Israel caśhtacunäpä culindancuna maycunapi cananpämi nin
34
Chaypïtam Moisesta Tayta Dios nin:
2 “Israel caśhtacunäta nimuy:
‘Amcuna Canaan malcaman yaycäläliptiqui cay allpam amcunap tücäniqui canꞌa.
Culindancuna caycunam canꞌa:
3 “ ‘Sur lädumanmi culindancuna canꞌa chunyä Zinpïta aśhta Edomcama.
Chayurá sur lädu inti ishpimunan lädupi culindanmi Puchucü Lamarcäpïta allaycunꞌa.
4 Jinalmi Acrabim caśhanpa chunyä Zincama muyumunꞌa.
Chaypïtam sur lädupïta Cades-barnea lädunta lil Hasar-adar malcanta Asmon läducama ćhanꞌa.
5 Asmon lädupïtañatacmi muyulimunꞌa Egiptop wayunta Mediterraneo lamarcäcama.
6 “ ‘Inti ishpimunan lädupïtañatacmi Mediterraneo lamarcäcama ćhanꞌa.
7 “ ‘Ichü lädumantañatacmi canꞌa:
Mediterraneo lamarcäpïta aśhta Hor ulꞌücama.
8 Hor ulꞌüpïñatacmi Hamat yaycunancama lil Zedad malcäcama ćhanꞌa.
9 Chaypïtañatacmi Zifron malcap lil Hazar-enan malcäćhu camacanꞌa.
Chaynümari ichü lädupi culindayqui canꞌa.
10 “ ‘Inti ishpimunan culindayquiñatacmi Hazar-enanpïta aśhta Sefamcama canꞌa.
11 Sefampïtañatacmi jiꞌalpunꞌa Ribla läducama;
Ribla cayan Ain lädućhu inti ishpimunan lädućhümari.
Chaypïta inti ishpimunan läduman jiꞌalpul Cineret lamarpa patanpam pasanꞌa.
12 Chaypïtam Jordan mayunpa-cama ulay läduman jiꞌalpunꞌa Puchucü Lamarpa camacaynincama.
Chaycunam allpayquicunap lluy muyülïninpa culindancuna canꞌa’ ” nil.
13 Chaypïtam Israel caśhtacunäta Moises nin:
“Canan cay allpactam chüsanacaycälil partinaculcanqui.
Tayta Dios camachila isun ayllucunaca,
jinaman Manasespa partina ayllucunalla aypunaculcänayquipämi.b
14 Ñatac Ruben,
Gad ayllucunäwan Manasespa parti aylluncunaca tücäninta ñam ćhasquïlälinña.
15 Cay ishcay ayllucunäwan Manases partin ayllucunaca tücäninta ćhasquipäcula inti ishpimunan Jordan mayup chimpanćhu,
ütac Jericopa chimpan inti ishpimunan lädućhümi”c nil.
16 Chaypïtam Moisesta Tayta Dios nin:
17 “Chay allpacta aypüpäcunꞌa cay nunacunämi:
Sasirdüti Eleazarwan Nunpa chulin Josuemi.
18 Chaynütacmi ayllupïta-cama jucnin puydïnin allpäta tücachiyta yanapapäcuśhunqui” nil.
19 Chay allupi-cama puydïcunaca caycunamari cala:
Juda ayllupïta Jefonepa chulin Calebmi.
20 Simeon ayllupïta Amiudpa chulin Samuelmi.
21 Benjamin ayllupïta Quislonpa chulin Elidadmi.
22 Dan ayllunpïta puydïnin Joglipa chulin Buquinmi.
23 Manases ayllupïta Josepa milaynincunaćhu Efodpa chulin puydïnin Hanielmi.
24 Efrain ayllupïta Siftanpa chulin puydïnin Kemuelmi.
25 Zabulon ayllupïta Parnacpa chulin puydïnin Elisafanmi.
26 Isacar ayllupïta Azanpa chulin puydïnin Paltielmi.
27 Aser ayllupïta Selomipa chulin puydïnin Ahiudmi.
28 Neftali ayllupïta Amiudpa chulin puydïnin Pedaelmi.
29 Paycunactamari Canaan malcaćhu jinantin Israel caśhtacunäman tücachinanpä Tayta Dios nila.