Guerrapim karqaku Abianwan Jeroboamqa.

3 Abianmi qallaykurqa guerrapi peleayta tawa pachak waranqa akllasqa valeroso soldadonkunawan,

Jeroboampas Abianwan peleananpaqmi alistarqa pusaq pachak waranqa akllasqa valeroso soldadokunata.

4 Abianmi Efrain law orqokunapi Zemaraim Moqoman riruspa chaypi sayaykuspa qayakurqa:

—Jeroboanwan Israel nacionniyoq lliw runakuna uyariwaychik.

5 ¿Manachu yacharqankichik Israelpa yupaychasqan Tayta Diosqa Davidmanwan mirayninkunaman Israelpi wiña-wiñaypaq gobierno qosqanta?

¿Manachu contratota rurarqa paykunalla gobiernanankupaq?

6 Aswanqa Nabatpa churin Jeroboanmi Davidpa churin Salomonpa contranpi hoqarikururqa.

Jeroboamqa karqa Rey Salomonpa serviqninmi.

7 Jeroboanmanmi huñunakururqa mana allinpi puriq qella runakuna,

paykunam Salomonpa churin Roboampa contranpi hoqarikururqaku,

chaynataqa rurarqaku Roboam mozollaraq kaspa iskayrayasqanraykum chaynataq mana imayna defiendekuyta atisqanraykum.

8 Kunanñataqmi Tayta Diospa gobiernonpa contranpi churakuyta munankichik chay gobiernoqa Davidpa mirayninkunapa kachkaptinpas.

Chaytaqa rurachkankichik achkallaña kasqaykichikraykum chaynataq diosnikichik kananpaq Jeroboampa qorimanta rurachisqan malta torokuna qamkunawan kasqanraykum.

9 Qamkunaqa qarqorurqankichikmi Tayta Diospa churasqan Aaronpa miraynin sacerdotekunatapas chaynataq Leviy casta runakunatapas.

Huklaw runakunapa rurasqanman hinataqmi sacerdotekunatapas churarurqankichik.

Pipas malta torotawan qanchis carnerokunata apamuspa sacerdote kayta munaptinqa taytacha-mamachakunapa sacerdotenña kananpaqmi churaq kankichik.

10 Ñoqaykupa yupaychasqaykuqa Tayta Diosmi,

paytaqa manam saqerqanikuchu.

Tayta Diospa serviqnin sacerdotekunapas kachkan Aaronpa mirayninkunam,

yanapaqninkunapas kachkan Leviypa castankunam.

11 Paykunam sapa tempranon hinaspa sapa tarden Tayta Diospaq kañanku lliw kañanapaq kaq wañuchisqa animalkunatawan miski asnaq inciensokunata.

Churankutaqmi qori-puro mesapi tantakunatapas,

sapa tardentaqmi ratachiqku qorimanta candeleropi mecherokunatapas.

Ñoqaykuqa ruraniku yupaychasqayku Tayta Diospaq ruraykunatam,

qamkunam ichaqa Tayta Diostaqa qepanchakurunkichikña.

12 Kaypim ñoqaykuwan kachkan Diosniykuqa jefeyku hina,

kaypitaqmi kachkan cornetilla tocaq sacerdotekunapas qamkunapa contraykichikpi cornetillankuta tocanankupaq.

Yaw Israelpa mirayninkuna,

amayá peleaychikchu abueloykichikpa yupaychasqan Tayta Diospa contranpiqa,

manam pay venceytaqa atiwaqchikchu —nispa.

13 Jeroboanmi kamarachirqa wakin soldadonkunata chaynapi Juda casta soldadokunata qepanmanta atacamunankupaq,

Jeroboampa wakin soldadonkunam Juda runakunapa qepanpiña kachkarqaku.

14 Chaymi Juda runakuna qepanta qawariykuspa cuentata qokururqaku ñawpaqninmantawan qepanmanta soldadokuna atacamusqanta chaymi Tayta Diosta mañakurqaku,

sacerdotekunañataqmi tocarqaku cornetillankuta.

15 Chaymi Juda runakuna qapariptinku Jeroboamtawan Israel nacionniyoq llapallan runakunata Dios vencerurqa,

chaynataqa rurarurqa Rey Abiampa hinaspa Juda runakunapa qayllanpim.

16 Hinaptinmi Israel nacionniyoq soldadokuna ayqekurqaku Juda runakunapa qayllanmanta.

Chaynatam Dios qoykurqa paykunaman.

17 Rey Abianmi soldadonkunapiwan wañurachirqaku Israel nacionniyoq achka-achka runakunata,

chaypi wichiq runakunam karqa pichqa pachak waranqa akllasqa runakuna.

18 Chaynapimá chay tiempopiqa humillasqa karqaku Israel nacionniyoq runakuna,

Juda nacionniyoq runakunam ichaqa kallpanchasqa karqaku abuelonkupa yupaychasqan Tayta Diosman hapipakusqankurayku.

19 Rey Abianmi qatirqa Jeroboamta hinaspam dueñochakururqa Betel llaqtata,

Jesana llaqtata hinaspa Efrain llaqtata llaqtachantintakama.

20 Abiampa kawsasqan tiempokunapiqa manañam Jeroboamqa atiyniyoqñachu karqa.

Tayta Dios onqoyta qoykuptinmi wañururqa.

21 Abianmi aswan mas atiyniyoq rikurirurqa.

Payqa casarakururqa chunka tawayoq warmikunawanmi,

paykunapim karqa iskay chunka iskayniyoq qari churinkuna,

karqataqmi chunka soqtayoq warmi churinkunapas.

22 Rey Abiampa wakin rurasqankunapiwan rimasqankunaqa Diosmanta willakuq Iddopa qellqasqan libropim kachkan.