Tayta Dios aclaśhan sityućhu uycälinanpämi nin
12
“Chayurá awquilluyquicunap Tayta Diosnin uycuśhuśhayqui allpäćhu cawsapäcuśhayquićhu lulayman ćhulaycälinqui cay nishancunactawan camachishancunactam.
2 “Chay yaycapäcunayqui malcacunap taytachancunacta mayćhu sirbipäcuśhancunactapis pampamanmi lluy muyuchipäcunqui:
ulꞌucunäćhu,
ulꞌunpalcücunäćhu,
śhaśhay-śhaśhay lantacunäpa siquinćhu cäcunätapis.
3 Uycuna patacnincunacta tunïläliy;
lumincunacta amshüläliy;
mamachan Aseractapis cañäläliy,
cullupi luläśha taytachancunactapis pampaman muyuchipäcuy.
Chaynüpam chaycunacta yalpapäcunanpi chincachipäcunqui.a
4 “Tayta Diosniquitañatacmi ichá chaynüpa ama alawapäcunquichu.
5 Aśhwanpa quiquin Tayta Diosmi amcunaćhu cä mayannin ayllućhüpis sityucta aclaycunꞌa,
chayćhu yaćhananpä.
Chaymanmi amcuna alawä lipäcunqui.
6 Chaymanmari uywacunacta apaycälinqui Tayta Diospa cañaycälipunayquipä,
uycälinayquipä.
Jinaman uycälinayquitapis,
limalicuśhayquicunactapis ćhuncapïta jucta-cama uycunayquitapis,
śhunꞌuyquipi yalamuśhan uycunayquitapis uycälinquim.
Chaynütacmi wäcayquicunap,
uwishniquicunap wamä wawintapis uycälinqui.
7 Chaypïta lulaśhayquicunaćhu Tayta Diosniqui lluy uycuśhuśhayquicunacta paypa puntanćhümi lluy aylluyquiwan cusca cushisha micapäcunqui.
Chaynu lulapäcunqui Tayta Diosniqui allin capäcunayquipä lulaycuśhanpïtamá.
8 “Chayćhu cayalcal manamá canan lulapäcuśhayquinüchu śhunꞌuyqui munaśhanta lulaculcanqui.b
9 Ñatac Tayta Diosniqui jawca cawsayta uycälishunayqui allpaman manalämi yaycapäcunquilächu.
10 Chay Jordan mayucta pasälälil Tayta Dios uycuśhunayqui malcaćhüña yaćhayalcalꞌa muyülïniquićhu lluy ćhïnicüniquicunapïta libriñam caycälinqui;
imactapis manaña manchalilmi jawcalla capäcunqui.
11 Chayurá Tayta Dios yaćhananpä aclacuśhan sityumanmi lluy nishäcunacta apapäcunqui:
cañaywan uycunacta,
uycunacunacta,
ćhuncapïta jucta-cama uycunayquicunacta,
awnishayqui uycunayquicunacta,
limalicuśhayqui allinnin cäcunätapis.
12 Tayta Diospa puntanćhu walaśh wamla chuliquicunawan,
uyway nunayquicunawan,
amcunaćhu yaćhä Levi ayllucunäwan cushiculcay.
Levi ayllucunäta amcunaćhu manamari ima allpallactapis tücachishachu cala.
13 “Tayta Diospä uywacta cañaywan uycuyalꞌa yanꞌalätac munaśhayquićhu cañayanquiman.
14 Tayta Dios jucnin ayllućhu aclaycuśhan sityullaćhümari cañaywan uycapäcunqui.
Chayćhümi lluy nishäcunacta lulaycälinqui.
15 “Ñatac lulayniquicunaćhu Tayta Diosniqui allinpä licaycul uycuśhuśhayquimannümi mayćhüpis munaśhayquimannu uywacta wañulcachil aychanta micapäcunquiman.
Chay aychacta chuyanchacüśha ütac mana chuyanchacüśha cayalcalpis lluymi micapäcunquiman luychup ütac tarucap aychantanüpis.
16 Ñatac yawarnintá amam micapäcunquichu;c
aśhwanpam yacuctanu pampäman jićhaycälälinqui.
17 “Amam malcayquićhu micapäcunquichu:
Trïguyquip,
bïnuyquip,
asaytiquip ćhuncapïta-cama jucta juluśhayquita,
jinaman wäcayquip uwishniquip wamä wawin uycuśhayquita,
uycunayquipä limalicuśhayquicunacta,
śhunꞌuyquipi yalamü uycunayquicunactapis.
18 Aśhwanpam quiquin Tayta Diosniqui aclaśhan sityućhu lluy caycunacta micapäcunqui.
Chayćhütacmi walaśh wamla chuliquicunawanpis,
uyway nunayquicunawanpis,
amcunaćhu yaćha Levi ayllucunäwanpis lulayniquicunaćhu quiquin Tayta Diosniqui yanapaycuśhuśhayquipïta cushiculcanqui.
19 Chay allpäćhu yaćhapäcuśhayquicama Levi ayllucunäta ama caćhaycapäcuychu.
20 “Sïchuśh Tayta Diosniqui uycuśhunayquipä allpa limalicuśhanta jatunyächiptin,
aychanäśhuptiquiꞌa munälinayqui üram micapäcunqui.
21 Ñatac Tayta Dios yaćhananpä aclacuśhan sityuca amcunapïta calućhümari canman.
Chaynu captinꞌa lluy uycuśhuśhayqui wäcayquita uwishniquita ćhipilcul munaśhayquicamam chay capäcuśhayquićhu micapäcunquiman.
Chaynu lulanqui yaꞌa nishämannüllam.
22 Chayćhu chuya ütac mana chuya cayalcalpis luychup ütac tarucap aychantanümi micapäcunquiman.
23 Ñatac yawarnin cawsaynin caśhanpam ama micapäcunquichu.
Manamá cawsaycäta aychawan cuscactá micapäcunquimanchu.
24 Aśhwanpa micapäcunayquitá yacuctanümi pampäman jićhapäcunayqui.d
25 Chay yawarcäta mana micapäculꞌa Tayta Diospa munaśhanta lulaycuyalcalmi ampis milayniquicunapis allin caycälinqui.
26 “Ñatac Tayta Dios aclaśhan sityumanmi paypa japächaśhayquicunacta,
limalicuśhayquicunacta apaycälil uycälinqui.
27 Chay uycuna patacmanmi Tayta Diosniquipa cañaycunayquita uycälinqui.
Chay uycuśhayqui uywacunap yawarninta uycuna patacmanmi jićhaycunqui;
aychantañatacmi ichá micapäcunqui.
28 “Cay camachicuy nishäcunacta uyalicul cäsuculcay,
ampis lluy milayniquicunapis imaypis allin caycälinayquipä.
Chaynüpaćh Tayta Diosniquipa ñawquin tincüninman allincäta lulaycälinqui.
Taytachanta alawapäcuśhannu mana atichinanpämi nin
29 “Chay duyñuchaculcänayqui malcacunacta quiquin Tayta Diosniquim ñawquiqui lluy camacaycülunꞌa.
Chayćhu lluy alapaculcul yaćhayalcaptiquiña,
30 yanꞌalätac paycunacta atiyalcächinquiman.
Chay malcacunaca camacaycüśha cayaptin amam taytachancunapïta tapucuyalcanquichu:
‘¿Cay malcayu nunacunaca imanuypatan taytachancunacta alawapäcula,
yaꞌapis chaynu alawanäpä?’
nil.
31 Chayurá amam paycuna alawapäcuśhannu Tayta Diosniquita alawapäcunquichu.
Chay nunacunaca taytachanta alawananpämari Tayta Dios millachicuśhanta lulapäcun;
paycuna taytachanta alawayninwanmari chulincunactapis cañapäcun.
32 “Chayurá lluy camachishäcunäta imaypis lulayman ćhulaycäliy,
mayanllantapis mana juluycul nï yapaycul.e