Jeroboampa contranpi Ahias willakusqanmanta
—Pachakuy huk pachakunawan chaynapi ñoqapa warmiy kasqaykita pipas mana reqsisunaykipaq.
Riruyá Silo llaqtaman,
chaypim kachkan Diosmanta willakuq Ahias,
paymi niwarqa kay nacionpi rey kanaypaq.
3 Aparikuy chunka tantakunata,
tortata hinaspa huk aysaku mielta.
Paypa kasqanman riruptikim nimusunki warmataqa imam pasananmanta.
4 Jeroboampa warminmá rurarqa qosanpa nisqanta hina.
Silo llaqtaman pasaspanmi Ahiaspa wasinman chayarurqa,
Ahiasmi ichaqa llumpay yuyaqña kaptin ñawinkuna tutayarusqanrayku manaña rikukurqachu.
5 Tayta Diosmi ichaqa Ahiasman willaykurqaña kaynata:
—Jeroboampa warminmi hamunqa onqoq wawanmanta tapukusunaykipaq,
pantachikuspanmi hamusunki,
qamñataqmi kayna-kaynata ninki —nispa.
6 Warmipa punku yaykumusqanta Ahias uyariruspanmi nirqa:
—Yaykukamuy,
Jeroboampa warmin.
¿Imanasqataq pantachikunki?
Tayta Diosmantam chaskiruniña llakikuypaq noticiata qanman willanaypaq.
7 Chaynaqa Jeroboanman kutispayá Israelpa yupaychasqan Tayta Diospa nisqanta kaynata nimuy:
“Runakunamanta akllaykuspaymi Israel casta runaykunata gobiernanaykipaq churarqayki.
8 Davidpa castanmanta gobiernonta qechuruspaymi qoykurqayki ichaqa manam serviqniy David hinachu kamachikusqaykunata kasukurqanki,
Davidqa tukuy sonqonwanmi munasqayman hina kawsarqa.
9 Qanmi ichaqa mana allinkunata rurarunki,
qanmanta ñawpaq kaq runakunamantapas aswantaraq piñarachiwanaykipaqmi fundisqa taytachakunataraq rurakunki hinaspam qepanchakuruwanki.
10 Chaymi qampa castaykiman apamusaq castigota,
Israel nacionpi qampa kaq lliw qarikikunatam tukurusaq,
tukurusaqtaqmi sirviente kaqtapas chaynataq libre kaqtapas,
miraynikikunatam tukunankama kañarusaq wanuta kañachkaq hina.
11 Pipas qampa aylluykimanta llaqtapi wañuqkunatam allqokuna mikunqa,
campopi wañuqkunatañataqmi ullachkukuna mikunqa.
Ñoqa Tayta Diosmi nini chaynata” nispa.
12 —Yaw warmi qamqa kutiyá wasikiman,
llaqtaman chayaykuchkaptikim warma wañurunqa.
13 Hinaptinmi Israel nacionpi llapa runakuna hatun llakikuywan pampanqaku,
payllam Jeroboampa churinkunamanta pampasqa kanqa,
Israelpa yupaychasqan Tayta Diosmi Jeroboampa castankunamanta payllata allin kasqanpaq tarirun.
14 Tayta Diosmi Israel nacionpi reyta churanqa,
paymi kunanmantapuni Jeroboampa castankunata lliwta tukunqa.
15 Imaynam soqosta mayu aytinyachin,
chaynatam Tayta Diospas Israel casta runakunata castiganqa,
sacha pilachkaq hinamá Tayta Diosqa Israel casta runakunata qarqorunqa abuelonkunaman qosqan sumaq allpamanta,
paykunataqa Eufrates Mayupa waklawninmanmi cheqerachinqa.
Chaynataqa rurarunqa Asera mamachata ruraruspa Tayta Diosta piñarachisqankuraykum.
16 Jeroboampa huchallikusqanraykum chaynataq Israel naciontapas huchallichisqanraykum Tayta Diosqa qoykunqa Israel casta runakunata —nispa.
17 Jeroboampa warminmi Tirsa llaqtaman pasarqa chaymi wasinman chayaruspa punkuta yaykuykuchkaptin warma wañururqa.
18 Israel nacionpi llapa runakunam hatun llakikuywan pamparqaku Tayta Diosmanta willakuq serviqnin Ahiaspa nisqanman hina.
19 Jeroboampa wakin rurasqankunaqa,
guerrakunapi peleasqankunaqa chaynataq imaynam gobiernasqanqa Israel nacion reykunapa vidanmanta willakuq libropim qellqasqa kachkan.
20 Jeroboanmi iskay chunka iskayniyoq wata gobiernarqa,
abuelonkuna hina wañuruptinñataqmi churin Nadabña paypa rantinpi gobiernarqa.
Juda nacionpi Roboam gobiernasqanmanta
21 Salomonpa churin Rey Roboanmi Juda nacionpi gobiernarqa,
payqa tawa chunka hukniyoq watanpim gobiernayta qallaykurqa.
Chunka qanchisniyoq watam gobiernarqa Jerusalen llaqtapi.
Jerusalen llaqtatamá Israel ayllukunamanta Tayta Dios akllakurqa sutin chaypi reqsisqa kananpaq.
Roboampa mamanmi karqa Amon nacionniyoq Naama.
22 Juda nacionpi runakunam Tayta Diospa qayllanpi mana allinkunata rurarqaku hinaspam abuelonkupa hucha rurasqankumantapas aswan mastaraq huchallikurqaku Tayta Diosta piñachispa.
23 Paykunapas alto moqokunapim rurachirqaku capillakunata,
adorananku pilarkunata hinaspa Asera sutiyoq mamachakunata,
rurachirqakuqa llapallan moqokunapiwan rapisapa sachakunapa sikinpim.
24 Chay nacionpiqa karqataqmi mariconkunapas,
paykunam rurarqaku Israelpa mirayninkunapa qayllanmanta Tayta Diospa qarqosqan huchallikuq runakuna hina.
25 Rey Roboam pichqa watamanña gobiernachkaptinmi Jerusalen llaqtata atacarqa Egipto nacionpa reynin Sisac.
26 Paymi hapikuykurqa Tayta Diospa templonpi tukuy imakunatawan reypa palacionpi tukuy imakunata.
Lliwta qechuruspanmi Salomonpa qorimanta rurachisqan harkachikuna armakunatapas apakurqa.
27 Chaykunapa rantinpim Rey Roboam rurachirqa broncemantaña harkachikuna armakunata hinaspam waqaychaqnin soldadokunapa jefenman qoykurqa reypa palacionpa punkunpi waqaychanankupaq.
28 Tayta Diospa templonman sapa kuti rey yaykuptinmi waqaychaqnin soldadokuna chay harkachikuna armata apaqku hinaspam kasqallan kutichimuqku chay soldadokunapa cuartonman.
29 Roboampa wakin rurasqankunaqa chaynataq tukuy ima rurasqankunaqa Juda nacion reykunapa vidanmanta willakuq libropim qellqasqa kachkan.