Pacaculcänanpä cä malcacta japächananpämi nin
19
“Uycuśhuśhayqui malcacunäćhu cä nunacunäta Tayta Diosniquim lluy camacaycülunꞌa.
Jinaptinćha chay nunacunäpa malcancunacta wasincunacta duyñuchacaycälil yaćhapäcunqui.
2 Chay Tayta Diosniqui uycuśhuśhayqui allpaćhu quimsa malcactam japächapäcunqui.a
3 Jinalculmi chayman lï caminucunäta allichapäcunqui.
Chaypämi Tayta Diosniqui uycuśhuśhayqui allpäta quimsa partiman laquipäcunqui.
Chaymi mayanpis nunacta wañuchïca mayannin japächäśha malcamanpis pacacunman.
4 Chay malcaman linꞌa cawsayninta ayichinanpä mana ćhïnicul ütac mana pinsal nuna-masinta wañuchïcällam.
5 Ichapis caynu canman:
Juc nuna amïgunwan yamta cuchü muntïta lipäcunman.
Chay wipyaśhanćhu ächaca maquinpi yalülul amïgunman ćhälul wañüchinman.
Chaymi pacacunapä cä unanchaśha jucnin malcaman chay nuna cawsayninta ayichinꞌa.
6 Yanꞌalätac ancha calućhu chay malca captin wañücäpa aylluncuna sumä piñäśha cayalcal bingacunanpä atil wañüchï imanman;
masqui chay wañuchï nuna mana ćhïnicul wañüchiptinpis.
7 Chaymari quimsa malcacta japächanayquipä niyac.
8 Tayta Diosniqui awquilluyquicunaman limalicuśhan allpactam jatunyachinꞌa.
Paymari chay limalicuśhan lluy allpacunäta uycälishunqui.
9 Chaynu uycälishunqui pay camachishanta cäsuculcaptiquim,
jinaman Tayta Diosta cuyal munaśhanmannu cawsaycäliptiquim.
Chayćha chay quimsa malcaman,
quimsa masta yapaycunqui.
10 Chaynüpam Tayta Diosniqui uycuśhuśhayqui allpaćhu juchannä nunap yawarninta nï jićhapäcunquiñachu.
Chaynütac wañücunäpïpis mana juchayüña quïdapäcunqui.
11 “Ñatac mayanpis ćhïnicuypïta nuna-masinta ashilcul unꞌaypi wañüchiptinꞌa,
jinalcul chay jucnin pacacuna malcaman ayiptinꞌa,
12 malcanpa yaśhancunam puśhalcachimul bingacücäpa maquinman ćhulaycunꞌa wañuchisha cananpä.
13 Amamá llaquipapäcunquichu.
Chaynüpam Israel caśhtacunäćhu mana juchayu nunaca mana wañuchishachu canꞌa.
Chaynu lulaptiquiꞌa ima lulaśhayquićhüpis allinmi yaluycuśhunqui.
14 “Tayta Diosniqui uycuśhuśhayqui allpaćhu cayalcalñá nuna-masiquip culindancunacta amam pasaycälinquichu.
Chay culindancuna awquilluyquicunap ćhulaśhannüllam canꞌa.b
Licäcunäwan imanuy cananpämi nin
15 “Jucllaylla licänin captinꞌa amam mayantapis mana allin lulaśhanpïta ütac juchapacuśhanpïtapis juchachäśha canꞌachu.
Aśhwanpa ishcay quimsa licäcuna captinmi juchachaycüśha caycunꞌa.c
16 “Mayanpis ćhïnicuyninwan nuna-masinta imapïpis tumpaptinꞌa,
17 chay ishcay quijanacücunämi Tayta Diospa,
sasirdüticunäpa,
chaynütac atindï fiscunäpa puntanman aśhuycapäcunꞌa.
18 Chayćhu fiscunämi sumäta licaycälinꞌa.
Sïchuśh juchachäcäpa nishanca yanꞌal captinꞌa,
19 chay nuna-masinpa mućhuchicuyta mañacuśhanwanmi mućhuchisha canꞌa.
Chaynüpamari amcunapïta mana allincäta chincachipäcunqui.d
20 Chayta uyalipäculmi juc nunacunaca manchaculcanꞌa;
jinalmi amcunaćhu chaynu mana allinta manaña lulaycäpäcunꞌachu.
21 Amamá mayantapis llaquipapäcunquichu.
Pägapäcuchun cawsayninpïtá cawsayninwan,
ñawinpïtá ñawinwan,
quilunpïtá quilunwan,e
maquinpïtá maquinwan,
ćhaquinpïtá ćhaquinwantac.