Allinpä licaśha cananpïtam nin
28
“Sïchuśh Tayta Diosniquita uyalicul canan cay camachishäcunacta lulayman ćhulaycuptiquiꞌa quiquin Tayta Diosniquitacmi lluy nasyuncunapïtapis masninmanlä ćhulaycuśhunqui.
2 Chaynu Tayta Diosniquita cäsuculcaptiquiꞌa allinpä licaycuśham capäcunqui:a
3 “Malcayquićhüpis,
ćhaclayquićhüpis allinpä licaycuśham canqui.
4 “Chaynütacmi chuliquicunapis,
cusichayquicunapis,
wäcayquip uwishniquip lluy uywayquip wawincunapis allinpä licaycuśha canꞌa.
5 “Chaynütacmi micuy juntuna canaśhtayqui,
tanta lulana batyayquipis allinpä licaycuśha canꞌa.
6 “Chaynütacmi mayta yaluśhayquićhüpis,
cutiycamuśhayquićhüpis allinpä licaycuśha canqui.
7 “Tayta Diosmi ćhïnicüniquicunactapis maquiquiman ćhulaycamunꞌa.
Chaymi paycuna fïlalla amwan pilyä śhayalcämulpis wicpa caypañatac ayipäcunꞌa.
8 “Chaynütacmi Tayta Diosniqui pilwayquicunactapis,
lluy lulayniquicunactapis allinpä licaycunꞌa.
Paymari uycuśhuśhayqui allpaćhu allinpä licaycuśhunqui.
9 “Sïchuśh Tayta Diosniqui camachishuśhayquicunäta uyalicul cäsucuptiquiꞌa limalicuśhanmannüllam japächäśha cuyay malcan imaypis capäcunqui.
10 Chayćha jinantin lluy malcacunaca Tayta Diospa japächäśhan malca capäcuśhayquita yaćhapäcul manchaculcanꞌa.
11 Awquilluyquicunaman limalicuśhan allpaćhüña cayalcaptiqui Tayta Diosmari milaycachinꞌa chuliquicunactapis,
uywayquicunactapis,
milayniquicunactapis,
cusichayquicunactapis.
12 Amcunacta Tayta Diosmi sumä ćhaniyu cäninta uycapäcuśhunqui.
Chaymi timpunćhu talpuyniquicunapä tamyaycachimunꞌa.
Lluy lulaśhayquicunätamari allinpä licaycunꞌa.
Chaymi amcuna achca malcacunaman mañapäcunqui;
amcunañatacmi ichá mayanpïpis mañacuyta mana ashipäcunquichu.
13 Tayta Diosniqui camachishanta,
yaćhachishanta uyalicul lulayman ćhulapäcuptiquiꞌa paymi punta-puntanninman ćhulaycuśhunqui;
manamá ipa-ipaćhüchu canqui.
Chaynütacmi imaypis altullaćhu caycunqui;
manamá pasaypi palpüśhachu canqui.
14 Chaynu caycunꞌa canan lluy nishäcunapi wicman cayman mana japächacuptiquimá.
Jinaman juc taytachacunacta mana alawapäcuptiqui,
mana sirbipäcuptiquimari.
Mana cäsuculcaptin mana allincuna śhamunanpïmi nin
15 “Ñatac Tayta Diosniqui camachishanta,
yaćhachishanta canan niycälishacta mana cäsuculcaptiquim ichá amcunaman cay mana allincunaca śhamunꞌa:
16 “Malcayquićhüpis ćhaclayquićhüpis mana allinpä licaśham canqui.
17 “Juntunayqui canaśhtayquipis,
tanta lulanayqui batyayquipis mana allinpä licaśham canꞌa.
18 “Chuliquicunapis,
cusichayquicunapis,
wäcayquicunap uwishniquicunap lluy uywayquicunap wawincunapis mana allinpä licaśham canꞌa.
19 “Chaynütac mayta yaluśhayquićhüpis cutiycamuśhayquićhüpis mana allinpä licaśham canqui.
20 “Ñatac lluy mana allin lulayniquicunawan Tayta Diosta caćhaycuśhayquipïtam ñawi imchïcuyllaćhu äśhalayllaman camachishunqui,
pantachishunqui,
lluy imaćhüpis ñacachishunqui.
21 Chaymi duyñuchacunayqui allpäćhu cayalcaptiqui Tayta Dios imaymana ishyaywan lluy camacaycälälishunqui.
22 Chaynütacmi wañuy ishyaycunacta,
juyu calur ishyaycunacta,
sacsapacuycunacta,
jinaman ancha-anchap usyacunacta,
chaqui timpucunacta,
imaymana ishyaycunacta,
ismuycunacta talpuyniquicunamanpis caćhamunꞌa lluy camacapäcunayquicama.
23 “Janay pachäpis brunsinümi licalïlunꞌa;
cay jaluśhayqui pachäpis jïrrunümi licalinꞌa.
24 Tamyacta tamyachimunantá quiquin Tayta Diosmi ućhpactawan pulbullactaña tamyachimunꞌa camacapäcunayquicama.
25 Tayta Diosmari ćhïnicüniquicunap maquinman ćhulaycapäcuśhunqui.
Chaymi amcuna pilyä fïlalla liyalcalpis wicpa caypa ayiculcanqui.
Jinantin malcacunämari jalutaculcäśhunqui.
26 Aychayquicunactañatacmi imaymana ancacunalla,
cay pachäćhu munti uywacunalla micapäcunꞌa;
manamá mayanpis manchaycachïllapis canꞌachu.
27 “Tayta Diosmari imaymana mana jampina ishyaycunawan camacapäcuśhunqui:
chupuwan,
sarnawan,
shïshipacuywanpis.
Jinaman Egipto nunacunäta llillïtay ishyay camacaśhannümi camacapäcuśhunqui.
28 Chaynütacmi Tayta Dios ñacachipäcuśhunqui lücuyaywan,
apla caywan,
muspaywanpis.
29 Chaymi ćhawpi muyunpis aplanüña tantiayllap pulinqui.
Ima lulaśhayquipis manañamá allinchu yaluycuśhunqui.
Muyun-muyun nunacunaca ñacachipäcul suwapäcuśhuptiquipis manamá mayan libraycuśhüniquipis canꞌachu.
30 “Casaracunayquipä limay-masiqui cayaptinpis juc pasachiculmi firsälunꞌa.
Wasicta ishpïchilpis manamá yaćhanquichu.
Übacta lantälulpis manamá wayuyninta micunquichu.
31 Ñawpäniquićhu wäcayquita wañüyächiptinpis aychanta manamá mallilcunquichu.
Aśhnuyquita waycalculpis manamá cutiycachishunquichu.
Uwishniquicunapis ćhïnicüniquip maquinman ćhulaycuśha captin manatacmá libraycüniqui mayanllapis canꞌachu.
32 Walaśh wamla chuliquicunapis juc malcacunap maquinman ćhulaycuśham capäcunꞌa.
Licaycunayquipä wañuy-wañuy ashiyalpis manamá imanaytapis atipapäcunquichu.
33 Talpuyniquicunacta,
cusichayquicunacta mana lisishayqui malcacunam micacälälinꞌa.
Amcunañatacmi muyun-muyun pasaypi mana allincunällaćhu ñacachisha capäcunqui.
34 Caycunacta ñawiquiwan licapäculmari lücuyapäcunqui.
35 Chaynütacmi Tayta Dios unꞌulniquićhu,
caćhpayquićhu,
jinaman ćhaqui paltayquipi uma puntayquicama mana jampina llillïtay ishyaywan camacaycüśhunqui.
36 “Jinaman awquilluyquicunapis mana lisishan malcamanmi amcunactawan ćhulaśhayqui mandäniquita Tayta Diosniqui puśhachishunqui.
Chayćhümi cullupïta,
lumipïta juc taytachacunacta alawapäcunqui.b
37 Tayta Dios puśhachishuśhayqui malcacunäćhümi amcunapïta mana allinta limapäcul pasalichipäcunꞌa,
asiculcanꞌa,
burlaculcanꞌapis.
38 Achcacta talpupäculpis paćhcaśhcunaca talpuyniquita camacaptinmi ashllacta cusichapäcunqui.
39 Übacunacta talpul ama-pacha niyalcaptiquipis culucunaca lluy camacäluptinmi übantapis mana cusichanquichu,
bïnuctapis ni upyapäcunquichu.
40 Jinantin allpayquićhümari ulïbus lantayquicuna cacunꞌa.
Ñatac wayuynincuna palpüluptinmi asaytinwanpis mana llusicunquichu.
41 Walaśh wamla chuliquicunapis caytá canꞌamá.
Ñatac juc lädu malcacunacta apacuptinmi amcunawanñachu manaña capäcunꞌa.
42 Jinantin allpayquićhu lantayquicunacta,
wayuynincunactapis paćhcaśhcunämari camacaycülunꞌa.
43 Malcayquićhu yaćhä juc caśhtacunämi mas-mas munayniyüman licalipäcunꞌa.
Amcunapñatacmi ichá munayniqui masta-masta mirmanꞌa.
44 Paycunañam mañäca capäcunꞌa;
amcunañatacmi mañacüca capäcunqui.
Paycunam punta-puntanninćhu capäcunꞌa;
amcunañatacmi ipa-ipanninćhu capäcunqui.
45 “Tayta Diosniquip camachicuyninta,
yaćhachicuyninta mana cäsuculcäśhayquipam lluy mana allincuna alcansäśhunqui.
Aticaćhayällalmi camacaycüśhunqui.
46 Caycunamari amcunapäwan lluy milayniquicunapä juc siñalnu,
licachipä caycunꞌa.
47 “Imapapis janallanćhu cayal Tayta Diosniquita llapan śhunꞌuyquiwan,
cushicuywan manamá sirbipäculanquichu.
48 Chaymi Tayta Diosniqui ćhïnicüniquicunacta caćhaycämuptin uywayninman muyuchipäcuśhunqui.
Tayta Dios lluy quitälälishuptiquimari pasaypi mana cäniyu cawsapäcunqui,
mana micuyniyu,
mana yacuyu,
mana müdanayu.
Jïrru yüguwan ćhulacuśhactanümi camacapäcunayquicama sirbichipäcuśhunqui.
49 Sïlup sapinćhu cä malcactam Tayta Dios cuntrayqui ćhächimunꞌa.
Paycunam ancanu juc shiwyayllaćhu ćhämunꞌa;
limaynintapis manamá tantiapäcunquichu.
50 Paycunamari pasaypi manchanaśh-cama capäcul yaśhacunätapis mana rispitapäcunꞌachu;
walaśhcunätapis manamá llaquipapäcunꞌachu.
51 Uywayquicunap wawincunactam,
talpuyniquicunactam camacänancama apaculcanꞌa.
Manamá puchuycälinꞌachu trïguyquita,
bïnuyquita,
asaytiquita,
wäcayquip uwishniquip wawicunactapis.
Chaynu lluy apaculcaptinmi pasaypi mana imayüña wañupäcunqui.
52 “Malcayquita cunćhacaycälilmi muyülïniquićhu alcapäcunꞌa sumä-cama,
altucama chalapacuśhayqui murällaca tuninancama.
Tayta Diosniqui uycuśhuśhayqui lluy malcacunäta cunćhacuyculmari wicpa caypa yaycälälimunꞌa.
53 Chay ćhïnicüniquicuna cunćhalayalcämuptin micanayniqui sumä-sumä cacuyaptinmi Tayta Diosniqui uycuśhuśhayqui walaśh wamla chuliquicunacta micuywan camacapäcunqui.
54 Amcunaćhu cuyacü llampu śhunꞌuyücunaca manañamá wawꞌi-caśhanta,
ama-pacha nishan walminta,
quïdä chulincunactapis llaquipanꞌañachu.
55 Jinalmi wañuchisha chulinpa aychanta micuyalpis mana mayanmanpis mallilcachinꞌachu.
Ćhïnicüniquicuna cunćhacaycälishuptiquim imacta micapäcunayquipäpis mana canꞌachu;
chaynüpam paycuna alli-allicta ñacachipäcuśhunqui.
56 Amcunaćhu cuyacü nïñachanu walmica juyumanmá muyunꞌa.
Ćhaquintapis pampäman jaluycuyta mana munäca cuyaśhan wayapanta nïtac wawincunactapis manañamá llaquipanꞌachu.
57 Jinalmi ishyacuśhan wawin micuśhantapis,
chaynütac quiquinpa pärishninc micuśhantapis mana mayanmanpis mallilcachinꞌachu;d
pacallapmari micucülunꞌa.
Ćhïnicüniquicuna cunćhacaycälishuptiquim imacta micunayquipäpis mana canꞌachu;
chaynüpam paycuna alli-allicta ñacachipäcuśhunqui.
58 “Sïchuśh cay librućhu isquirbïsha camachicuycunacta lulayman sumäpa mana ćhulanquichu,
nïtac allinpä licaśha sumä jatun munayniyu Tayta Diosniquita manchacunquichu,
59 quiquin Tayta Diosmi sumä-sumä manchanaśh ñacaycunacta anmanpis milayniquicunamanpis caćhamunꞌa.
Pasaypi mana jampina ishyaycunactapis caćhamunꞌamari.
60 Egiptoćhu manchacuśhayqui lluy mućhuchicuycunaca amcunamanpis ćhämuptinmari jawcayaytapis mana talichipäcuśhunquichu.
61 Chaynütacmi camachicuy isquirbïsha librućhu mana cä ishyaycunacta,
ñacaycunacta camacapäcuśhunayquicama caćhaycamunꞌa.
62 Amcuna Tayta Diosniquita mana cäsuculcäśhayquipïmi uyllurcunänu achca-achca cayalcalpis licachillapäña juc ishcaylla quïdapäcunqui.
63 Maynümi Tayta Dios allinpä licaycul cushisha milaycachishulanqui,
chaynütacmi mana allinpä licaycul pampaman muyulcachil cushisha camacaycüśhunqui.
Canan duyñuchacunayqui allpapïtam sapipi wicapäśha canqui.
64 Tayta Diosmi lluy malcacunaman,
cay pachap manyanpïta juc lädu manyancama chiꞌichishunqui.
Chayćhümi ampis nï awquilluyquicunapis mana lisishan cullupïta lumipïta luläśha taytachacunacta alawapäcunqui.
65 Chay malcacunäćhu manam jawca cayta nï jamaycuyta talinquichu.
Quiquin Tayta Diosmi manchac-manchacllactaña,
wiꞌiy ñawillactaña,
llaquicüśhallactaña cawsachishunqui.
66 Bïdayqui wañuypa patanćhünu captinmi muyunpapis tutapapis manchaśhallaña cayanqui.
Manamá yaćhanquichu wañunayquita ütac cawsanayquitapis.
67 Sumä manchacuytawan ñacayllactaña licalmi wälanpa ninqui:
‘Maylä tutaycülunmanñapis’ nil.
Tutayäluptinñatacmi ninqui:
‘Maylä achicyälunmanñapis’ nil.
68 Ñatac Tayta Dios Egiptoman manaña imaypis cutichishunayquipä limalicuyalpis quiquinmi barcuwan cutichishunqui.
Chay ćhïnicüniquicuna uyway nunactanu lantishunayquipä munachishuptiquipis manamá mayanpis lantiyta munaśhunquiñachu” nil.