—Rey Asapiwan Juda casta runakuna hinaspa Benjamin casta runakuna,

qamkunaqa llapallaykichikyá uyariwaychik:

Tayta Diosmi yanapasunkichik payta qatiptikichikqa,

maskaspaykichikqa tarinkichikmi,

qepanchakuptikichikmi ichaqa paypas qepanchakurusunkichiktaq.

3 Unay tiempom Israel castakunaqa mana cheqap Diosniyoq,

mana sacerdoteyoq hinaspa Diosmanta mana yachachisqa karqaku.

4 Paykunaqa sasachakuyninkupi kaspañam Israelpa yupaychasqan Tayta Diosman kutirikuspa maskarqaku hinaspam payta tarirqaku.

5 Chay tiempokunapiqa manam pipaqpas karqachu hawkayay aswanqa chaqwallañam karqa llapallan nacionkunapi kaqkunapaq.

6 Huk nacionmi purmachiq huk nacionta chaynataqmi huk llaqtapas purmachiq huk llaqtata,

Diosmi chaqwarqa tukuy rikchaq sasachakuykunawan.

7 Aswanqa kallpanchakuspayá ama hukmanyaychikchu,

pagoykichiktaqa chaskinkichikmi llamkasqaykichikmanta —nispa.

8 Diosmanta willakuqpa nisqanta Asa uyariykuspanmi kallpanchakururqa hinaspam tuñirachirqa millakuypaq taytachakunata otaq Juda lawpipas hinaspa Benjamin lawpipas taytachakunata.

Tuñirachirqataqmi Efrain law orqokunapi taytachakunatapas chaynataq dueñochakusqan llaqtakunapi taytachakunatapas.

Allichachirqataqmi Tayta Diospa templon corredorpa ñawpaqninpi kaq altartapas.

9 Huñururqam llapallan Juda castakunatawan Benjamin castakunata,

huñururqataqmi Efrain castamanta,

Manases castamanta hinaspa Simeon castamanta riq chaypi kaqkunatapas.

Achkaqmi Israel nacionmanta pasakurqaku Rey Asaman,

paymanqa pasakurqaku yupaychasqan Tayta Dios yanapasqanta qawaykuspankum.

10 Paykunaqa huñunakururqaku Jerusalen llaqtapi chunka pichqayoq watanpa kimsa killanmanña Rey Asa gobiernachkaptinmi.

11 Chay punchawpim Tayta Diospaq wañuchipurqa guerrapi peleaspa qechumusqanku qanchis pachak bueyeskunatawan qanchis waranqa ovejakunata.

12 Abuelonkupa yupaychasqan Tayta Diosta tukuy sonqonkuwan hinaspa tukuy vidankuwan maskanankupaqmi prometekurqaku.

13 Prometekurqakutaqmi Israelpa yupaychasqan Tayta Dios mana maskaqtaqa hatuntapas-taksatapas,

qaritapas-warmitapas wañuchinankupaq.

14 Tayta Diosmanmi hatu-hatun qapariywan juramentarqaku,

chaynataqa rurarqaku cornetillakunatawan cornetakunata tocachkaptinkum.

15 Juda nacionpi llapallan kaqkunañataqmi kusikurqaku jurasqankuwan,

paykunaqa tukuy sonqonkumantam jurarqaku.

Tukuy voluntadwan maskaspankum Tayta Diosta tarirqaku chaynapim pay qorqa hawkayayta tukuy hinastinpi.

16 Rey Asaqa abuelan Maacatapas reina kayninmantam horqorurqa Asera sutiyoq mamachata rurachisqanrayku,

abuelanpa rurachisqan mamachata kuchuruspanmi ñuturachirqa hinaspam kañarurqa Cedron wayqopi.

17 Ichaqa Israel casta runakunapa kasqan moqokunapi capillakunataqa manam chinkachirqachu,

chaywanpas Asaqa allin sonqoyoqmi karqa wañukunankama.

18 Taytanpa hinaspa kikinpa sapaqchasqan ofrendakunatapas Diospa templonmanmi churarqa,

churarqamá qori-qollqetapas chaynataq serviciokunatapas.

19 Rey Asapa kimsa chunka pichqayoq wata gobiernasqan tiempopiqa manam guerra karqachu.