Israel nacion iskayman rakikusqanmanta
12
Israel casta llapallan runakunam huñunakururqaku Siquem llaqtaman chaymi Roboam rirqa paytaña reypaq churanankupaq.
2 Ichaqa chaytam yacharurqa Nabatpa churin Jeroboam.
Paymi Rey Salomonmanta lluptiruspan Egipto nacionpiraq kachkarqa.
3 Chaymi payta qayachimuptinku huñunasqa Israel casta runakunawan kuska rirqaku Roboanman hinaspam kaynata nirqaku:
4 —Llumpay llasaq yugota bueyesman churkuchkaq hinam taytayki llamkachiwarqaku,
kunanyá taytaykipa llumpay llamkay qowasqankuta menosyachiy,
qechuwaykutaqyá llasaq yugo qowasqankutapas hinaptinqa servisqaykikum —nispa.
5 Chaymi Roboamñataq nirqa:
—Kimsa punchawmantañayá kutimuychik —nispa.
Chaymi runakuna kutikurqaku.
6 Hinaptinmi taytan Salomon kawsaptinraq serviqnin ancianokunata Rey Roboam tapurqa consejachikunanpaq:
—¿Imatataq consejawankichik kay runakunaman ninaypaq?
—nispa.
7 Chaymi paykunañataq nirqaku:
—Sichu kay runakunata allinta servispayki sumaqllata rimapayaptikiqa paykunam servisunki tukuy tiempo —nispa.
8 Roboanmi ichaqa ancianokunapa consejasqanta mana kasukuspan paywan kuska uywasqa serviqnin mozokunataña tapurqa consejachikunanpaq.
9 Chay mozokunatamá nirqa:
—¿Imatataq consejawankichik kay runakunaman ninaypaq?
Paykunam niwarqaku:
“Taytaykipa llumpay llamkay qowasqankutayá menosyachiy,
qechuwaykutaqyá llasaq yugo qowasqankutapas” nispa.
10 Chaymi Roboanwan kuska uywasqa mozokunatañataq nirqaku:
—“Taytaykipa llasaq yugo qowasqankuta menosyachiy” niq runakunamanmi ninki kaynata:
“aÑoqapa uña dedoyqa taytaypa piernanmantapas aswan rakum.”
11 “Taytaymi llasaq yugota churkusurqankichik,
ñoqam ichaqa aswan llasaqtaraq churkusqaykichik,
taytaymi castigasurqankichik azotewan,
ñoqam ichaqa castigasqaykichik fierro puntayoq azotewanraq” nispa.
12 Rey Roboampa:
“Kimsa punchawmantam kutimunkichik” nispa nisqanman hinam Jeroboamqa llapallan runakunapiwan kutirqaku.
13 Ancianokunapa consejasqanta mana kasukuspanmi reyqa nanay simiwan runakunata rimapayarqa.
14 Mozokunapa consejasqanman hinamá nirqa kaynata:
—Taytaymi llasaq yugota churkusurqankichik,
ñoqam ichaqa aswan llasaqtaraq churkusqaykichik,
taytaymi castigasurqankichik azotewan,
ñoqam ichaqa castigasqaykichik fierro puntayoq azotewanraq —nispa.
15 Reymi runakunapa mañakusqanta mana kasurqachu,
chaynataqa rurarqa Diosmanta willakuq Silo llaqtayoq Ahiaswan Nabatpa churin Jeroboanman Tayta Diospa nisqan cumplikunanpaqmi.
16 Reypa mana uyarisqanta Israel casta runakuna qawaykuspankum nirqaku:
Israel casta runakuna
¡manañam ñoqanchikpaqqa imapas kanchu Davidmantaqa
nitaqmi herencianchikpas kanchu Isaipa churinmantaqa!
¡Israel casta runakunaqa,
wasikichikmanyá pasakuychik!
¡Davidpa mirayninkunaqa,
kikikichikyá arreglakuychik!
Chaymi Israel casta runakunaqa wasinkuman ripukurqaku.
17 Chaynapim Juda law llaqtakunapi yachaq Israelpa mirayninkunallataña Roboamqa gobiernarqa.
18 Rey Roboanmi debaldella llamkachiqkunapa jefen Adoramta kacharqa ichaqa Israel casta llapallan runakunam rumiwan choqaspa wañurachirqaku chaymi Rey Roboampas apurawllamanña carretanpi lluptirurqa Jerusalen llaqtaman.
19 Chaynapimá Israel casta runakunaqa hoqarikururqa Davidpa castankunapa contranpi kay libro qellqasqa kasqan punchawkama.
20 Israel casta llapallan runakunam yacharurqaku Jeroboampa kasqallan kutiramusqanta hinaspam qayachimurqaku huñunakuyman,
chaypim enteron Israel nacion gobiernananpaq churarurqaku,
manañam mayqen ayllupas Davidpa castan Rey Roboamtaqa qatirqakuchu,
qatispaqa-qatirqa Juda ayllullañam.
21 Rey Roboanmi Jerusalen llaqtaman chayaramuspan huñururqa Juda ayllumanta hinaspa Benjamin ayllumanta guerrapaq akllasqa pachak pusaq chunkan waranqa soldadokunata,
chaynataqa huñururqa Israel casta wakin runakunapa contranpi peleaspa taytan Salomonpa gobiernasqan allpata kutichikunanpaqmi.
22 Diosmi ichaqa runan Semaiasta nirqa:
23-24 —Juda nacionpi gobiernaq Salomonpa churin Roboamtayá,
Juda casta llapallan runakunatawan,
Benjamin casta llapallan runakunatawan hinaspa wakin runakunatawan nimuy ñoqa Tayta Diospa kayna nisqayta:
“Ama riychikchu nitaq peleaychikchu Israelpa miraynin castaykichikwanqa,
sapakamayá wasikichikman kutikuychik,
Roboampa contranpi hoqarikusqankuqa munasqayman hinam karqa” nispa.
Chaymi Tayta Diospa nisqanta kasukuspa sapakama ripukurqaku.
Jeroboampa huchallikusqanmanta
25 Jeroboanmi Efrain Orqokuna lawpi kaq Siquem llaqtata mosoqmanta hatarichispan chaypi yacharqa,
chaymantañataqmi Penuel llaqtaman rispan chay llaqtatapas hatarichirqa.
26 Jeroboanmi piensarqa:
—Gobiernoyqa kasqallanchá Davidpa castanman kutiykunqa
27 sichu kay runakuna Jerusalen llaqtapi kaq templopi Tayta Diospaq animalkuna wañuchiq riptinkuqa —nispa.
28 Chaymi consejota rey chaskiruspan rurachirqa qorimanta iskay torochakunata hinaspam runakunata nirqa:
—Israel casta runakuna,
amañayá Jerusalen llaqtamanqa riychikchu,
Egipto nacionmanta horqomusuqnikichik diosnikichikqa kaykunam —nispa.
29 Huknin toro taytachatam churarqa Betel llaqtapi,
huknintañataqmi churarqa Dan llaqtapi.
30 Chay rurasqanwanmá runakunata huchallirachirqa,
wakin runakunaqa Dan llaqtakamaraqmi rirqaku chay taytacha adoraq.
31 Rurachirqataqmi alto moqokunapi capillakunatapas hinaspam chaykunapi churarqa mana Leviypa mirayninmanta kaq sacerdotekunata.
32 Jeroboanmi pusaq kaq killapa chunka pichqayoq punchawninpi rurachirqa hatun fiestata,
chay fiestataqa rurachirqa Juda nacionpi fiestata hinam hinaspam kikinpuni altarpi animalta wañuchispa lliwta kañarqa.
Chaynatamá rurarqa Betel llaqtapi.
Qorimanta rurasqan torochakunapaqmi animalta wañuchispa lliwta kañarqa hinaspam Betel llaqtapa moqonkuna capilla rurachisqanpi sacerdotekunata churarqa.
33 Betel llaqta altar rurachisqanpimá pusaq kaq killapa chunka pichqayoq punchawninpi animalta wañuchispa lliwta kañarqa,
chay fiestataqa rurarqa sonqonmanta tanteasqan killapim.
Israelpa mirayninkunapaqmi hatun fiestata rurachirqa hinaspam kikinpuni altarpi inciensota kañarq a.