Rey Jeroboamta Diosmanta willakuq qaqchasqanmanta
13
Tayta Dios kamachiptinmi Juda nacionmanta Diospa runan Betel llaqtaman chayaramurqa,
payqa chayaramurqa Jeroboam altarpi inciensota kañachinanpaq sayachkaptinmi.
2 Chay willakuqmi Tayta Dios kamachisqanrayku altarpa contranpi qaparirqa kaynata:
—¡Altar,
altar!
Tayta Diosmi nisunki:
“Davidpa castanmantam huk wawa nacemunqa Josias sutiyoq,
paymi moqo capillakunapi incienso kañaq sacerdotekunata qampa hawaykipi wañuchinqa hinaspam hawaykipipas runakunapa tullunta kañanqa” nispa.
3 Chay punchawpi huk milagro pasananpaqmi nirqa kaynata:
—Tayta Diosmi milagronmanta kaynata nin:
“Altarmi pakipakurunqa hinaptinmi hawanpi uchpapas tallikurunqa” nispa.
4 Betel llaqta altarpa contranpi Diospa runan qaparirusqanta Rey Jeroboam uyariruspanmi altarmanta makinta haywarispa nirqa:
—¡Hapiychik!
—nispa.
Ichaqa makin chakiruptinmi manaña doblayta atirqachu.
5 Altar pakipakuruptinmi uchpapas tallikururqa milagro pasananmanta Diospa runan nisqanman hina,
chaynataqa nirqa Tayta Dios kamachisqanraykum.
6 Chaymi Diospa runanta rey nirqa:
—Ruegaykapuway yupaychasqayki Tayta Diosta hinaspa mañaykapuway makillay kasqallan doblakunanpaq —nispa.
Hinaptinmi Diospa runan Tayta Diosta ruegakuptin reypa makinqa doblakurqaña ñawpaqta hina.
7 Reymi Diospa runanta nirqa:
—Wasiymanyá hakuchik mikuykamunaykipaq chaypim regalota qomusqayki —nispa.
8 Diospa runanmi ichaqa reyta nirqa:
—Parten palacioykitaña qowaptikipas manam riymanchu qanwanqa nitaqmi mikuymanchu nitaqmi yakutapas tomaymanchu kay sitiopiqa.
9 Tayta Diosmi kamachiwarqa kaynata nispa:
“Amam mikunkichu nitaq yakutapas tomankichu amataqmi risqayki ñannintaqa kutimunkichu” nispa.
10 Chaynapim Betel llaqtaman risqan ñannintaqa manaña kutimurqachu.
11 Chay tiempopim Betel llaqtapi yacharqa Diosmanta willakuq yuyaqña runa,
paypa churinkuna hamuruspanmi willarqa Betel llaqtapi Diospa runan imam rurasqanmanta,
willarqakutaqmi reytapas imam nimusqanmanta.
12 Chaymi taytanñataq paykunata tapurqa:
—¿Maylaw ñannintataq pasarqa?
—nispa.
Chaymi churinkuna qawachirqaku Juda nacionmanta hamuq Diospa runanqa mayninmi risqanta.
13 Chaymi churinkunata nirqa:
—Asnoyta sillaykapuwaychik —nispa.
Asnonta sillaykuptinkum sillakuykuspa pasarqa.
14 Richkaspanmi Diospa runantaqa encina sachapa sikinpi tiyachkaqta tarirurqa hinaspam tapurqa:
—¿Qamchu kachkanki Juda nacionmanta hamuq Diospa runan?
—nispa.
Chaymi payñataq nirqa:
—Arí,
ñoqam kani —nispa.
15 Chaymi Diosmanta willakuq yuyaq runañataq nirqa:
—Hakuwá wasiyta imallatapas mikuykamunaykipaq —nispa.
16 Chaymi Diospa runanñataq nirqa:
—Manam kutiymanchu wasikiman yaykunaypaqqa,
qanwanqa manam mikuymanchu nitaq yakullatapas tomaymanchu chay llaqtapiqa.
17 Tayta Diosmi kamachiwarqa kaynata:
“Amam mikunkichu nitaqmi yakutapas tomankichu chaypiqa,
amataqmi kutinkichu risqayki ñannintaqa” nispa.
18 Chaymi Diosmanta willakuq yuyaq runa llullakuspa nirqa:
—Ñoqapas qam hina Diosmanta willakuqmi kani,
angelmi Tayta Diospa nisqanta kaynata niwarqa:
“Wasikiman pusamuy mikuspa yakuta tomaykunanpaq” nispa.
19 Hinaptinmi paywan kutispa mikumurqa hinaspa yakutapas tomarqa.
20 Mesapi tiyachkaptinkum Tayta Dios rimapayamurqa Diospa runan kutichimuq yuyaq runata.
21 Chaymi Juda nacionmanta hamuq Diospa runanta chay yuyaq runa hatun vozpi nirqa:
—Tayta Diosmi kaynata nin:
“Yupaychasqayki ñoqa Tayta Diospa nisqaytam mana rurarqankichu nitaqmi kamachisqaytapas kasuwarqankichu,
22 aswanqa kutimuspaykim ñoqa Tayta Diospa:
‘Amam mikunkichu nitaq yakutapas tomankichu’ nisqay sitiopi mikurqanki hinaspa yakutapas tomarqanki chaymi cuerpoykitapas abueloykipa sepulturanpiqa mana pampanqakuchu” nispa.
23 Mikuytawan yaku tomayta tukuruptinkum chay kutichimuqnin yuyaq runa asnonta sillaykapuptin
24 pasakurqa ichaqa leonwan tuparuptinmi chay leon wañurachirqa,
cuerpon ñanpi chutarayaptinmi ladonpiñataq sayachkarqa leonwan asno.
25 Chay ñannin puriqkunam rikururqaku ñanpi chutarayaq cuerpota chaynataq cuerpopa waqtanpi sayaq leontapas chaymi Diosmanta willakuq yuyaq runapa yachasqan llaqtanman chayaruspanku willakurqaku.
26 Ñanmanta kutirachimuq Diosmanta willakuq runa uyariruspanmi nirqa:
—Chay wañuruq runaqa Diospa runanmi,
Tayta Diospa kamachisqanpa contranpi ruraptinmi Tayta Diosqa leonman qoykurqa hinaptinmi leon atacaruspa paytaqa wañurachin Tayta Diospa nisqanman hina —nispa.
27 Churinkunatam nirqa:
—Asnota sillaykapamuwaychik —nispa.
Sillaykapuptinkum
28 pasaspan ñanpi chutarayachkaq cuerpota tarirurqa,
asnowan leonpas chay cuerpopa waqtanpim sayachkasqa ichaqa chay leonqa manam chay cuerpotaqa mikusqachu nitaqmi asnotapas imanasqachu.
29 Diosmanta willakuq chay yuyaq runam Diospa runanpa cuerponta asnonpi cargakuykuspa aparqa llaqtaman chayarachispa waqayllawanña pampananpaq.
30 Cuerpota sepulturaman churaykuptinmi waqarqaku:
—¡Ay,
wawqelláy!
—nispa.
31 Pampayta tukuruptinkum churinkunata kaynata nirqa:
—Ñoqa wañuruptiymi pampaykuwankichik kay Diospa runanpa pampakusqanpa waqtanpi.
Tulluykunatamá paypa tullunpa hichpanpi churankichik.
32 Paymi rimarqa Tayta Diospa nisqanta Betel llaqta altarpa contranpi chaynataq Samaria law moqokunapi kaq capillakunapa contranpipas,
nisqankunaqa cumplikunqapunim —nispa.