3 “Sïchuśh nishämannu lulapäcuptiquiꞌa,

camachicuynïmannu sumäpa cawsapäcuptiquiꞌa,

4 yaꞌami timpullanćhu tamyacta tamyachimuśhä.

Chaymi ćhaclayquicuna lantayquicuna allinta wayunꞌa.

5 Chayćha üba cusichacama trïguyqui canꞌa;

übayquicunañatac talpuycama canꞌa.

Jinaptinmi maćhaycunayquicama micapäcunqui,

malcayquićhüpis jawca cawsapäcunqui.^c

6 Yaꞌami malcayquita jawcacta caycachishä.

Chaymi mana manchalillal jawca puñupäcunquipis.

Chaynütacmi malcayquipïta juyu uywacunätapis alapacüśhä,

nïtac gïrracunapis canꞌañachu.

7 Chay ćhïnicüniquicunacta amcuna aticaćhalmi ispädawan camacaycälälinqui.

8 Paćhac (100) ćhïnicüniquicunactam pichalla aticaćhälälinqui;

ćhunca walanga (10,000) ćhïnicüniquicunactañatacmi paćhaclla (100) aticaćhälälinqui.

Chaynüpam ćhïnicüniquicunacta ispädawan camacaycälälinqui.

9 Yaꞌamari amcunacta allinpä licaycul achca-achcaman milachipäcuśhayqui.

Jinaman amcunaman limalicuśhätam lulaycuśhä.

10 Chay punta pilwayquicunactalämi micapäcunqui muśhü cusicha ćhämuptinpis.

Chaymi chay punta cusichayquicunacta julunqui muśhücunäta pilwanayquipä.

11 “Yaꞌamari amcunaćhu yaćhaśhä;

manatacmi ipanchapäcuśhayquichu.

12 Amcunap ćhawpiquićhümi pulishä.

Yaꞌamari Tayta Diosniqui caśhä;

amcunañatacmi malcá capäcunqui.^d

13 Yaꞌa Tayta Diosniquim Egiptop maquinpïta julapämulac manaña uyway capäcunayquipä.

Amcunacta chalaläśhüniqui yügucta yaꞌami wicapälá;

jinalmi nuna-nunaycuśhactaña pulichipäculac.

14 “Ñatac mana uyalicul nishäcunacta lulayman mana ćhulaptiquiꞌa,

15 jinaman yaćhachicuynïtawan camachicuynïta juc läduman ćhulaycul lulayman mana ćhulapäcuptiquiꞌa limalicuśhätam jalutacuyalcanqui.

16 Chaynu jalutacücunämanmi juclla licalichimuśhä:

sumä manchacuyta,

wañuy ishyayta,

calur ishyayta,

ñawi ishyayta,

chaynütac illacay ishyaytapis.

Talpuyniquicunactapis yanꞌalmi talpupäcunqui,

ćhïnicüniquicunam micacälälinꞌa.

17 Amcunap cuntrayqui yaꞌa captïmari ćhïnicüniquicuna lluy llallïshunqui.

Paycunap maquinćhu capäculmi manchälälisha mana mayanpis aticaćhayalcäśhuptiqui ayiculcanqui.

18 “Sïchuśh caycunawanpis mana cäsupämanquichu,

chay juchayquipïta anćhish cutim mućhuycachishayqui.

19 Sumä nunatucuyniquitamá pampaman muyüchishä;

sïlucunätam jïrrumannu muyüchishä manaña tamyamunanpä.

Chayćha allpayquicuna brunsinüña licalinꞌa.

20 Chaynu ćhaclayquipis,

lantayquipis manaña wiñaptinmi yanꞌal-yanꞌalpäña callpayquitapis usuchipäcunqui.

21 “Caycunacta pasayalpis mana cäsucalcämal ipanchapämaptiquiꞌa chay juchayquipi anćhish cuti mastalämi mućhuycachishayqui.

22 Chaynütacmi amcunaman juyu uywacunacta caćhaycamuptí chuliquicunacta,

uywayquicunacta camacaycülunꞌa.

Chaynüpa ashllaña licalipäcuptiquim lluy caminuyquicunapis pulumanꞌaña.

23 “Chaycunawanpis mana wanacul jinalla ipanchapämaptiquiꞌa,

24 yaꞌapis amcunacta ipanchalculmi anćhish cuti masta juchayquipi mućhuchipäcuśhayqui.

25 Limalicuśhäta mana cäsupäcuśhayquipïtam gïrraćhu amcuna wañupäcunqui.

Malcacunäman pacacü ayipäcuptiquipis sumä ishyaycunacta amcunaman caćhamuptïmi ćhïnicüniquicunap maquinman palpapäcunqui.

26 “Jinaman mana micunayütam caćhaycuśhayqui.

Micuyca pishi captinmi uchuy jurnullaćhu ćhunca walmicuna tantacta lulapäcunꞌa.

Micanaycäta manam ima micuypis tallpalpachinꞌachu.

27 “Caycunawanpis mana uyaliculcal ipanchayalcämaptiquiꞌa,

28 yaꞌami sumä piñacüśhä.

Chaymi juchayquicunapi anćhish cuti mastalä mućhuycachipäcuśhayqui.

29 Jinaptinmi chuliquicunactaña micapäcunqui.

30 Taytachayquicunap capillantapis tunïshämi,

insinsiu cañacuyquicunactapis paquïshämi,

wañüśha taytachayquicunamanmi wañüniquicunactapis juntuycüśhä.

Amcunacta sumämi millachicuśhayqui.

31 Chay malcayquicunactapis,

carpactapis yaꞌami pasaypi pampaman muyüchishä.

Uycamäśhayquip tuqui mishqui aśhnaynintapis manañam ćhasquishayquiñachu.

32 “Malcayquita pasaypiman muyüchiptïmi chayćhu yaćhananpä śhamü ćhïnicüniquicuna äśhalayllaman camapäcunꞌa.

33 Juc lädu nasyuncunamanmi chiꞌichishayqui.

Ispädawanmi aticaćhächishayquipis.

Chaymi malcayqui pasaypi pulumanꞌa,

wasiquicunapis pampaman muyunꞌa.

34 Allpayquicuna ćhïnicuniquicunap malcanćhu capäcuśhayquicamam pulumäśha jamacunꞌa;

mana jamachishayquipïtamari jamanꞌa.

35 Allpayquićhu yaćhayal mana jamachishayquipïtamari chay pulumäśha watacunäćhu allpayqui jamanꞌa.

36 “Ćhïnicüniquicunap malcanćhu mayanpis cawsayniyu quïdacunäpä śhunꞌunman sumä-sumä manchaytam ćhulaycuśhä:

lapla palpamücällactapis anchap manchalmi ayipäcunꞌa;

ispädawan aticaćhayäśhannümi ayipäcunꞌa,

mana mayanpis aticaćhayäśham cućhpapäcunꞌapis.

37 Masqui mana mayan atiyaptinpis gïrrapi ayïcänu ayiyalcalmi quiquin-pula tupanacapäcunꞌa.

Manamá mayanllayquipis ćhïnicüniquiwan chalanacuyta atipapäcunquichu.

38 Juc nasyuncunaćhümari camacapäcunqui.

Ćhïnicüniquip allpanmá micälälishunqui.

39 Ćhïnicüniquip malcanćhu quïdäcunäñatacmi juchanpïta wañupäcunꞌa;

juchanpïtamari taytancunawan cusca wañupäcunꞌa.

40 “Chaynüpamá taytancunap juchantawan quiquinpa juchancunacta willaculcanꞌa.

Chaynütac ipanchamäśhanta jalutacamäśhantapis willaculcanꞌa.

41 Chaynu capäcuptinmi paycunap cuntran śhalcul ćhïnicünincunap nasyunninman jitaycüśhä.

Chayćhu lumi śhunꞌu cayninpi sumä lawćhaycuśha capäculmi juchanta tantiaculcanꞌa.

42 Jinaptinmi Jacobman,^e

Isaacman,^f

Abrahamman^g limalicuśhäta yalpaśhä,

chaynütac allpäpïpis yalpaśhä.

43 Chay caćhaycapäcuśhayqui allpaca cananćha ichá jamayta taliycunꞌa.

Amcunañatacmi camachicuynïta mana cäsupäcuśhayquipi,

jalutaculcäśhayquipi mućhuchisha capäcunqui.

44 “Masqui chaynu captinpis ćhïnicüniquip malcanćhu cayalcaptiquipis manam unꞌaśhayquichu,

nï millachicuśhayquipischu.

Yaꞌa Tayta Diosniqui calmi limalicuśhäta mana unꞌaycullal nï caćhaycapäcuśhayquichu.

45 Aśhwanpam Tayta Diosnin canäpä lluy malcacunap ñawquin Egiptop maquinpïta julamul paycunacta cuyaynïwan limalicuśhäta yalpaśhä.

Yaꞌamari Tayta Diosniqui cayá” nil.

46 Cay camachicuycunactam,

yaćhachicuycunactam,

limaycunactam Sinai ulꞌüćhu Tayta Dios Moisespacama Israel caśhtacunäpä nila.