24
“Mayan umripis walminwanña casaracüśha cayal ima mana allinllactapis walminćhu talïlulꞌa laquinacuy papilta lulanacuyculmi wasinpïta alülunꞌa.a
2 Chay umrip wasinpïta yalülulꞌa mayan umriwanpis casaracunmanmi.
3 Ñatac chay yapacuśhan umripis papilta lulaycanacul wasinpïta alüluptinꞌa ütac wañüluptinꞌa,
4 punta wayapan manam caśhan walmiwan casaracunmanchu.
Chay walmi chuyapä mana licaśhaña caśhanpam Tayta Diospa millachicuyña cayan.
Chaymi cay lulaycunawan Tayta Diosniqui uycuśhuśhayqui allpäta mana allinman ama muyuchïpäcunquichu.
5 “Mayan umripis chaylä casaracüśha cayal gïrraman amam linꞌachu,
nïtac ima lulaycunactapis uycälinquichu.
Aśhwanpa wata intïrum libri caycunꞌa walminwan cusca capäcul cushicuyta talipäcunanpä.
6 “Chaynütac imactapis mañaycul amam aꞌacunta,
malayninta,
tunayninta chalapäcunquichu.
Chaycunacta chalapäcuptiquiꞌa micunanpäpis manamá canꞌachu.
7 “Israel malca-masinta uyway nunapä ütac lanticunanpä suwacuyäta talichicülulꞌa wañuchisham canꞌa.b
Chaynüpam amcunapïta mana allincäta chincachipäcunqui.c
8 “Sïchuśh lipra ishyaywan cayalꞌa Levi ayllu sasirdüticunaca lluy nishancunätam lulapäcunqui.
Paycuna camachishallanmannümi liprayücunäwan lulaycälinqui.d
9 Amcuna Egiptopi yalapämul śhayalcämuptiqui Tayta Diosniqui Mariawane imacta lulaycuśhantapis yalpapäcuyꞌari.f
10 “Malca-masiquita imactapis mañapäculꞌa śhaycachishancäta ütac imantapis wasinpïta ama chalapäcuychu.
11 Aśhwanpa waśhallaćhu alcaycuptiqui śhaycachishancäta quiquin maquinwan uycuśhunqui.
12 Sïchuśh mänunpi chusinta chalaycachishuśhayqui nunaca waccha captinꞌa walantincama ama chalacaycapuychu.
13 Aśhwanpa inti manaläpis jiꞌalpuptinmi cutiycachipunqui tutanpa chaywan puñunanpä.
Chaynüpaćh pay allinpä licaycul sulpäta ucuśhunqui,
jinaman Tayta Diosniquipä munaśhanmannu allincäta lulaycunquipis.g
14 “Chaynütacmi waccha ütac pishipacüśha lulapacücäta ama usuchipäcunquichu,
masqui malca-masiqui captinpis ütac amcunaćhu yaćhä juc caśhta captinpis.
15 Aśhwanpa waccha calmi cawsananpä nisitaptin intica manalä jiꞌalpuśhancama lulapacuśhanpïta muyun-muyun uycunayqui.
Chaynu mana lulaptiquiꞌa Tayta Diosta pay mañacuptinmi juchayüña licalïlälinqui.h
16 “Manamá chulicunäpa juchanpïta taytacunaca wañunmanchu;
nïtac taytacunäpa juchanpïtapis chulicunaca wañupäcunmanchu.
Juchanpïta-camam quiquincuna wañupäcunꞌa.i
17 “Juc lädu caśhtacunätapis,
mana taytayu mamayücunätapis amam jalutacapäcunquichu;
japanyäśha walmip müdanancunactapis amamá chalacuycunquichu.
18 Yalpapäcuyꞌari Egiptoćhu uyway nuna cayalcaptiqui quiquin Tayta Diosniqui juluycapäcuśhuśhayquita.
Chaymari niycälic cällanman lluywan lulaycälinayquipä.j
19 “Sïchuśh cusichayquita lutuyal juc apticta unꞌalulꞌa chayman amaña cutiyaychu.
Aśhwanpa juc caśhtacunäpä,
mana taytayu mamayücunäpä,
japanyäśhacunäpä caćhaycapuy.
Chaymi Tayta Diosniqui ima lulayniquićhüpis allinpä licaycälishunqui.
20 “Ulïbus lantayquita cusichayalpis amaña cutipayaychu.
Quïdäca juc caśhtacunäpä,
mana taytayu-mamayücunäpä,
japanyäśhacunäpäña cachun.