Jatućha malcacunactam Tayta Dios camacaycun
9
Chaynütacmi Moises nin:
“Israel caśhtacuna sumäta uyalipämay.
Canan Jordan mayucta chimpapäcul alli-cama jatućha malcancunäta,
murällanpis sumä altu-altucama cäcunäta alupacunayquipä ćhämunñam.
2 Chay nunacunaca sumä munayniyu callwan-cama Anacpa milaynincunamari.
Amcuna yaćhapäcunquimá ‘¿Cay Anacpa milaynincunawan mayanmá chalanacunman?’
nishantapis.
3 Amcunañatacmi tuquicta yaćhapäcunayqui quiquin Tayta Diosniqui puntayquita ñawpaśhanta.
Jinalmi nina camacaycücänu camacaycul maquiquiman paycunacta ćhulaycamunꞌa.
Jinaptinmi Tayta Dios nishuśhayquinu amcuna malcanpi alapaculcul juclla camacaycälälinqui.
4 “Chaynu Tayta Diosniqui paycunacta alapacüluptin yanꞌalätac pinsayalcanquiman:
‘Allin cawsaynïpam Tayta Dios cay allpacta tincünïmannu uycäliman’ nil.
Quiquin malcacunap juchanpïtamari Tayta Dios alapacülun.
5 Manamá allin caśhayquipachu nï allin śhunꞌuyu caśhayquipachu chay allpaca maquiquićhu canꞌa,
sinuꞌa cay malcacunap juchanpïta Tayta Diosniqui puntayquipi alapacülunꞌa,
awquilluyqui Abrahamman,
Isaacman,
Jacobman limalicuśhanta lulaycunanpämá.
6 Chayurá tuquictam yaćhanayqui;
cay allin allpacta Tayta Diosniqui uycuśhunqui manam allin capäcuśhayquipachu.
Amcuná pasaypi cullu linlim capäcunqui.
Cullu linli Israel caśhtacunäpïmi Moises mañacun
7 “Amam imaypis unꞌapäcunquichu chunyäcäćhu Tayta Diosniquita piñachipäcuśhayquita.
Egiptopïta yalapämuśhayquipïta cay ćhäpämuśhayquicama Tayta Diospä pasaypi cullu linli-camamari capäculanqui.
8 Horeb ulꞌüćhu Tayta Diosta piñälächiptiquim pay ñaćha camacaycälishulanqui.
9 Chay Horeb ulꞌumanmi lumipi tablachacta,
Tayta Dios amcunawan limalicuśhan tablachacta ćhasquiycü ishpilá.
Chay ulꞌućhümi ima micuyllactapis nï yacullactapis mana upyal tawa ćhunca (40) muyun,
tawa ćhunca tutaa calá.
10 Chayćhümi lumipïta ishcay tablachacta Tayta Dios uycamäla.
Chay juntunacuśhanchic muyun ulꞌüćhu nina waläcäpa ćhawpinpi Tayta Dios limapämäśhan limaycunämi chayćhu quiquinpa maquinwan isquirbïsha cayäña.
11 Chay tawa ćhunca muyun,
tawa ćhunca tuta pasäluptinmi Tayta Dios uycamäla lumipi ishcay tablachaćhu limalicuśhanta.
12 Jinalculmi nimäla:
‘Canan-pacha caypïta jiꞌalpuy,
Egiptopi julamuśhayqui malcayquim mana allinta lulayalcan.
Manalä unaytam nishäcunacta juc läduman wicapaycul jïrructa jundiycul taytachacta lulacälälin’ nil.
13 “Chaynütacmi Tayta Dios niman:
‘Tuquictañam yaćhapaycú cay malca pasaypi cullu linli-cama malca caśhanta.
14 Ama miticamuychu paycunacta camacaycünäpä;
cay allpäpïpis śhutinta chincächishämi.
Ampïñatacmi ichá paycunapïtapis sumä munayniyu malcacta śhalcalcachil achca-achcaman milachishä’ nil.
15 “Chay ulꞌüćhu nina waläcäpi jiꞌalpamulmi lumipi ishcay tablachaćhu limalicuśhanta isquirbïshacta apamulá.
16 Chayćhümi amcuna Tayta Diosta jalutaculcäśhayquita licälú.
Tayta Dios nishanta manaläpis unayta unꞌayculmari jïrructa chulluycachil malta wäcactanu taytachayquita lulacälälilanqui.
17 Chaymi lumipi ishcay tablacha apamuśhäcäta amcunap ñawquiqui pampäman chapïluptí amshüla.
18 Chaynu mana allin lulapäcuśhayquiwan Tayta Diosta piñachishayquipïtam tawa ćhunca muyun,
tawa ćhunca tuta micuytapis yacuctapis mana upyal paypa puntanman unꞌulacuyculá.
19 Chaynu Tayta Dios sumä piñacuyninćhu,
rabyacuyninćhu camacaycüśhunayquipä cacuyaptinmari manchälá.
Tayta Diosñatacmari mañacuynïta yapa uyaliycallämäla.
20 Chaynütacmi Aaronpäpis Tayta Dios sumä piñacuyninćhu camacaycünanpä cacuyaptin paypïpis mañaculá.
21 Jinaman lulaculcäśhayqui malta wäcacta,
juchaman jitaycuśhüniqui taytachacta cañaycul amshuypa pawälá.
Jinalculmi ñutuy-ñutuyta aꞌalcul ulꞌüpi jiꞌalpamu mayüman jitaycülá.
22 “Chaynütacmi Tayta Diosta piñachipäculanqui Taberaćhu,b
Masahćhu,c
Kibrot-hataavaćhüpis.d
23 Chaynütacmi Cades-barneaćhue cayalcaptiqui Tayta Dios:
‘Yaꞌa uycuśhá allpaman duyñuchacaycälinayquipä yaycapäcuy’f nishuptiquipis cullu linlicaycälilanquimá.
Payman manamá chalapaculcälanquichu nïtac cäsuculcälanquipischu.g
24 Amcunacta lisishá pachapïtam Tayta Diospä pasaypi cullu linli-cama capäcunqui.
25 “Ñatac Tayta Dios camacaycüśhunayquipä cacuyaptinmi tawa ćhunca muyun tawa ćhunca tuta paypa puntanćhu unꞌulacuyculá.
26 Chayćhümi mañaculá:
‘Taytallay,
aclaśhayqui malcayquita,
pudirniquiwan lantishayquita,
sumä munayniquiwan,
nana-nanay maquiquiwan Egiptopïta julamuśhayqui malcayquita ama camacaycullaychu.
27 Uyway nunallayqui Abrahampïta,
Isaacpïta,
Jacobpïta yalpalcullayꞌari.
Cay malcap mana allinninta,
juchanta,
pasaypi cullu cayninta amari yalpalcullaychu.
28 Yanꞌalćha chay julamuśhayqui malcaca limapäcunman:
“Maytá Tayta Diosnin limalicuśhan malcaman yaycachinchu;
ćhïniculmi chunyäcäćhu wañunanpä julula” nil.
29 Ima cacuptinpis paycuna malcayqui,
aclaśhayqui,
sumä munaywan,
nana-nanay maquiwan juluśhayqui malcayquimari callan’ nil.