Camachicuyta caśhanmi isquirbiycun
34
Chaypïtam Moisesta Tayta Dios nin:
“Lumipïta ishcay tablachacta uycuśhactanu sinsilwan labraycuy.
Chaymanmi yaꞌa quiquí isquirbiycuśhä camachicuy amshuśhayquićhu caśhantanülla.
2 Chaypïta allichacuy wala-wälalla Sinai ulꞌüpa puntanman ishpimunayquipä.
Chay altunninćhümi yaꞌawan tincuycuśhun.
3 Ñatac amam mayanwanpis ishpimunquichu.
Nïtac chay ulꞌüćhu,
muyülïninćhu nï chimpan ulꞌucunäćhüpis mayan nunapis caycunmanchu;
nïtac uwishcunapis,
wäcacunapis caycunmantacchu” nil.
4 Chaymi punta uycuśhancätanülla Moises lumipïta ishcay paltachacta labräla.
Chay lumipi tablachäta apaculculmi chay wäla aspi-aspiylla Tayta Dios nishannu Sinai ulꞌüman ishpila.
5 Chaymanmi Tayta Dios pucutaypa ćhawpinćhu jiꞌalpamula.
Chayćhu paywan cayculmi śhutintapis lisiycachila.
6 Moisespa puntanpa pasayalmi Tayta Dios nin:
“¡Tayta Diosmi cayá!
¡Tayta Diosmari cayá!
llaquipayniyümi,
allin śhunꞌuyümi,
sumä jatun cuyacümi;
ñacayta piñacü,
sumä chalapacuna,
rasuncäćhu caycümi cayá.
7 Masqui walanganpi-walanganpi milaycuna pasaptinpis jinallamari cuyacuyní cayan.
Chaymi mana allin luläcätapis,
mana cäsucücätapis,
juchapacücätapis pampachaycú.
Chaynütacmi juchayücätapis jinallactachu mana caćhaycú.
Sinuꞌa mućhuycachishämi chulincunaćhüpis,
willcancunaćhüpis,
chulinpa willcancunaćhüpis” nil.a
8 Nilcullaptinmi Moises pampäcama uyshucuycul alawäcuyan:
9 “Taytallay,
allinpä licaycamalꞌa yaꞌacunawanꞌari lillay.
Cay malcaca pasaypi cullu linli-camam.
Juchäcunacta,
mana allin lulaynïcunacta pampachaycälillämayꞌari.
Jinalcul malcayquipä ćhasquiycälillämay” nil.
Caśhanmi limalicun
10 Niptinmi Tayta Dios nin:
“Sumäta uyaliy,
yaꞌami jinantin malcayquip ñawquin limalicuśhä.
Jinantin pachäćhu imaypis mana lulaśha cä milagrucunacta lulaycunäpämari limalicuśhä.
Chayćha amcunawan cä nunacunaca licaycälinꞌa Tayta Dios lulaycuśhanta;
äśhalayllaman camanacunactamari amwan lulaycuśhä.
11 “Chayćha canan camachishäta lulaycunqui.
Yaꞌañatacmi ñawpäniquipi aluycuśhä Amhor,
Canaan,
Het,
Ferez,
Hev,
Jebus läducunätapis.
12 “Chayćhu yaćhanayquipä yaycuśhayqui malcacunäwanꞌa imallactapis ama limalinaculcaychu.
Yanꞌalmi mana allincäman palpälächishunquiman.
13 Aśhwanpam uycuna patacninta pampaman muyülächinqui,
capillachancunacta,
taytachancunacta camacaycälälinqui;
aśhta alawaśhan Asera mamachantapis camacaycälälinquimari.b
14 “Ñatac taytachacunacta amamá alawayalcanquichu;
Tayta Diosniqui sïlüsum cacullan.
Chaymi śhutinpis ‘Silüsu’.
15 “Chayurá chay malcacunäćhu yaćhäcunäwan yanꞌalätac imallactapis limalinacuyalcanquiman.
Paycuna taytachancunacta alawayninwan waticacuyalcanmari.
Chay taytachancunaman uycuśhancunäta amcunapis micapäcunayquipämari jicutapäcuśhunqui.
16 Ichapis chuliquicuna wamlancunawan cuscapäcunꞌa.
Jinaptinćha wamlaca chay taytachancunacta alawayninwan waticaculcanꞌa.
Chayćha chuliquicunapis walminpa taytachanta alawaśhtin camacapäcunꞌa.
17 “Amari imapïpis fundïsha taytachacunactá lulapäcuychu.c
Mana Libadürayu Tanta Fistacta lulananpämi nin
18 “Ñatac camachishämannuꞌari Mana Libadürayu Tanta Fistacta lulaycäliy.d
Chayćhu anćhish muyunmi mana libadürayu tantacta micapäcunqui.
Chay Egiptopi yalapämuśhayqui Abib quillaćhümari lulapäcunqui.
19 “Chaynütacmi lluy wamä chuliquicuna yaꞌapä japächaycuśhä capäcunꞌa.e
Chaynütac wäcacunäćhüpis,
uwishcunäćhüpis wamäca ulu captinꞌa yaꞌapä japächaycuśhämari canꞌa.
20 Ñatac aśhnucunäćhuꞌa uwishwanmi śhaycachinqui;
mana śhaycachilꞌa cuncantam iwïlunqui.f
Chaynütacmi walaśh chuliquicunapäpis śhaycachinqui.
Manamá cala maquilla mayanpis aśhuycälimunquimanchu.
21 “Chaynütacmi süta muyun imactapis lulanayquipä cayan.
Anćhish muyuncäñatacmi masqui talpuy timpu,
cusicha timpu cacuptinpis jamanayqui.g
22 “Chaynütacmi ‘Simäna Fista’ nishanta lulapäcunqui trïgu cusichap allaycuyninćhu.h
Jinaman ‘Cusichap Camacaynin’ nishan fistactapis lulapäcunqui cusichap camacayninćhümari.i
23 “Chaynütacmi lluy wayapacunaca watäćhu quimsa cuti aśhuycälimunan Taytäman,
Diosman,
Israelpa Tayta Diosninman.
24 Yaꞌa quiquïmi juc malcacunätapis ñawpäniquipi alapacüśhä.
Chaynüpam allpayquicunacta mas jatunman muyuycachishä.
Tayta Diosniquiman watäćhu quimsa cuti śhapämuptiquiꞌa allpayquicunacta ućhishunayquipä mayanpis manam wañupacuyllapis wañupacunꞌachu.
25 “Uywacunacta uycälipämalꞌa yawarninta amari libadürayu tantawan cuscacta ćhulaycäliychu.
Chay Tayta Dios Libraycuśhan Fistaćhuj lluy uycuśhayquicunaćhu ama imallactapis puchuycälichiychu.
26 “Chaynütacmi lluy cusichayquip punta allinnin yalücäta Tayta Diosniquipa wasinman apaycamunqui.k
“Amatacmi uña capischactá yanunquichu mamanpa lichinćhuꞌa” nilmi nin.l
Camachicuycäta Moises isquirbinanpämi nin
27 Chaypïtam Moisesta Tayta Dios nin:
“Cay nishäcunäta isquirbiy.
Caycunamari anman,
jinantin Israelman limalicuśhäca cayan” nil.
28 Chay ulꞌüćhümi Tayta Dioswan tawa ćhunca (40) muyun,
tawa ćhunca (40) tuta mana micuśha,
nï yacullactapis upyaśha Moises quïdacula.
Chay lumipi ishcay tablachaćhümari limalicuśhan ćhuncantin camachicuyta isquirbila.
29 Chaypïtam lumipi ishcay tablachaćhu camachicuynin apapacüśha Sinai ulꞌüpïta Moises jiꞌalpamula.
Manatacmi tantiaculachu Tayta Dioswan limaśhan-laycu cäran sumä chipyayäśhanta.
30 Chaynu chipyayaptinmi Aaronwan lluy Israel caśhtacunaca manchälälil mana aśhuycälilachu.
31 Moisesñatacmi Aarontawan puydïnincunacta aśhuycälimunanpä nila.
Chaynu aśhuycälimuptinmi Moises limapäla.
32 Chaypïta jinantin Israel caśhtacunämi Moisesman aśhuycälimula.
Jinaptinmi Tayta Dios Sinai ulꞌüćhu lluy camachishanta cäsuculcänanpä willaycula.
33 Paycunawan limapayta camacalculñatacmi cäranta śhucupaculcula.