11
Rey Roboanmi Jerusalen llaqtaman chayaramuspan huñururqa Juda ayllumanta hinaspa Benjamin ayllumanta guerrapaq akllasqa pachak pusaq chunkan waranqa soldadokunata,
chaynataqa huñururqa Israel casta wakin runakunapa contranpi peleaspa gobiernasqan allpata kutichikunanpaqmi.
2 Tayta Diosmi ichaqa runan Semiasta nirqa:
3-4 —Juda nacionpi gobiernaq Salomonpa churin Roboamtayá Israelpa miraynin llapallan Juda casta hinaspa Benjamin casta llapallan runakunatawan nimuy ñoqa Tayta Diospa kayna nisqayta:
“Ama riychikchu nitaq peleaychikchu castaykichikwanqa,
sapakamayá wasikichikman kutikuychik,
Roboampa contranpi hoqarikusqankuqa munasqayman hinam karqa” nispa.
Chaymi Tayta Diospa nisqanta kasukuspa ripukurqaku,
manañam rirqakuchu Jeroboampa contranpi peleaqqa.
Llaqtakunata Rey Roboam allichachisqanmanta
5 Roboanmi yacharqa Jerusalen llaqtapi hinaspam aswan allintaraq allichachirqa Juda nacionpi murallasqa llaqtakunata.
6 Allichachirqamá Belen llaqtata,
Etam llaqtata,
Tecoa llaqtata.
7 Bet-sur llaqtata,
Soco llaqtata,
Adulam llaqtata,
8 Gat llaqtata,
Maresa llaqtata,
Zif llaqtata,
9 Adoraim llaqtata,
Laquis llaqtata,
Azeca llaqtata,
10 Zora llaqtata,
Ajalon llaqtata hinaspa Hebron llaqtata.
Chay llaqtakunam murallasqa llaqtakuna karqa Juda lawpi chaynataq Benjamin lawpipas.
11 Chay llaqtakunapa murallankunata allichachispam chaykunapi churachirqa capitankunata,
chaypitaqmi waqaycharqa mikuytapas,
aceitetapas hinaspa vinotapas.
12 Chay llapallan llaqtakunapiqa churarqataqmi harkachikuna armakunatapas chaynataq lanzakunatapas.
Alli-allintam allichachirqa chay llaqtakunata hinaspam Juda lawpi hinaspa Benjamin lawpi munaychakurqa.
13 Lliw Israel nacionpi kaq sacerdotekunapiwan Leviy casta runakunañataqmi tukuy hinastinmanta hamurqaku paywan kuska kanankupaq.
14 Leviy casta runakunam saqeramurqaku echaderonkunatawan tukuy kapuqninkunata hinaspam hamurqaku Juda lawmanwan Jerusalen llaqtaman.
Jeroboanmi gobiernonpi qatiqninkunapiwan paykunata qarqorurqaku Tayta Diospa sacerdotenkuna kasqankumanta.
15 Jeroboanmi huk sacerdotekunataña churarurqa moqokunapi kaq capillakunapi sacerdotekuna kanankupaq hinaspa chivato taytachapaqwan kikinpa rurachisqan toro taytachakunapaq sacerdote kanankupaq.
16 Tukuy sonqonkuwan Israelpa yupaychasqan Tayta Dios qatiy munaq llapallan ayllu runakunam ichaqa chay Leviy casta sacerdotekunataña qatirqaku,
paykunaqa Jerusalen llaqtamanmi rirqaku abuelonkupa yupaychasqan Tayta Diospaq animalkunata wañuchinankupaq.
17 Chaynatamá takyachirqaku Juda nacionpi gobiernota hinaspam kimsa wata Salomonpa churin Roboamta kallpancharqaku,
payqariki kimsa watallam Davidpa hinaspa Salomonpa rurasqanta hina rurarqa.
18 Rey Roboanmi casarakururqa Davidpa willkan Mahalatwan,
Mahalatqa karqa Jerimotpa churinmi.
Casarakurqataqmi Abihail sutiyoq warmiwanpas.
Abihailqa karqa Eliabpa churinmi,
Eliabñataqmi karqa Isaipa churin.
19 Mahalatmi Roboampa churinkunata wachakurqa,
paykunam karqa Jehus,
Semarias hinaspa Zaham.
20 Chaymantañataqmi kasarakururqa Absalonpa churin Maacawan hinaptinmi pay wachakurqa Abiamta,
Ataita,
Zizata hinaspa Selomit sutiyoq runata.
21 Llapallan warmikunamantapas chaynataq compañerankunamantapas mastaqa Roboamqa kuyarqa Absalonpa churin Maacatam.
Roboampam karqa chunka pusaqniyoq warminkuna,
compañerankunañataqmi karqa soqta chunka.
Qari churinkunam karqa iskay chunka pusaqniyoq,
warmi churinkunañataqmi karqa soqta chunka.
22 Roboanmi churarqa Maacapa wawan Abiamta llapallan wawqenkunapa jefen kananpaq.
Payqa Abiamtam reypaq churayta munarqa.
23 Allinta tanteaspam llapallan churinkunaman rakirqa Juda lawpi hinaspa Benjamin lawpi kaq murallasqa llaqtakunata,
qorqataqmi mikuykunatapas,
mana pisiyta qospanmi achka warmikunawan casarachirqa.