2 “Sïchuśh Tayta Diosniqui uycuśhunayqui jucnin malcaćhu paypa ñawquin wayapapis ütac walmipis mana allinta lulälunꞌa;

chaynu lulalꞌa Tayta Diosniquipa limalicuśhantam jalutacuyan.

3 Chaynütacmi jalutacuyan juc taytachacunacta alawal uyshuycapäcuśhanwan:

intïman,

quilläman,

uyllurcunämanpis.

Chaycunacta alawapäcunayquipächu manamá nila.

4 Chaynu lulaśhanta uyalïlälilꞌa puntacta tuquictalä yaćhaycäliy rasun ütac mana rasun caśhantapis.

Sïchuśh chaynu millachicuy lulaśhanta Israel caśhtacunäćhu yaćhälälilꞌa,

5 chay luläcäta wayapapis ütac walmipis cacuchun malcap puncunmanmi juluśha canꞌa.

Chayćhümari tamshaywan wañuchisha canꞌa.^a

6 “Wañuchisha canman ishcay ütac quimsa licänin captinmi;

jucllaylla licänin captinꞌa manamá imaypis wañuchishachu canman.^b

7 Licäcunämi tamshayta allaycunꞌa;

jinamanmi jinantin malcaca tamshapäcunꞌa.

Chaynüpamari mana allincäta amcunapïta chincachipäcunqui.^c

8 “Sïchuśh nuna wañuchishanpïta,

lïtunacuypïta,

aychanćhu dañäduśhanpïta ütac malcayquićhu ima quijacuycunapïta allichapäcunayquipä sasa captinꞌa Tayta Diosniqui aclaśhan sityumanmi lipäcunqui.

9 Chayćhümi Levi ayllu sasirdüticunäman,

atindï fiscunäman yaycapäcunqui chaycunapïta willaycü.

Paycunañatacmi tincüllanman allichaycapäcunꞌa.

10 Chayurá Tayta Dios aclaśhan sityućhu cäcunaca nishuśhayquimannüllamari lulaycälinqui.

11 Paycuna camachishantanüllamá lluy lulaycälinqui.

Pay nishanta amamá wicman cayman uchuyllactapis iwipäcunquichu.

12 Tayta Diosniqui aclacuśhan sityućhu licaycü fisca ütac sasirdütica nishanta nunatucuyninwan mana cäsucücá wañuchisham canꞌa.

Chaynüpam Israel caśhtacunäpïta mana allinca chincachisha canꞌa.

13 Caynu lulapäcuśhayquita jinantin malcaca yaćhälälilmi manchaculcanꞌa;

jinalmi manaña nunatuculcanꞌachu.

14 “Tayta Diosniqui uycuśhuśhayqui allpäman yaycälälil yaćhayalcalñá ichapis nipäcunqui:

‘Muyülïninchic malcacunäćhu mandacüninnu yaꞌanchicpäpis mandacüninchic canantam munanchic’^d nil.

15 Chaynu captinꞌa Tayta Diosniqui aclaśhancämi Israel caśhta masiquipi caycunꞌa.

Mandacüca manamá mana Israel caśhta canmanchu.

16 Chay mandacüpä ćhulaśhayqui nunaca amam achca-achca cawallucunacta milachiyta ćhapayanꞌachu.

Nïtac Egiptomanpis cawallu lantïpis caćhayanꞌachu.^e

Tayta Diosmi nin:

‘Egiptoman amam imaypis cutinquichu’ nil.

17 Chay mandacüca amam achca walmiyu canmanchu;^f

yanꞌalmi allincäpïta jucmanyächinman.

Amatacmi illaycunacta ürucunacta tawacuyanꞌachu.^g

18 “Mandacüca täcunanćhu mandayta allaycul Levi ayllu sasirdüti uywapäcuśhan camachicuycätam jucman quiquinpä isquirbinꞌa.

19 Cay lulachishancäta uywalmi cawsaśhancama muyun-muyun lïgipanꞌa.

Chayćha Tayta Diosta manchacuyta yaćhanꞌa,

lluy camachicuynintapis cäsucunꞌa,

lulaymanpis ćhulaycunꞌa.

20 Jinalmi mana nunatucunꞌachu,

nïtac camachicuypïpis wicman cayman japächacunꞌachu.

Chayćha paypis lluy milaynincunapis Israel caśhtaćhu achca wata mandacü capäcunꞌa.