Cay libructa Moisesmi isquirbila. Cayćhümi willamanchic tawa paćhac (400) wata Josepa wawꞌi-caśhancuna Egipto lädućhu yaćhapäcuśhanta. Wataca pasaśhan maspam Egiptoćhu juc mandacücunaca Joseta manaña lisipäculañachu. Chaymi Israel läducunäta mana allinpaña licapäcula. Jinalmi Egiptop mandacünin Faraonca uyway nunactanüña lulachipäcula.

Ñatac Israel caśhtacunaca masta-masta milacuyalcaptinmi Faraonca imanaytapis mana atipal, walaśh näsi iñachacunäta wañuchiyta allacuycula. Chaynu cayaptinmi Moises nishan tuquish walaśhcha näsimula.

Cay iñacha Moisesta yacućhu talilculmi mandacücäpa wamla chulin chaypi jululcul ishpichicula. Juc muyunpi malca-masin Israelta yanapayninwan Egipto lädu nunacta wañüchin. Chaymi Egiptopïta Moises ayicula. Israel caśhtacunäpa puydïnin cananpämari Moisesta Tayta Dios ayaycula. Tayta Dios yanapaycuptinmi imaymana milagrucunawan Faraoncäpa maquinpïta Israel malca-masincunacta Moises julaycamula.

Chay Egipto lädupi yalapämulmi Sinai chunyäcäćhu quïdaculcäla.