Camachicuyta caśhan isquirbishantam yalpachin
10
“Chaynütacmi Tayta Dios nimäla:
‘Punta caśhancätanu lumipi ishcay tablachacta sinsilwan labraycuy,
jinaman babultapis ilupïta lulay;
jinalcul ulꞌüta ishpimuy yaꞌawan tincunanchicpä.
2 Punta tablacha amshuśhayquićhu caśhantanüllam canan tablachamanpis isquirbiycuśhä.
Chaytam limalicuśhá babulman ćhulaycunqui’ nil.
3 “Chaymi acacia ilupïta limalicuśhan babulchacta lulalá.a
Jinaman lumipïta ishcay paltachacta punta lulaśhannu labrayculmi chay ishcay tablachacta apaculcul ulꞌüman ishpilá.
4 Chay punta isquirbishancätanümi Tayta Dios isquirbiycula;
chay juntunaculcäśhá muyun ulꞌüćhu nina waläcäpa ćhawpinpi ćhunca camachicuycätamari uycamäla.
5 Chaymi chay ulꞌüpïta jiꞌalpalcamul lulaśhá babulman ćhulayculá.
Chayćhümi Tayta Dios nimäśhanmannu ćhulalayan.
6 “Chaypïta Israel caśhtacunaca Beerot-bene-jaacan nishanpïtam pasapäcula Mosera nishanman.
Chayćhu Aaronb wañucuptinmi pampälälila.
Pudirninñatacmi chulin Eleazar puydï sasirdütinu śhaycula.
7 Chaypïta Gudgodamanmi pasapäcula;
Gudgodapïñatacmi achca yacuyu cä Jotbata läduman pasapäcula.
8 Chayćhümi Levi ayllucunätac Tayta Dios japächala limalicuśhan babulcäta apapäcunanpä.
Jinaman paypa puntanćhu cayalcal malcaca allin capäcunanpä lulaycunanpämi ćhulaycula.
Chaynüllamari canancamapis lulaycuyalcan.
9 Chaymi wawꞌi-caśhancuna caśhancäćhu Levi ayllupa ima tücäninpis mana calachu.
Tayta Diosniqui nishannümari pay quiquin tücänin cala.
10 “Punta caśhäcänümi tawa ćhunca (40) muyun,
tawa ćhunca tutad ulꞌüćhu camulá.
Chayćhüpis Tayta Dios caśhan uyaliycamalmi manaña camacapäcuśhulanquichu.
11 Chayćhümi Tayta Dios nimäla:
‘Canan malcäta caminaycunayquipä allichacuy;
awquilluyquicunaman limalicuśhá malcaman yaycuycul duyñuchaculcänayquipä’ nil.
Tayta Dios imactapis munaśhantam niycun
12 “Canan,
Israel caśhtacuna,
¿Tayta Diosniqui amcunapïta imactatan munayan?
Tayta Diosniqui munayan manchacuywan altuman juluycunallayquitawan sirbipäcunallayquitamá.
Jinaman Tayta Diosllayquiman tucuy śhunꞌuyquitapis,
llapan pinsayniquitapis,
lluy callpayquitapis ćhulaycunallayquitam munayan.
13 Chaynütac pay camachishancunätawan nishancunäta lulaycälinayquitamari munayan lluy imapis allin yaluycälishunayquipä.
14 Janay pachäpis chayćhu lluy cäcunäpis,
cay pachäpis lluy ima cänintinpis Tayta Diosllayquipamari cayan.
15 Masqui juc malcacunacta aclanan captinpis awquilluyquicunacta Tayta Dios cuyalmi aclaycula.
Amcunactapis malcan capäcunayquipämi lluy malcacunäpïta aclapäcuśhulanqui.
16 “Chaymi śhunꞌuyquićhu imaymana mana allincunäta wicapanayqui,
jinaman amaña pasaypi cullu linli cayalcayñachu.e
17 Dioninchicꞌa lluy taytachacunap Diosninmi,fg
Tayta Diosninchicꞌa lluy taytacunap Taytanmi.
Payꞌa sumä,
munayniyu,
manchay cä pimanpis mana śhalcuyä,
suburnuctapis mana ćhasquiyä Tayta Diosmari.h
18 Paymari mana taytayu mana mamayücunätapis,
japanyäśha walmicunätapis,
amcunaćhu cä juc caśhtacunätapis cuyal micuytapis,
müdanactapis uycun.
19 Chaynümi amcunapis juc caśhtacunäta cuyapäcunayqui;
amcunapis Egiptoćhu mana malcayümari capäculanqui.
20 “Tayta Diosniquita manchaculcay,
payllacta alawaycäliy,
payllaman chalapaculcay,
imactapis limalicunayqui captinꞌa paypa śhutinta śhaycaycachil limaliculcay.
21 Äśhalayllaman camana sumä lulaycunacta lluy lulaśhancunacta licapäcuśhayquicunapïtam payta imaypis alawapäcunayqui.
22 Amcunap awquilluyquicuna Egiptoman anćhish ćhuncam (70) lipäcula.i
Cananñatacmi quiquin Tayta Dios janay pachäćhu uyllurcunätanu achca-achcaman milälälichishunqui.j