23
“Fisćhu cayalcal casquiwanꞌa imactapis amam ninquichu.a
Amatacmi yanꞌal casquiwan ashïcunäta yanapänayquipä awniyanquichu.
2 “Lluy-yupay mana allincäćhu capäcuptinpis amatacmi atichinquichu.
Tistïgunu śhayculpis mana allincäman lluy-yupay śhalcuyalcaptinpis amatacmi apachicunquichu.
3 Ñatac wacchacunäpis allincäćhu mana captinꞌa amatacmá payman śhalcunquichu.b
4 “Ćhïnicüniquip jitapacüśhan wäcanta,
aśhnunta talïlulꞌa cutiycachipuy.
5 Ćhïnicüniquip cargayu aśhnun waclläśha anćhaycaćhayaptin ama licapayaychu,
aśhwanpa śhalcachiwshiy.c
6 “Waccha nunaca lïtućhu cayaptin dirichunta ama jalutacuychu.
Aśhwanpa cällanman tuquip licaycuy.
7 Mana allin casquicunawan tumpaycunäpïtá japächacuy.
Amatacmi mana juchayu nunäta juchayüman muyulcachil wañuchinquichu.
Chay juchayücäta manamá:
‘Cayꞌa allinpä licaycuśham’ nil nishächu.
8 “Amatac artinayquipä imacta uycuśhuptiquipis awniychu.
Chaycuna allin licä nunacunäta aplachinmi;
allincunätamari mana allinman ticlachin.d
9 “Mana Israel caśhta śhamücunäta ama ñacachipäcuychu,
Egiptoćhu cayalcal pulicü imanuy caśhantapis yaćhayalcalñá.e
Unanchaśha jamanaćhu jamananpämi nin
10 “Süta watam ćhaclayquićhu talpul cusichanqui.
11 Anćhish watäñatacmi ćhaclayquitapis,
üba,
ulïbus lantayquicunactapis jamachinqui.
Chay wata jamachinqui wacchacunaca ashipaculcänanpämi;
puchünincunactapis munti uywacuna micapäcunanpämi.f
12 “Süta muyunmi ima lulayniquitapis lulapäcunqui.
Anćhish muyuncäćhüñatacmi jamanqui;g
aśhta wäcayquipis,
aśhnuyquipis,
uyway nunayquipis,
mana Israel caśhtacunäpis jamaycälinꞌam.
13 “Cay lluy nishäcunacta lulaycäliy.
Amamá juc taytachacunactá ayacuyalcanquichu nï śhutillantapis limalcälinquipischu.
Quimsa fistacta lulapäcunanpämi nin
14 “Wataćhümi quimsa cuti jatun fistacta lulaycälipamanqui.
15 Mana Libadürayu Tanta Fistactam lulapäcunqui.
Nishacnümi anćhish muyunnintin Mana Libadürayu tantacta micapäcunqui.h
Chay fistacta Abib quillaćhümi lulanqui.
Chay quillachümari Egiptopïta yalapämulanqui.
Chaymi yaꞌaman cala maquilla mayanpis mana aśhuycamunmanchu.
16 “Chaynütacmi ‘Cusicha Fista’ nishan fistacta lulapäcunqui cusichap allaycuyninćhu.i
Chaynütac ‘Cusichap Camacaynin’ nishan fistactam lulapäcunqui cusichap camacayninćhu.j
17 “Lluy wayapacunaca watäćhu quimsa cutictam Tayta Diosman aśhuycälimunan.
18 “Uywacunacta uycälimalꞌa yawarninta amari libadürayu tantawan cuscacta ćhulaycäliychu.
Chay fistaćhu lluy wilacunäta cañaycälinquim;
amari imactapis puchuycälichiychu.
19 “Lluy cusichayquip punta allinnin yalücätam Tayta Diosniquipa wasinman apaycamunqui.k
“Amatacmi mamanpa lichinćhuꞌa uña capischactá yanunquichu.l
Tayta Diospa anjilninmi Israel caśhtacunäta puśhaycun
20 “Yaꞌami anjilnïta caćhaycamuśhä lishayquićhu licaycälil limalicuśhá allpaman puśhaycälishunayquipä.
21 Payta manchacuywan uyalicul cäsucuy.
Ama cullu linlicuycul cayalcaychu.
Anjilca pudirní calmi juchayücunäta tincüninman-cama mućhuycachinꞌa.
22 Ñatac lluy nishäcunacta manchacuywan lulaycäliptiquiꞌa ćhïnicüniquicunap ćhïnicüninmi caśhä;
cuntrayqui cäcunäpa cuntranmi caśhä.
23 Chay caćha anjilnïmi Amhor,
Het,
Ferez,
Canaan,
Hev,
Jebus läducunap allpanman puśhaycälishunqui.
Paycunacta yaꞌamari camacaycüśhä.
24 Chay malcacunap lulaynincunacta amam atichipäcunquichu;
taytachancunacta amam sirbipäcunquichu nï alawapäcunquipischu.
Aśhwanpam taytachancunactapis,
alawäśhan lumincunactapis camacaycälälinqui.
25 Tayta Diosllayquita manchacuywan alawaptiquiꞌa micuytapis yacuctapis manam pishiycachishunquichu.
“Ñatac anman ishyay śhamücunactapis alapacuśhämi.
26 Jinaman cawsayniquitapis achca watamanmi muyuycachishä.
Manatacmá machürapis,
śhullü walmipis canꞌatacchu.
27 “Yaꞌami lluy malcap pasapäcunayquicunämanpis sumä manchacuyta puntaycachishä.
Chaynu malcacunäta manchacuywan muspächiptïmi siquinta chapacuycul ayiculcanꞌa.
28 Achca-achca urunwaycunacta ñawpächiptïmi Hev,
Het,
Canaan läducunäta alapacunꞌa.
29 Chay nunacunaca juc watallaćhüchu manam alüśha canꞌa.
Chaynu alüluptiꞌa ćhaclacunaca pulunyäluptinmi munti uywacunapis milälul cuntrayqui cälunman.
30 Chaymi milanayquicama ashllap-ashllap alapacüśhä.
Chaynu miläläliptiquiñam jinantin allpaca maquiquićhu canꞌa.
31 “Chay uycunacpä culindancuna caymi:
Puca Lamarpi allacuycul Filisteo läducunäpa mayuncamam.
Chaynütac juc lädunpïtá chunyäcäpi allacuycul Eufrates mayücamam.
Cayćhu yaćhäcunäta alupäcunayquipä maquiquimanmi ćhulaycamuśhä.