Juda nacionta Rey Sisac atacasqanmanta
12
Rey Roboanmi gobiernonta takyarachispan alli-allinta kallpanchakururqa hinaspam Tayta Diospa yachachikuynintapas qepanchakururqa,
qepanchakururqataqmi Israel casta runakunapas.
2 Tayta Diosta traicionaruspa Roboam pichqa watamanña gobiernachkaptinmi Egipto nacionpi Rey Sisac hamurqa guerrawan hinaspam Jerusalen llaqtata atacarurqa.
3 Atacarqamá waranqa iskay pachaknin carretakunawan,
soqta chunka waranqa silladakunawan hinaspa Egipto lawmanta hamuq mana yupay atina runakunawan,
chay runakunam karqa Libia runakuna,
Suqui runakuna hinaspa Cus runakuna.
4 Paykunam dueñochakururqa Juda lawpi murallasqa llaqtakunata hinaspam Jerusalen llaqtakama chayarurqaku.
5 Roboanwan Juda nacionpi jefekuna Rey Sisacpa hichpamusqanta yacharuspa Jerusalen llaqtapi huñunasqa kachkaptinkum,
Diosmanta willakuq Semaias paykunaman hamururqa hinaspam Tayta Diospa nisqanta kaynata nirqa:
—Saqeruwasqaykichikman hinam ñoqapas saqerusqaykichik Rey Sisacpa makinpi —nispa.
6 Israel casta jefekunawan Rey Roboamñataqmi humillakuspa nirqaku:
—Allinpunim Tayta Diospa kay rurasqanqa —nispa.
7 Chay humillakusqankuta Tayta Dios qawaykuspanmi Semaiasta nirqa:
—Humillakusqankuraykum manaña chinkachisaqchu aswanqa kunallanmi librasaq.
Sisacnintakamaqa manañam kacharisaqñachu piñakuyniytaqa Jerusalen llaqtapa contranpiqa.
8 Ichaqa Sisactam servinqaku imaynam serviwayta yachanankupaq hinaspa imaynam huklaw nacionniyoq rey serviyqa kasqanta yachanankupaq.
9 Jerusalen llaqtata Egipto nacionpa reynin Sisac atacaspanmi hapikuykurqa Tayta Diospa templonpi tukuy imakunata chaynataq reypa palacionpi tukuy imakunatapas.
Lliwta qechuruspanmi Salomonpa qorimanta rurachisqan harkachikuna armakunatapas apakurqa.
10 Chaykunapa rantinpim Rey Roboam rurachirqa broncemantaña harkachikuna armakunata hinaspam waqaychaqnin soldadokunapa jefenman qoykurqa reypa palacionpa punkunpi waqaychanankupaq.
11 Tayta Diospa templonman sapa kuti rey yaykuptinmi waqaychaqnin soldadokuna chay harkachikuna armata apaqku hinaspam kasqallan kutichimuqku chay soldadokunapa cuartonman.
12 Chaynata Rey Roboam humillakuykuptinmi Tayta Diospa piñakuynin tanirurqa paymanta,
manamá lliwtachu chinkarachirqa.
13 Rey Roboam kallpanchakuruspanmi Jerusalen llaqtapi hinalla gobiernarqa.
Payqa tawa chunka hukniyoq watanpim gobiernayta qallaykurqa.
Chunka qanchisniyoq watam gobiernarqa Jerusalen llaqtapi.
Jerusalen llaqtatamá Israel llapallan ayllukunamanta Tayta Dios akllakurqa sutin chaypi reqsisqa kananpaq.
Roboampa mamanmi karqa Amon nacionniyoq Naama.
14 Roboanmi Tayta Diosta tukuy sonqonwan mana maskayta munaspan mana allinta rurarqa.
15 Qallariyninmanta tukuyninkama Roboampa wakin rurasqankunaqa kachkan Diosmanta willakuq Semaiaspa qellqasqan libropim chaynataq Diosmanta willakuq Iddopa libronpim otaq ayllukunamanta rimaq paypa listanpim.
16 Jeroboanwan Roboamqa guerrallapim tukuy tiempo karqaku.
Abuelonkuna hina Roboam wañuruptinmi pamparurqaku “Davidpa Llaqtan” sutiyoq barriopi.
Mamanmi karqa Amon nacionniyoq Naama,
Roboampa rantinpim gobiernarqa churin Abiam.