Ćhuncapïta jucta-cama japächaycälinanpämi nin
26
“Tayta Diosniqui uycuśhuśhayqui allpaman yaycälälil duyñuchacälälilñam,
2 Tayta Diosniqui uycuśhuśhayqui talpuyniquipi wamä cusichayquita japächaycälinqui.
Chaytam Tayta Diosniqui yaćhananpä aclaśhan sityuman canaśhtawan apapäcunqui.a
3 Chayćhu sirbï sasirdütïtam ninqui:
‘Tayta Diosniqui awquillücunaman limalicuśhan allpäman yaycüśhaña caśhätam canan niycú’ nil.
4 Chaynu uycuptiquim sasirdütica maquiquipï canaśhtäta ćhasquiycul Tayta Diosniquita uycuna patacpa puntanman ćhulaycunꞌa.
5 Chayćhümi Tayta Diosniquiman canaśhtäta uycüca ninꞌa:
‘Pulicü Aram caśhta capäculmi awquillücuna Egiptoman lipäcula.
Chayman ashllaylla yaycuyalcalpis unaypïtá jatu-jatun nasyunmanñam,
achca-achca,
sumäcamañam milälälila.
6 Ñatac Egipto nunacunaca usuchipämäla,
ñacachipämäla,
mana atipana lulaycunactamari lulachipämäla.
7 Chayćhümi awquillücunap Tayta Diosninta mañaculcälá.
Jinaptïmi pay uyalïcälimäla ñacapäcuśhätapis,
usuchisha capäcuśhätapis,
mana atipana lulaycunacta lulaycuśhätapis licaycapämäla.
8 Chaymi Egiptopïta Tayta Diosninchic julaycamälanchic sumä munayninwan,
äśhalayllaman camanacunawan,
imaymana jatun milagrucunawanpis.
9 Jinalculmi cay imaypis tuqui-tuquicta wayuycachï allpaman puśhaycamälanchic.
10 Chaymi Tayta Diosniqui uycamäśhan allpap wamä wayuyninta apaycamú’ nil.
“Jinalculmi Tayta Diosniquipa puntanman canaśhtäta ćhulaycul ñawquinćhu unꞌulacuycunqui.
11 Chaypïta Tayta Diosniqui lluy aylluntinta allin uycuśhuśhayquicunäpïtam cushiculcanqui.
Amcunawan cuscatacmi levitacunäpis,
amcunaćhu yaćha juc caśhtacunäpis cushiculcanꞌa.
12 “Quimsa watapïta-camamari lluy talpuyniquipi ćhuncapïta jucta-cama japächanqui.
Chaytam malcayquićhu cä sasirdüticunäman,
malcayquićhu yaćha juc caśhtacunäman,
mana taytayu mamayücunäman,
japanyäśhacunäman maćhaycälinancama uycälinqui.b
13 “Chayćhümi Tayta Diosniquita nipäcunqui:
‘Cusichäpïta ćhuncapi jucta-cama japächaśhäcunäta uycülüñam levitacunäman,
malcäćhu yaćhä juc caśhtacunäman,
mana taytayu mamayücunäman,
japanyäśhacunämanpis.
Camachipämäśhayquimannüllam lulaycälí;
manamá jucllantapis unꞌaycäliychu.
14 Cay japächaśhäcunäta manamari miculächu:
ima llaquićhu cayalpis,
nïtac anlapä licaśha cayalpis chalayculächu,
nïtac wañücunämanpis uyculäpischu.
Tayta Diosllay,
lluy nimäśhayquitamari lulayculá,
cäsuculá.
15 Janay pacha chuya yaćhaśhayquipïta allinpä licaycuy,
Israel malcayquita,
imaypis tuqui-tuquicta wayuycachï allpa uycunayquipä awquillücunacta limalicuśhayqui allpactapis’ nil.
Camachicuyninmannu lulaycälinanpämi nin
16 “Tayta Diosniquim canan camachishunqui cay camachicuycunacta,
yaćhachicuycunacta cäsuculcänayquipä.
Caycunamanꞌari llapan śhunꞌuyquita,
pinsayniquita ćhulaycuy.
17 “Cananmi Tayta Diosllayqui caśhanta niycunqui.
Jinaman limalicunquim paypa munaśhanmannu cawsaycul nishanta,
camachishanta,
yaćhachishanta uyalicul lulaycunayquipä.
18 Tayta Diosñatacmi canan niycuśhunqui limalicuśhanmannu malcan caśhayquita,
payllapäña caśhayquitapis.
Chayurá lluy nishuśhayquitam cäsuculcänayqui.c
19 Lluy malca śhalcachishancunapïtapis amcuna alli-cama,
lisisha-cama,
alawaycuśha capäcunayquipämi ćhulaycuśhunqui.
Quiquin Tayta Diosniqui nishanmannümi payllapä japächäśha malcan capäcunqui” nil.