpis nuna-masinta caśhpiwan wipyälul wañuchïca nuna wañuchicüñam licalïlun;
chaymi paypis wañuchishatac canꞌa.
19 Wañucäpa sirca ayllunmi wañuchïcäta talïlul mayćhüpis wañüchinꞌa.
20 “ ‘Mayanpis nuna-masinta ćhïnipayninwan tanꞌaycüluptin ütac imactapis jananman pursïpa jitaycüluptin wañüluptinꞌa,
21 ütac maquinwan maꞌayal wañüluptinꞌa nuna wañuchicümanñam licalïlun;
chaymi wañücäpa sirca ayllun wañuchïcäta talïlul mayćhüpis wañüchinꞌa.
22-23 “ ‘Mayanpis mana munayal nï ćhïnicuyal nuna-masinta tanꞌaycüluptin ütac imactapis jananman jitaycüluptin,
ütac mana lical lumiwan ćhächiptin wañucuptinꞌa,
24 wañucuśhanpi malcämi camachishämannu licaycunꞌa.
Wañuchïcätawan wañücäpa ayllun cutichicuy munäcätamari camachicuymannu malcaca licaycunꞌa.
25 Malcaca chay cutichicuyta munäcäpïmi unꞌaypïta wañuchïcäta libraycälinan.
Chay pacacuśhan malcamanmi cutichipäcunan chayćhu yaćhananpä,
aśhta japächana asaytiwan llusiycuśha cä puydï sasirdütica wañucunancama.
26 “ ‘Ñatac wañuchïca chay pacacuna malcapi waśhaman yalüluptinꞌa,
27 wañucücäpa ayllun cutichicuyninwan wañüchiptin mana juchayüpäñam licaśha canꞌa.
28 Chaymi pacacuna malcallaćhu caycunan puydï sasirdütica wañucunancama.
Chaypïta wasinman cutinmanñamari.
29 “ ‘Cay camachicuycuna amcunapämi,
jinaman lluy milayniquicunapämi mayćhu yaćhaptinpis caycunꞌa.
30 “ ‘Mayanpis nuna-masinta wañuchïca licänincuna captinꞌa wañuchisham canꞌa.
Ñatac jucllay licänin captinꞌa manam wañuchishachu canman.c
31 “ ‘Nuna wañuchïca wañuchisha cananpäña cayaptinꞌa,
manam illaywan juluycuśha canmanchu;
chay nuna wañunanñamari.
32 “ ‘Chaynütac puydï sasirdütica manalä wañuyaptin nuna wañuchïca pacacunan malcaman cuticunanpäña illayta uycunanta amam awninquichu.
33 “ ‘Chay yaćhapäcunayqui allpacta nuna wañuchïwan ama anlaman muyuchipäcuychu.
Nuna wañuchïca allpactam anlaman muyuchin;
chay allpaca chuyanchaśha canman nuna wañuchïcäta wañüchillaptinmari.
34 “ ‘Yaćhapäcunayqui allpacta ama anlaman muyuchipäcuychu;
Israel caśhtacuna yaćhaśhan allpaćhümari yaꞌa Tayta Diospis yaćhaśhä’ ” nil.