Limalicuśhan allpaman jinalla chaynu lipäcunanpämi nin
33
Chaypïtam Moisesta Tayta Dios nin:
“Abrahamman,a
Isaacman,b
Jacobmanc limalicuśhá allpaman wayra lipäcuy Egiptopi julamuśhayqui malcayquiwan.
Paycunactamari nilá ‘milayniquicunapämi canꞌa’ nil.
2 Ampa ñawpäniquitam juc anjilta puntaycachishä.
Jinaman alüśhätacmi Canaan,
Amhor,
Het,
Ferez,
Hev,
Jebus läducunätapis.
3 Lipäcuyñari imaypis tuqui-tuquicta wayuycachï allpaman.
Ñatac amcuna pasaypi cullu linli capäcuptiquim amcunawan mana yaꞌa lishächu.
Chaynu cayalcaptiquiꞌa chay lishanchicćhu yanꞌalmi camacaycälälï imacman” nil.
4 Cayta uyalïlulmi malcaca sumä llaquicälälila.
Jinaman aläjancunactapis manañam mayanpis ćhulaculcälachu.
5 Caynu cayalcäla Moisesta Tayta Dios caynu nishanpam:
“Israel caśhtacunaca pasaypi cullu linli-camam capäcun.
Amcunawan uchuyllapis cayculꞌa camacaycälälicmanmi.
Canan-pacha lluy aläjayquicunacta juluculcay.
Chaycunawan imacta lulanätapis yaꞌañam yaćhacú” nil.
6 Chayurá israelcunaca Horebd ulꞌućhu caśhanpïta aläjancunacta manañamá ćhulaculcälachu.
7 Chaypïtam Israel caśhtacunaca yaćhapäcuśhanpa caluscanman carpacta Moises aśhüchila.
Chaytam śhutichäla “Tayta Diosman aśhuycuna carpa” nïwan.
Chaymanmi Tayta Diosta tapuycuyta munalꞌa mayanpis chayman linan cala.
Chay waśha lädućhu cäcämanmari lipäcula.
8 Ñatac chay carpaman Tayta Dioswan limaycü Moises liptinñatacmi israelcunaca chucllanpa puncunćhu licapapäcula yaycuycunancama.
9 Yaycüluptinñatacmi pucutay jiꞌalpamula.
Chay pucutaycämi Tayta Dioswan Moises limaśhancama puncunćhu caycula.
10 Chay pucutayca carpap puncunćhu taycüluptinñatacmi nunacunaca chucllanpa puncunćhu unꞌulacaycälil Tayta Diosta alawaycälila.
11 Ñatac chay carpaman Moises yayculmi amïgunwan limäcänu Tayta Dioswan limala.
Chay limaśhanpïtam jamapäcuśhanman cutimula.
Ñatac Nunpa chulin yanapänin Josuemi carpapïta mana aśhucälilachu.
12 Chaypïtam Tayta Diosta Moises nin:
“Taytay,
tuquicta lisimäśhayquitapis,
allinpä licaycamäśhayquitapis niyämanquimá.
Jinaman cay malcacta puśhaycunäpäpis jicutayämanquimá.
Ñatac mayanwan caćhamänayquitam ichá mana niycamanquichu.
13 Rasunpa allinpä licaycamalꞌa munaśhayquitari tantiaycachillämay anman chalapacunäpä,
jinaman allinpä jinalla licaycamänayquipäpis.
Cay nunacunaca ampa malcayquimari” nil.
14 Niptinmi Tayta Dios:
“Quiquïmi amwan lishä.
Yaꞌami jawcacta caycachishayqui” nin.
15 Niptinmi Moises:
“Quiquiqui yaꞌacunawan mana lilꞌa amari caypi yalupäcunäpä nipämaychu.
16 Yaꞌacunawan mana liptiquiꞌa ¿imanuypam yaꞌapis malcayquipis yaćhaycälishä allinpä licaycälimäśhayquita?
Mana yanapaycälimaptiquiꞌa jinantin pachäćhu cä malcacunänüllaćhari caycälishä” nin.
17 Niptinmi Tayta Dios:
“Allin,
amta tuquicta lisilmi,
allinpä licalmi cay nimäśhayquitapis lulaycuśhä” nin.
18 Niptinmi Moises:
“Ama chaynu callaychu,
sumä cayniquita licaycachillämay” nin.
19 Niptinmi Tayta Dios:
“Licachishayquim maynu sumä allin caśhäta.
Tantiaycachishayquitacmi Tayta Dios caśhätapis.
Mayanwanpis munaśhäwanmi allin śhunꞌuyu caycuśhä.
Llaquipay munaśhätatacmi mayantapis llaquipaycuśhä.
20 Ñatac quiquïpa cärätam ichá mana licamanquimanchu.
Mayan nunapis licamäcá manam cawsanmanñachu” nin.e
21 Nilculmi Tayta Dios nin:
“Cay lädüćhu sityu cayanmi.
Cay jatun wancap jananćhuꞌari śhäcuy.
22 Ñatac sumä cayní pasayaptinmi jatun wancap ućhcunman ćhulaycuśhayqui.
Jinalculmi maquïwan atajaycuśhayqui pasanäcama.
23 Pasälul maquïta julüluptïñam waśhalläta licamanqui.
Cärätañatacmi ichá mana licamanquichu” nil.