—Amam paykunawanqa casarakunkichikchu nitaqmi paykunapas qamkunawanqa casarakunqachu,

yanqañataqmi taytachanku qatiqtaña rurarusunkichikman —nispa.

Salomonmi ichaqa chay warmikunaman hukllawakururqa.

3 Reykunapa churinkunam Salomonpa warminkuna karqa qanchis pachak,

kapurqataqmi kimsa pachak compañerankunapas,

chay warmikunam Salomonta huchallirachirqa.

4 Machuyaruptinmi chay warmikunaqa taytacha-mamachakunataña Salomonta adorachirqaku chaynapim payqa yupaychasqan Tayta Diospaqqa hawa sonqollaña karqa,

manañam taytan David hinachu adorarqa tukuy sonqonwan.

5 Rey Salomonqa Sidon llaqtayoq runakunapa Astarte sutiyoq mamachantañam yupaycharqa,

yupaycharqataqmi Amon casta runakunapa Milcom sutiyoq millakuypaq taytachankutapas.

6 Chaynapimá Salomonqa Tayta Diospa qayllanpi mana allinta rurarqa,

manam taytan David hinachu mana pantaspa Tayta Diosta qatirqa.

7 Salomonmi Jerusalen llaqtapa chimpan moqopi huk capillata rurarachirqa,

chaytaqa rurachirqa Moab casta runakunapa yupaychasqan Quemos sutiyoq millakuypaq taytachapaqmi,

rurachirqataqmi Amonpa mirayninkunapa yupaychasqan Moloc sutiyoq millakuypaq taytachapa capillantapas.

8 Rurachirqataqmi huklaw nacionniyoq llapallan warmikunapaqpas chaymi paykunaqa mamacha-taytachankuman inciensota kañaqku,

kañapuqkutaqmi animalkunatapas.

9 Chaymi Salomonpaq Israelpa yupaychasqan Tayta Dios piñakururqa,

payqa piñakururqa iskay kutita rikurichkaptinpas Salomonpa sonqon rakikurusqanraykum.

10 Tayta Diosmi kamachirqa sapaq dioskunataqa mana qatinanpaq ichaqa manam Tayta Diospa kamachisqanta kasukurqachu.

11 Chayraykum Salomonta Tayta Dios nirqa:

—Chaynata kawsaspa kamachisqay contratotawan decretoykunata mana kasukusqaykiraykum gobiernasqayki nacionta partispa serviqnikiman qosaq.

12 Ichaqa taytayki Davidraykum kawsanaykikamaqa mana chaynatachu rurasaq,

ñoqaqa churikipa makinmantañam qechusaq.

13 Manam llapallan naciontachu ñoqaqa qechusaq,

aswanqa serviqniy Davidraykum hinaspa ñoqapaq akllakusqay Jerusalen llaqtaraykum puchuchisaq huk aylluta churikiman —nispa.

14 Tayta Diosmi Salomonpa contranpi hatarirachirqa Edom nacionniyoq Hadad sutiyoq runata,

payqa karqa chay nacionniyoq reypa mirayninmi.

15 Edom nacionwan David peleaptinraqmi llapallan tropankuna kamachiq Joab rirqa wañuqkunata pampamunanpaq hinaspam Edom nacionniyoq llapallan qarikunata wañurachirqa.

16 Joabmá Israel casta llapallan tropakunapiwan soqta killapuni yacharqaku Edom nacionpi llapa qarikunata wañuchiy tukunankukama.

17 Hadadmi ichaqa warmallaraq kachkaspan taytan serviq Edom casta runakunawan lluptirurqa Egipto nacionman.

18 Madian lawmanta lloqsiruspankum chayarurqaku Paran lawman,

chay sitiomanta runakunata pusarikuspankum chayarurqaku Egipto nacion Rey Faraonpa kasqanman hinaptinmi Rey Faraon qoykurqa wasita,

mikuyta chaynataq chakratapas.

19 Faraon anchallataña favorecespanmi chay Hadad sutiyoq runata casararachirqa warmin Tahpenespa ñañanwan.

20 Tahpenespa ñañanmi wachakururqa Hadadpa churinta,

chay wawatam suticharqaku Genubat nispa.

Reina Tahpenesmi chay wawata uywarqa Faraonpa palacionpi wawankunatawan kuskata.

21 Hadadmi Egipto nacionpi kachkaspa yacharurqa Davidpa wañukusqanmanta,

yacharurqataqmi llapallan tropakuna kamachiq Joabpa wañukusqantapas chaymi Faraonta nirqa:

—Dejaykuwayá llaqtayman kutinaypaq —nispa.

22 Faraonmi nirqa:

—Kaypiqa ¿imataq pisisunki llaqtaykiman kutiy munanaykipaq?

—nispa.

Chaymi Hadadñataq nirqa:

—Manam imapas pisiwanchu ichaqa dejaykuwayá kutinaypaq —nispa.

23 Diosqa Salomonpa contranpitaqmi hatarirachirqa Eliadapa churin Rezontapas,

paymi Soba nacionpa reynin Hadad-ezer servisqanmanta lluptirurqa.

24 Chay Rezon sutiyoq runam runakunata huñuruspa salteaqkunapa jefen rikurirurqa,

Soba nacionpi kaqkunata David wañurachiptinmi paykunaqa Soba nacionmanta ripukurqaku Damasco llaqtaman hinaspam chaypi munaychakurqaku.

25 Chaymi Rezonqa Salomon wañukunankama Israel nacionpa contranpi karqa,

Israel nacionpa contranpi kaq Hadadpa mana allin rurasqankunamanmi Rezonpas yaparqaraq mana allin rurasqankunata.

Israel nacionta cheqnispanmi Rezonqa Aram nacionta gobiernarqa.

26 Salomonpa serviqnin Jeroboampas reypa contranpim hoqarikururqa,

Jeroboamqa karqa Sereda llaqtayoq Efrain casta Nabatpa churinmi,

mamanpa sutinñataqmi karqa Zerua,

payqa karqa viudañam.

27 Rey Salomonpa contranpi Jeroboam hoqarikunanpaq causam karqa kay:

Salomonmi palacion takyachiq perqata churachispa taytan Davidpa llaqtanpa murallanpi raqrakunata allichachirqa.

28 Jeroboamqa karqa kallpasapa valeroso runam,

allin ruraq kasqanta Salomon qawaykuspanmi Joseypa castan llamkaqkunapa kamachiqninpaq churarurqa.

29 Jeroboanmi Jerusalen llaqtamanta huk punchaw lloqsiruspa ñanpi tuparurqa Silo llaqtayoq Diosmanta willakuq Ahiaswan,

payqa richkarqa mosoq capayoqmi,

iskayllanku campopi kachkaptinkum

30 Ahiasqa churakusqan mosoq capanta chunka iskayniyoq pedazoman llikiparurqa

31 hinaspam Jeroboamta nirqa:

—Hapiy chunka pedazokunata,

Israelpa yupaychasqan Tayta Diosmi nin kaynata:

“Ñoqam kunan Salomonmanta gobiernonta qechusaq hinaspaymi chunka ayllukunata qanman qosqayki,

32 Salomonpaqñataqmi puchunqa huk ayllullaña serviqniy Davidrayku chaynataq Israel ayllukunamanta Jerusalen llaqtatapas akllakusqayrayku.

33 Salomonqa paywan kaqkunapiwanmi ñoqata qepanchakuruwaspa adorarqaku Sidon llaqtayoq runakunapa yupaychasqan Astarte sutiyoq mamachakunataña,

adorarqakutaqmi Moab casta runakunapa yupaychasqan Quemos sutiyoq taytachatapas chaynataq Amonpa mirayninkunapa yupaychasqan Milcom sutiyoq taytachatapas.

Paykunaqa manam taytan David hinachu rurarqaku.

Davidqa munasqayman hina kawsaspanmi decretoykunatapas chaynataq reglamentoykunatapas cumplirqa.

34 Ichaqa Salomonmantaqa manam enteron nacionnintachu qechurusaq,

wañunankamam payqa gobiernanqa akllakusqay serviqniy Davidrayku,

Davidmi waqaycharqa kamachikuyniykunata chaynataq decretoykunatapas.

35 Ichaqa Salomonpa churinmantam gobiernonta qechurusaq hinaspaymi qanmanña chunkantin ayllukunata qoykusqayki.

36 Salomonpa churinmanqa qosaq huk ayllullatañam.

Munanim serviqniy Davidpa achkiy hina kayninqa hinalla Jerusalen llaqtapi kananta,

chay llaqtatam akllakurqani chaypi sutiy reqsisqa kananpaq.

37 Qamtañam churasqayki munasqaykiman hina gobiernanaykipaq,

Israel nacionpimá rey kanki.

38 Tukuy kamachisqaykunata kasukuspa,

munasqayman hina kawsaspa allinta ruraptikiqa chaynataq decretoykunatapas hinaspa kamachisqaykunatapas kasukuspa serviqniy David hina ruraptikiqa,

ñoqam qamta yanapasqayki,

Davidpaq hinataqmi takyachisaq miraynikipa gobiernontapas,

Israel naciontapas makikimanmi churasaq gobiernanaykipaq.

39 Chaynaqa Davidpa mirayninkunatam penqayman churasaq ichaqa manam wiñaypaqchu” nispa.

40 Chayraykum Salomonqa Jeroboam wañuchiyta munarqa ichaqa Jeroboanmi lluptirurqa Rey Sisacpa kasqan Egipto nacionman,

Egipto nacionpimá karqa Salomonpa wañukunankama.

41 Salomonpa wakin rurasqankunamantawan yachayninmantaqa Salomonpa vidanmanta willakuq libropim qellqasqa kachkan.

42 Rey Salomonmi Jerusalen llaqtapi yachaspa lliw Israel nacionpi gobiernarqa tawa chunka wata.

43 Abuelonkuna hina Salomon wañuruptinmi pamparurqaku taytan “Davidpa Llaqtan” sutiyoq barriopi,

paypa rantinpiñataqmi gobiernarqa churin Roboa m.