2 Rey Asam allinta rurarqa yupaychasqan Tayta Diospa munasqanman hina.

3 Tuñirachirqam huklaw nacionniyoq runakunapa taytachankupa altarninkunatapas chaynataq moqokunapi kaq capillakunatapas.

Adorananku rumi pilarkunatapas pakiparuspam qorururqataq Asera sutiyoq mamachakunatapas.

4 Juda nacionniyoq runakunatapas kamachirqataqmi abuelonkupa yupaychasqan Tayta Diosta maskaspa yachachikuyninkunatapas hinaspa kamachisqankunatapas kasukunankupaq.

5 Tuñirachirqam Juda nacion llaqtakunapa moqonkunapi kaq capillakunatapas chaynataq incienso kañana altarkunatapas.

Pay gobiernanankamaqa nacionmi hawkalla karqa.

6 Rurachirqam Juda nacionpi murallasqa llaqtakunata nacion hawkalla kasqanrayku,

paypa tiemponpiqa manam ima guerrapas karqachu,

Tayta Diosmi hawkayayta qorqa.

7 Juda nacionniyoq runakunatam nirqa:

—Kay llaqtakunata allichaspayá muyuriqninpipas rurasunchiktaq murallata,

torrekunata hinaspa cerrojoyoq punkukunata.

Kay nacionqa ñoqanchikpañam yupaychasqanchik Tayta Diosta maskasqanchikrayku.

Payta maskaptinchikmi qoykuwanchik kay nacionninchikpi hawkayayta —nispa.

Chay llaqtakunata allinta allichaspamá qespirachirqaku.

8 Rey Asapam karqa Juda castamanta kimsa pachak waranqa soldadonkuna,

paykunam karqaku hatun harkachikuna armayoqkama hinaspa lanzayoqkama,

Benjamin castamantañataqmi karqa iskay pachak pusaq chunkan waranqa soldadonkuna,

paykunaqa karqaku taksa harkachikuna armayoqkamam hinaspa flechayoqkamam,

llapallankum valeroso soldadokuna karqaku.

9 Paykunapa contranpim peleaq hamurqa Cus nacionniyoq Zera sutiyoq runa,

payqa hamurqa waranqantin-waranqantin soldadoyoqmi chaynataq guerrapaq kimsa pachak carretayoqmi,

paykunaqa chayaramurqaku Maresa sutiyoq llaqtamanmá.

10 Paypa contranpi Rey Asa lloqsispanmi peleananpaq churakururqa Maresa llaqta law Sefata Qechwapi.

11 Rey Asam yupaychasqan Tayta Diosta mañakurqa kaynata:

—Dios Taytalláy,

qamllam kanki kallpasapakunapa contranpi mana kallpayoqkunata yanapaykuqqa.

Yupaychasqayku Dios Taytalláy,

yanapaykullawaykuyá,

qanmanmi hapipakamuykiku,

qampa sutikipim hamuniku kay achka-achka soldadokunapa contranpi.

Dios Taytalláy,

qanmi Diosniykuqa kanki,

amayá qamqa piwanpas vencechikuychu —nispa.

12 Tayta Diosmi Cus nacionniyoq runakunata vencerurqa Asapa hinaspa Juda runakunapa qayllanpi chaymi Cus nacionniyoq runakunaqa ayqekurqaku.

13 Rey Asañataqmi soldadonkunapiwan qatirqaku Gerar llaqtakama chaymi Cus nacionniyoq runakuna wañururqa mana hukllapas kawsanankama.

Tayta Diospa qayllanpi hinaspa paypa soldadonkunapa qayllanpimá chinkarurqaku chaymi achka-achkasuta llapa imankutapas apakurqaku.

14 Chaymantañataqmi atacarurqaku Gerar llaqtapa muyuriqninpi llapallan llaqtakunata,

Tayta Diospa rurasqanwanmi chaykunapi yachaqkuna mancharikururqaku,

Juda runakunam saquearurqaku llapallan llaqtakunata chaypi achkallaña llapa imakuna kasqanrayku.

15 Hatuskunapi animalniyoqkunatapas atacaspankum hapikururqaku achkallaña ovejakunatawan camellokunata hinaspam kutikurqaku Jerusalen llaqtaman.