Juda nacionpi Rey Abiampa gobiernasqanmanta
15
Nabatpa churin Rey Jeroboam chunka pusaqniyoq watamanña gobiernachkaptinmi Juda nacionpi Abiam gobiernayta qallaykurqa.
2 Abianmi Jerusalen llaqtapi gobiernarqa kimsa wata,
paypa mamanmi karqa Abisalonpa churin Maaca sutiyoq warmi.
3 Abiampas taytanpa ñawpaq tukuy huchallikusqanman hinam kawsarqa.
Yupaychasqan Tayta Diospaqmi hawa sonqollaña karqa,
paypa sonqonqa manañam abuelon Davidpa sonqon hinachu karqa.
4 Ichaqa Davidpa yupaychasqan Tayta Diosmi paypa mirayninta Jerusalen llaqtapi achkiyta hina churarqa chaynapi Davidpa rantinpi rey kananpaq chaynataq Jerusalen llaqtapas hinalla kananpaq.
5 Davidqa tukuy tiempom Tayta Diospa llapa kamachisqanmanta mana rakikuspa munasqanman hina kawsarqa,
huchallikuspaqa-huchallikururqa Uriaspa asuntollanpim.
6 Jeroboanwan Roboampa guerrallapi kasqankuqa hinallam karqa Abiam kawsanankamapas.
7 Abiampa wakin rurasqankunaqa chaynataq tukuy ima rurasqankunaqa Juda nacion reykunapa vidanmanta willakuq libropim qellqasqa kachkan.
Abianwan Jeroboampas guerrallapimá karqaku.
8 Abuelonkuna hina Abiam wañuruptinmi “Davidpa Llaqtan” sutiyoq barriopi pamparurqaku,
paypa rantinpim gobiernarqa churin Asa.
Juda nacionpi rey Asapa gobiernasqanmanta
9 Israel nacionpi rey Jeroboam iskay chunka watamanña gobiernachkaptinmi Juda nacionpi Asa gobiernayta qallaykurqa.
10 Rey Asam Jerusalen llaqtapi gobiernarqa tawa chunka hukniyoq wata,
paypa abuelanmi karqa Abisalonpa churin Maaca sutiyoq warmi
11 Rey Asam abuelon David hina Tayta Diospa munasqanman hina rurarqa.
12 Nacionmantam mariconkunata wischurqa,
chinkarachirqataqmi abuelonkunapa rurachisqan taytacha-mamachakunatapas.
13 Abuelan Maacatapas reina kayninmantam horqorurqa Asera sutiyoq mamachata rurachisqanrayku,
abuelanpa rurachisqan mamachata kuchuruspanmi Cedron wayqopi kañarurqa.
14 Ichaqa moqokunapi capillakunataqa manam chinkachirqachu,
chaywanpas Asapa sonqonqa Tayta Diosllapaqmi karqa wañukunankama.
15 Taytanpa hinaspa kikinpa sapaqchasqan ofrendakunatapas Tayta Diospa templonmanmi churarqa,
churarqamá qori-qollqetapas chaynataq serviciokunatapas.
Rey Ben-adadwan rey Asapa contrato rurasqanmanta
16 Israel nacionpa reynin Baasawanmi Rey Asa guerrapi karqa tukuy tiempo.
17 Israel nacionpa reynin Baasam Juda nacionpa contranpi peleaq rispan Rama llaqtata aswanraq allicharachirqa,
chaynataqa rurarqa Juda nacion reypa kasqanmanta mana lloqsimunankupaqmi hinaspa mana yaykunankupaqmi.
18 Rey Asam horqomurqa Tayta Diospa templonpi puchuq qori-qollqetawan reypa palacionpi kaq tukuy imakunata hinaspam huk kaqnin serviqninman qoykuspa apachirqa Aram nacionpa reynin Ben-adadman.
Payqa karqa Hezionpa willkanmi otaq Tabrimonpa churinmi.
Ben-adadqa yacharqa Damasco llaqtapim.
Paytam Rey Asa kaynata nichimurqa:
19 —Qampa taytaykiwan ñoqapa taytay contrato rurasqankuta hinayá ñoqanchikpas contratota rurasunchik,
qori-qollqe regalotam apachimuchkayki Israel nacionpa reynin Baasawan contrato rurasqaykita tukunaykipaq chaynapi ñoqamanta anchurikunanpaq —nispa.
20 Rey Ben-adadmi Rey Asapa nisqanta kasukuspan tropankunapa kamachiqninkunata kacharqa Israel nacionpi llaqtakunata atacamunankupaq,
paykunam vencerurqaku Ijon llaqtata,
Dan llaqtata hinaspa Abel-bet-maaca llaqtatapas,
vencerurqakutaqmi Cineret lawpi llapallan llaqtakunatapas chaynataq Neftaliy allpapi llapallan llaqtakunatapas.
21 Rey Baasa chayta yacharuspanmi Rama llaqta allichachisqanta saqeruspa Tirsa llaqtamanña kutikurqa.
22 Juda nacionpi lliw runakunata Rey Asa huñurachispanmi Rama llaqtapi Rey Baasapa hatarichisqan rumikunatawan kaspikunata aparachirqa,
chaykunawanmi Benjamin lawpi Geba llaqtatawan Mizpa llaqtata aswanraq hatarirachirqa.
Rey Asapa wañukusqanmanta
23 Rey Asapa wakin rurasqankunaqa chaynataq mana manchakuspa lliw rurasqankunaqa chaynataq llaqtakunatapas aswan mastaraq hatarichisqanqa Juda nacion reykunapa vidanmanta willakuq libropim qellqasqa kachkan.
Ichaqa machuyayninpim onqorurqa chakinwan.
24 Abuelonkuna hina Rey Asa wañuruptinmi abuelon “Davidpa Llaqtan” sutiyoq barriopi otaq abuelonkunapa kasqanpi pamparurqaku,
paypa rantinpim churin Josafat gobiernarqa.
Israel nacionpi rey Nadabpa gobiernasqanmanta
25 Juda nacionpi iskay watamanña Rey Asa gobiernachkaptinmi Israel nacionpi gobiernayta qallaykurqa Jeroboampa churin Nadab,
iskay watam Israel nacionpi gobiernarqa.
26 Tayta Diospa qayllanpim Rey Nadabqa taytan hina mana allinta rurarqa hinaspam taytan hinataq Israel nacionpi runakunatapas huchallichirqa.
27 Rey Nadabpa contranpim hoqarikururqa Isacar castamanta kaq Ahiaspa churin Baasa,
paymi Filistea nacion Gibeton llaqta lawpi Rey Nadabta wañurachirqa.
Rey Nadabtaqa wañurachirqa Israel llapallan runakunapiwan chay Gebeton llaqtata muyuruspa atacachkaptinkum.
28 Juda nacionpi Rey Asa kimsa watamanña gobiernachkaptinmi Rey Nadabtaqa Baasa wañurachirqa hinaspam paypa rantinpi kikinña gobiernarqa.
29 Rey Baasaqa gobiernayta qallaykuspallaraqmi Rey Jeroboampa llapallan castanta wañurachirqa,
manam puchuchirqachu chullallatapas.
Silo llaqtayoq serviqnin Ahiaswan Tayta Diospa nisqanman hinam lliwta tukururqa.
30 Chaynataqa rurarqa Jeroboampa tukuy huchankunaraykum chaynataq Israel nacionpi runakunatapas huchallichisqanraykum,
chaykunawanmi Israelpa yupaychasqan Tayta Diosta piñachirqa.
31 Nadabpa wakin rurasqankunaqa Israel nacion reykunapa vidanmanta willakuq libropim qellqasqa kachkan.
32 Israel nacionpa reynin Baasam Rey Asawan guerrallapi karqaku tukuy tiempo kawsanankukama.
Israel nacionpi rey Baasapa gobiernasqanmanta
33 Juda nacionpi kimsa watamanña Rey Asa gobiernachkaptinmi Tirsa llaqtapi Ahiaspa churin Baasa gobiernayta qallaykurqa,
iskay chunka tawayoq watam gobiernarqa lliw Israel nacionpi.
34 Rey Baasapas Tayta Diospa qayllanpim mana allinkunata rurarqa,
paypas Israel nacionpi runakunata huchallichiq Rey Jeroboam hinam huchallikurqa.