25
“Mayanpis quijanaculꞌa fiscämanmi lipäcunqui.
Paycunam tuquicta licaycälil mana juchayu cäcäta libricta caćhaycunꞌa,
juchayu cäcätañatac mućhuycachinꞌa.
2 Sïchuśh juchayüca lawćhana captinꞌa fiscämi pampäman pilataycachil juchanman tincüta puntanćhu lawćhaycachinꞌa.
3 Ñatac tawa ćhunca (40) maquipi mastá amam asutinquichu;a
yanꞌalmi anchap asutiwanꞌa amcunap ñawquiquićhu pinꞌay canman.
4 “Ïra jalü uywacta jaluśhancama amam jaquimanquichu.b
5 “Sïchuśh ishcay wawꞌi-caśha jucllaćhu yaćhayalcaptin jucnin mana chuliyu wañucunꞌa;
chayurá japanyäśha walmi manam juc ayllućhu cä umriwan yapacunmanchu.
Aśhwanpam camachicuycämannu alma wayapanpa wawꞌi-caśhanca casaranꞌa milayninta śhalcachinanpä.
6 Payćhu wamä chulin näsimücätam alma wawꞌi-caśhanpa śhutinta ćhulanꞌa,
Israel caśhtacunäćhu mana chincananpä.c
7 Chay wawꞌi-caśhan japanyäśha walmiwan casaracuyta mana munaptinꞌa malcap puncunćhu cä yaśhacunämanmi linꞌa.
Chayćhümi ninꞌa:
‘Cay Israel caśhtacunäćhu alma wayapäpa śhutinta cuñädú manam śhalcachiyta munanchu.
Yaꞌawan manamari cuscayta munanchu’ nil.
8 Niptinmi malcap yaśhancuna wayapäta ayalcachil tapupäcunꞌa.
Sïchuśh chayćhu:
‘Manam cuscayta munächu’ nil ninꞌa,
9 japanyäśha walmica yaśhacunäpa ñawquinmi cuñädunpa śhucuyninta uśhtiycul,
cäranman tuwaycülunꞌa.
Jinayculmi ninꞌa:
‘Wawꞌi-caśhanpa milayninta śhalcachiyta mana munäcunäwan caynümi lulanchic’ nil.
10 Chay pachapïtam casarayta mana munäcäpis,
lluy aylluncunapis ‘śhucuyninta uśhtichicü ayllu’ nïwan lisisha capäcunꞌa.d
11 “Sïchuśh ishcay wayapa maꞌanacuyalcaptin jucninpa walmin amachayninwan juccäpä luntunta chaläluptinꞌa,
12 chay walmip maquinta cuchülälinquim.
Amam llaquipapäcunquichu.
13-14 “May lanticulcäśhayquićhüpis ütac lantipäcuśhayquićhüpis juc-juc tupucuna luncuwan amam ingañapäcunquichu.
15 Aśhwanpam Tayta Diosniqui uycuśhuśhayqui allpaćhu achca wata allin cawsapäcunayquipä cällanman tincüllanman tupucuyquicuna canꞌa.
16 Chaynu mana allincunawan nuna-masinta ingañacücätá Tayta Diosniqui millachicunmari.e
17 “Yalpapäcuyꞌari Egiptopïta yalälälimul śhayalcämuptiqui Amalec läducuna imacta lulapäcuśhuśhayquitapis.
18 Paycuna Tayta Diosta mana manchaculcalmi piswäśha,
pishipäśha śhayalcämuptiqui ipayquip licalilcamul ipa pulïcunäta camacaycälälishulanqui.
19 Chayurá Tayta Diosniqui uśhuśhayqui allpap muyülïninćhu lluy ćhïnicüniquicunacta maquiquiman ćhulaycamuptinmi Amalec läducunäta wiñaypä chincachipäcunqui.
Yanꞌalätac unꞌälälï imanquiman.f