Tayta Diosta cuyapäcunanpämi, cäsuculcänanpämi nin
11
“Tayta Diosniquita cuyapäcuy;
camachicuynincunacta,
yaćhachicuynincunacta,
nishancunacta imaypis cäsuculcay.
2 Yalpapäcuyꞌari,
manamá milayniquichu licapäcula,
nï ćhasquiycapäcula caycunacta:
Tayta Diospa lawćhaycuśhanta,
sumä munayninta,
nana-nanay maquinwan yalachimuśhanta,
3 Egiptoćhu mandacü Faraonpa cuntran milagrucuna,
siñalcuna lulaśhancunacta,a
4 Egipto cachacuncunawan,
gïrrapä carritancunawan,
cawalluncunawan amcunacta atiyalcäśhuptiqui Tayta Dios Puca Lamarcäćhu pasaypipä camacaycuśhanta,b
5 chaynütac chunyäcäćhu cayman ćhäpämunayquicama lluy yanapäśhuśhayquita,
6 Ruben ayllućhu cä Eliaba chulin Datanwan Abiramwan ima pasapäcuśhanta;
jinantin Israel licapayaptin lluy aylluntinta,
chucllantinta,
lluy ima cänintintapis allpaca quićhacacuycul millpacalpuśhantapis manamá milayniquichu licapäcula.c
7 Amcunamá ñawiquiwan licapäculanqui Tayta Dios sumäcunacta lulaycuśhanta.
Limalicuśhan allpäćhu allin capäcunanpämi nin
8 “Chay duyñuchaculcänayqui allpaman callpawan yaycapäcunayquipä Tayta Diospa camachicuynincunactam cäsuculcänayqui.
9 Chaynu cäsuculcalꞌa awquilluyquicunaman Tayta Dios limalicuśhan allpaćhu achca watam cawsapäcunqui;
chay imaypis tuqui-tuquicta wayuycachï allpamari.
10 Chay duyñuchaculcänayqui allpaca manamá yalapämuśhayqui Egiptoćhünüchu.
Chayćhuꞌa talpupäculanquim;
wirtaćhu cäcunätanümi rïgapäcunayquila calapis.
11 Ñatac yaycapäcunayqui allpaca ulꞌuyu,
pampayu captinpis tamyällam rïgayan.
12 Chay allpacta Tayta Diosniquim licaycun;
Paymari jinantin wataca ñawillanćhu caycachin.
13 “Sïchuśh canan camachishäta sumä cäsuculcanqui,
jinaman śhunꞌuyquitapis,
cawsayniquitapis Tayta Diosllaman ćhulaycul sirbipäcuptiquiꞌa,
14 paymi talpuy tamyactapis puꞌuy tamyactapis timpullanćhu allpayquicunaman tamyaycachimunꞌa.
Chayćha amcuna trïguyquicunacta,
bïnuyquicunacta,
asaytiquicunacta allinta cusichaycapäcunqui.
15 Chaynütac uywayquicunapäpis pastucunacta wiñachimunꞌa.
Chayćha imapis mana pishiycälishunquichu.
16 Yanꞌalätac imawanpis ingañachicälälinquiman.
Taytachacunacta sirbiyniquiwan Tayta Diospïta ama japächaculcaychu,
nïtac paycunaman uyshuycäliychu.
17 Chayta mana uyaliculcaptiquiꞌa Tayta Dios sumä piñacülulmi tamyacta mana tamyachimunꞌachu.
Jinaptinmi imapis manaña wiñaptin Tayta Dios uycuśhuśhayqui allin allpäćhu rätu camacaycälälinqui.d
18 “Cay yaćhachicuycunacta umayquiman,
śhunꞌuyquiman siñaltanuꞌari ćhulay;
mana unꞌanayquipä maquiquimanpis ulcuyquimanpis watacüluy.
19 Chaycunactam chuliquicunacta wasiquićhu,
pulishayquicunäćhu,
puñunayquipäpis,
śhalcunayquipäpis yaćhaycachinqui.
20 Chaynütac wasiquip puncunman,
malcap yaycunan paradïruncunamanpis isquirbiycuy.e
21 Chayćha Tayta Dios awquilluyquicunaman limalicuśhan allpäćhu capäcuśhayquicama ampis,
milayniquicunapis achca wata allin cawsayniyü-cama capäcunqui.
22 “Sïchuśh canan camachicuy nishäcunacta cäsuculcaptiquiꞌa,
jinaman Tayta Diosta cuyal pay nishanmannu lluyta lulaycäliptiquiꞌa,
23 lluy malcacunactam puntayquipïta Tayta Dios alapacülunꞌa.
Chayćha amcunapïpis mas sumä-cama,
alli-alli cä malcacunätapis duyñuchacaycälinqui.
24 Lluy jaluycuśhayqui allpacunaca amcunapäñamari canꞌa:
chunyäcäpïta aśhta Libano nishancama;
jinaman Eufrates mayupïta aśhta Mediterraneo lamarcäcama.
25 Ampa puntayquićhu lluy malcacunacta Tayta Dios chucchuchiptinmi mana mayanpis nï imaypis llallipäcuśhunquichu.
Chaynu cananpämi Tayta Dios limalicula.f
26 “Chayurá cananmi amcuna aclaycälinayqui allin capäcunayquipä ütac mana allin capäcunayquipäpis.
27 Sïchuśh Tayta Diospa camachishancunäta canan willaycälishäta cäsuculcaptiquiꞌa allinmi capäcunqui.
28 Ñatac Tayta Dios camachishancunäta,
canan caminaycuśhäcunactapis mana cäsuculcaptiquiꞌa,
jinaman paypïta japächaculcul mana lisishayqui taytachacunaman liculcaptiquiꞌa mana allinmari capäcunqui.
29 “Duyñuchaculcänayqui malcaman Tayta Diosniqui yaycälächishuptiquiꞌa Gerizim ulꞌupïmi allin capäcunanpä niycälimunqui;
Ebal ulꞌupïñatacmi mana allin capäcunanpä niycälimunqui.g
30 Cay ulꞌucunaca Jordan mayup chimpan inti jiꞌalpunan läduman linanćhümi cayan;
Canaan läducunäpä allpanćhu,
Gilgal malcap chimpan ütac encina lantap caśhan More nishan lädućhümari cayalcan.
31 Tayta Diosniqui uycuśhunayqui malcacta duyñuchaculcänayquipä Jordan mayucta chimpanayquiñamari cayan.
Chay malcaman yaycälälil yaćhayalcalñá,
32 canan camachishäcunacta,
yaćhachishäcunacta cäsuculcänayquim.