Camachicuyca uycuna patacćhu lumiman isquirbisha cananpämi nin
27
Moiseswan Israel caśhtacunap yaśhancunam malcäta nin:
“Canan camachishäcäta cäsuculcay.
2 Tayta Diosniqui uycuśhuśhayqui allpaman yaycunayquipä Jordan mayucta chimpälälil jatućhä-cama lumictam śhaycachinqui.
Chaytam iscuwan pasälunqui.
3 Jinalculmi cay camachicuycunacta chayman isquirbïlunqui.
Caynu lulapäcunqui chimpalcul awquilluyquicunaman Tayta Diosniqui limalicuśhan imaypis tuqui-tuquicta wayuycachï allpaman yaycälälilñamari.
4 Jordan mayucta chimpälulñam chay nishá lumicunäta Ebal ulꞌüman ćhulanqui.
Jinalculmi iscuwan pasälunqui.
5 Chay ulꞌućhümi Tayta Diosniquita alawayniquiwan uycuna patacta lumiwan pilanqui;
jïrruwan mana labraśham lumica canꞌa.
6 Chaynu mana labräśha lumiwan uycuna patacta pilayculmia Tayta Diosniquipä cañaywan chayćhu uycunqui.
7 Chaynütacmi allin cawsaśhanpi cä uycunactapis uycunqui.
Jinalmi Tayta Diosniquipä ñawpäninćhu cushiculcanqui,
micapäcunqui.
8 Chay uycuna patacćhu cä lumicunämanmi cay camachishäcunacta tuqui camalapaśhllacta isquirbiycunqui” nil.b
9 Chaypïtam Moiseswan Levi ayllu sasirdüticunaca jinantin Israel caśhtacunäta nin:
“Israel caśhtacuna upälla,
canan sumäta uyalipämay.
Cananpïtá Tayta Diosniquip malcanmanñam licalïlälinqui.
10 Chayurá canan Tayta Diosniquita uyaliculmi camachishancunacta,
yaćhachishancunacta cäsuculcanqui” nil.
Mana allinpä licaśha cananpïtam nin
11 Chay muyunllatacmi jinantin malcäta Moises nin:
12 “Jordan mayucta chimpäläliptiquiꞌa Gerizim ulꞌumanmi ishpipäcunꞌa:
Simeon,
Levi,
Juda,
Isacar,
Jose,
Benjamin ayllucunäpis.
Chaypïmi cäsuculcaptin allin capäcunanpä niycamunꞌa.c
13 Ebal ulꞌumanñatacmi ishpipäcunꞌa:
Ruben,
Gad,
Aser,
Zabulon,
Dan,
Neftali ayllucunaca.
Chaypïmi mana cäsuculcaptin sumä mana allin capäcunanpä niycamunꞌa.
14 Chaypïtam levitacunaca jinantin malcäta apalcaćhaypa nimunꞌa:
15 ‘Mayanpis cullupïta ütac jïrrupïta taytachacta lulaycul pacallap alawäcá,
mana allinpä licaśha cachun;d
chaytá Tayta Dios millachicunmari’ nil.
Niptinmi malcaca:
‘Chaynu cachun’ nipäcunꞌa.
16 “Mayanpis taytanta ütac mamanta jalutacücá mana allinpä licaśha cachun.e
Niptinmi malcaca:
‘Chaynu cachun’ nipäcunꞌa.
17 “Mayanpis nuna-masinpa culindanta pasaycücá mana allinpä licaśha cachun.f
Niptinmi malcaca:
‘Chaynu cachun’ nipäcunꞌa.
18 “Mayanpis apla nunacta pulishan caminupïta pantachïcá mana allinpä licaśham canꞌa.g
Niptinmi malcaca:
‘Chaynu cachun’ nipäcunꞌa.
19 “Mayanpis malcanćhu yaćhä juc caśhtacta,
ütac japanyäśhacta,
ütac mana taytayu mamayücäta jalutacücá mana allinpä licaśham canꞌa.h
Niptinmi malcaca:
‘Chaynu cachun’ nipäcunꞌa.
20 “Mayanpis papäninpa walminwan puñücá papäninta jalutacüśhanpam mana allinpä licaśha canꞌa.i
Niptinmi malcaca:
‘Chaynu cachun’ nipäcunꞌa.
21 “Mayanpis uywawan puñücá mana allinpä licaśham canꞌa.j
Niptinmi malcaca:
‘Chaynu cachun’ nipäcunꞌa.
22 “Mayanpis taytallapïta ütac mamallapïta cä paninwan puñücá mana allinpä licaśham canꞌa.k
Niptinmi malcaca:
‘Chaynu cachun’ nipäcunꞌa.
23 “Mayanpis suyranwan puñücá mana allinpä licaśham canꞌa.l
Niptinmi malcaca:
‘Chaynu cachun’ nipäcunꞌa.
24 “Mayanpis nuna-masinta unꞌaypi pacallap wañuchïcá mana allinpä licaśham canꞌa.m
Niptinmi malcaca:
‘Chaynu cachun’ nipäcunꞌa.
25 “Mayanpis mana juchayu nunacta wañuchinanpä pägucta ćhasquïcá mana allinpä licaśham canꞌa.
Niptinmi malcaca:
‘Chaynu cachun’ nipäcunꞌa.
26 “Mayanpis cay camachicuycunacta mana cäsucücá,
lulayman mana ćhulaycücá cäraycuśham canꞌa.n
Niptinmi malcaca:
‘Chaynu cachun’ nipäcunꞌa.