Taytachacunacta mana alawapäcunanpämi yalpachin
7
“Tayta Diosniqui duyñuchacunayquipä cä allpaman yaycachipäculmi puntayquipïta ampïtapis mas sumä-cama,
achca-achca-cama cä anćhish malcacunacta alapacülunꞌa:a
Het,
Gerges,
Amhor,
Canaan,
Ferez,
Hev,
Jebus läducunätapis.
2 Cay malcacunäta Tayta Diosniqui maquiquiman ćhulaycüśhuptiqui llalliläliptiquiꞌa lluy-lluymi camacaycälälinqui.
Paycunawan amam imallactapis limalinaculcanquichu,
nïtac llaquipapäcunquipischu.
3 Chay nasyuncunaćhu yaćhäcunäwan amam casaraculcanquichu.
Wamla chuliquicunacta amam walaśhnincunawan cuscachinquichu,
nïtac wamlancunactapis walaśhniquicunawan cuscachinquichu.
4 Chaynu lulapäculꞌa milayniquicunacta Tayta Diosninchicta ipanchaycachil taytachancunacta alawachipäcunman.
Jinaptinćha Tayta Dios amcunawan sumä-sumä piñacülul jucllaćhu camacaycüśhunquiman.
5 Chaymi chay malcacunäwan caynu lulaycälinqui:
uycuna patacninta pampamanmi muyülächinqui,
lumi śhaycächishacunacta,
taytachancunacta camacaycälälinquim;
alawaśhan Asera mamachantapis,
liträtuncunactapis cañaycälälinquim.b
6 Amcuna Tayta Diosniquipä japächacuśhan malcanmari capäcunqui.
Paymi cay pachäćhu lluy malcacunäpi aclacuśhulanqui cuyay malcan canayquipä.c
7 “Ñatac manamá sumä jatun malca caśhayquipachu Tayta Dios cuyal aclacuśhulanqui.
Aśhwanpa lluypïpis uchuy malcalla caśhayquipamari.d
8 Chaynu lulaycula Tayta Diosninchic cuyalmi;
jinaman awquilluyquicunaman limalicuśhanta lulaycunanpämi.
Chaymi Egiptop mandacünin Faraonpa maquinpi sumä nanay maquinwan uyway capäcuśhayquipïta libraycuśhulanqui.
9 Chayurá Tayta Diosniqui rasunpa Tayta Dios caśhanta,
limalicuśhanta lulaycü caśhantapis lisiycuyꞌari.
Payta cuyal camachicuyninta cäsucul cawsäcunäwanmi lluy-lluy milaynincunawanpis chaynu lulaycun.
10 Ñatac ćhïnicünincunactá tincüninmanmi uycülun.
Mana uchuyllapis alcayculmi jalutacücunäta camacaycülun.e
11 Chaymi cäsucunayquipä nipäcuśhac camachishanta,
willacuśhanta,
yaćhachishanta lulayman ćhulaycälinayqui.
Cäsuculcaptinꞌa Tayta Dios limalicuśhanta lulaycunꞌam
12 “Lluy nishanta uyalicul śhunꞌuyquiman ćhulal,
cäsucul lulayman ćhulaptiquiꞌa Tayta Diosniqui limalicuśhanmannümi,
jinaman llaquipayninwan awquilluyquicunaman limalicuśhantapis lulaycunꞌa.
13 Paymari awquilluyquicunacta limalicuśhan allpäćhu cuyaśhunqui,
allinpä licaycuśhunqui,
milaycachishunquipis chuliquicunacta talpuyniquicunacta,
trïguyquicunacta,
bïnuyquicunacta,
asaytiquicunacta,
wäcayquip uwishniquip wawincunactapis.
14 Lluy malcacunäpïpis mas allinpä licaycuśham capäcunqui.
Amcunaćhu mana wawiyu,
mana chuliyu manamá mayanpis canꞌachu;
uywayquicunaćhüpis manam machüra canꞌachu.
15 Tayta Diosmi imaymana ishyaycunactapis amcunapïta japächaycunꞌa.
Egiptoćhu millachicuy lisishayqui ishyaycunätapis amcunaman manam ćhaycachimunꞌachu.
Aśhwanpam ćhïnicüniquicunacta chay ishyaycunawan ñacachinꞌa.
16 Tayta Diosniqui maquiquiman ćhulaycamuśhan malcacunäta camacaycälälinquim.
Cunca cuchuyniqui mana cananpämi ama llaquipaycälinquichu nïtac taytachancunamanpis uyshuycälinquichu.f
17 “Ichapis tapucunqui:
‘Yaꞌacunapïta mas jatun malca cayalcaptin ¿imanuypatá alapacälälïman?’
nil.
18 Amari manchaculcaychu.
Aśhwanpa Egipto malcäćhu Faraoncäwan Tayta Diosniqui lulaycuśhanta yalpapäcuy.
19 Amcuna ñawiquiwanmi licapäculanqui Tayta Diosniqui sumä lulaycunawan,
milagrucunawan,
siñalcunawan,
nana-nanay maquiwan Egiptopi julumuśhuśhayquita.
Chaynümá Tayta Diosniqui lulaycunꞌa lluy manchaculcäśhayqui malcacunäwanpis.
20 Jinaman Tayta Diosniqui sumä jatun manchachicuy tanracunacta paycunaman caćhaycuptinmi cawsayniyu quïdäcunätapis pacacücunätapis camacaycülunꞌa.
21 Chayurá paycunap puntanćhu cayalcal amam manchaculcanquichu;
quiquin manchacuypa cä munayniyu Tayta Diosniquim amwan cayanꞌa.
22 Paymari nasyuncunäta puntayquipi ashllap-ashllap alapacülunꞌa.
Jucllaćhuꞌa ama camacaycäläliychu,
chucaru uywacuna milälul mana yaycamunanpä.
23 Chay nasyuncunäta quiquin Tayta Diosniqui maquiquiman ćhulaycamulmi sumä-sumäta camacaycülunꞌa.g
24 Mandacünincunactapis maquiquiman ćhulaycamuptinmi jinantin pachäćhu śhutintapis mana mayanpis yalpalcunanpä amcuna chincachipäcunqui.
Manamari mayanllanpis puntayquićhu awantaycunꞌachu camacaycälälinayquicama.
25 Luläśha taytachancunactañatacmi ichá cañaycalälinqui.
Amatacmi taytachancunaman illaywan,
üruwan laꞌaśhacunäta munapapäcunquichu,
nïtac quiquiquipä chalacuycul cunca cuchuyniquita ashicuyalcanquichu.
Chay lulayca Tayta Diosniquipá millachicuymari.
26 Chaynu millachicuypa licaśhacunäta amatac wasiquiman apapäcuychu.
Chaycuna lluymi camacaycüśha canꞌa.
Chayurá camacaycüśha mana capäcunayquipä chaycunacta anla millachicuypäña licapäcuy.