Levitacunäpa tücänincunapïtam nin
18
“Levi ayllućhu cä sasirdüticunäpä manam jinantin Israelćhu ima tücällan allpapis canꞌachu.
Paycuna Tayta Diospä cañaywan uycuśhancäpïtawan tücaśhanpïtam cawsapäcunꞌa.
2 Chaynu wawꞌi-caśhancunaćhu tücänin mana cayaptinpis Tayta Dios nishannu pay quiquinmi tücänin.a
3 “Sasirdüticunaca micapäcunman Tayta Diosta uycapäcuśhan wäcacunap,
uwishcunap cuartuśhllantam,
caquichcullantam,
mishquipllantam.
4 Chaynütacmi trïguyquip,
bïnuyquip,
asaytiquip wamä yalamuśhanta uycapäcunqui;
jinaman uwishniquip wamä millwa lutuśhayquitapis uycälinqui.
5 Tayta Diosniquimari lluy ayllucunapïta aclaycula payta,
lluy milaynintinta imaypis Tayta Diosta sirbiycälinanpä.
6 “Sïchuśh jinantin Israelćhu cä jucnin malcapïta Tayta Dios aclaśhan sityuman Levi ayllu śhamuyta munalꞌa,
7 jina śhamuchun.
Chayćhüćha chayćhu sirbï sasirdüticunänu paypis Tayta Diosta sirbiycunꞌa.
8 Chaynütacmi micuytapis paycunanu ćhasquipäcunꞌa,
jinaman taytancuna laquipäśhantapis ćhasquipäcunꞌa.
Millachicuy lulaynincunacta mana atichipäcunanpämi nin
9 “Tayta Diosniqui uycuśhuśhayqui allpaman yaycälälil chay malcacunäpa millachicuy lulaynincunacta ama atichipäcuychu.
10 Amatacmi chuliquicunacta cañaywan uycapäcunquichu.
Amatacmi lulapäcunquichu:
licacuyta,b
rüjacuyta,c
cutichicuyta,
11 mïsa maśhtayta,
licacüta,
ispiritucunacta ayayta,
wañüpa almanta ayaytapis.d
12 Cay lulaycunaca Tayta Diospá millachicuymi.
Caynu millachicuy lulaycunacta lulaśhanpam Tayta Diosniqui cay uycuśhunayqui allpaćhu cä malcacunätapis lluy alapacüla.
13 Amcunañatacmi ichá Tayta Diosniquip munaśhanmannu allin caycunayqui.e
14 Amcunacta uycuśhuśhayqui malcacunaca licacücunactam,
rüjacunactam cäsuculcan.
Amtañatacmi ichá Tayta Diosniqui chaycunacta lulanayquita mana munanchu.f
Tayta Dios juc willacüninta śhalcachinanpämi nin
15 “Amcunapïtam Tayta Diosniqui juc willacüninta yaꞌactanu śhalcachinꞌa.
Paytam uyalicul cäsuculcanqui.
16 Caytamari Horeb ulꞌüćhu lluy juntunacüśha cayalcal Tayta Diosniquita mañaculcälanqui.
Chayćhümi nipäculanqui:
‘Tayta Diosnïpa shiminta manañam mastá uyaliyta,
nïtac nina waläcäta licaytapis munächu,
yanꞌalmi wañülu imäman’ nil.
17 Chaymi Tayta Dios nimäla:
‘Allinmi chay mañacalcämäśhanca.
18 Chaymi malca-masiquicunapïta amtanu juc willacüta śhalcachishä.
Paypa shiminman limaynïcunacta ćhulaycuptïmi amcunacta niycälishunqui.
19 Ñatac yaꞌapa willacüní nishanta mana cäsucücätá quiquïmi licaycuśhä’ nil.
20 Mayanpis pudirnïnu willacütucücätá,
ütac mana niyaptí,
ütac taytachacunap pudirninnu willacütucücá wañuchishamari canꞌa.
21 Ichapis am ninqui:
‘¿Imanuypatan yaćhaśhä Tayta Diospi caśhanta ütac mana caśhantapis?’
nil.
22 Sïchuśh Tayta Diospa pudirninnu willacuyaptinpis nishanca mana lulacacuptinꞌa manamá Tayta Diospa nishanchu cala.
Sinuꞌa chay willacüca nunatucuyninwanmari willacula.
Chaymi payta mana manchaculcänayquichu.