Rey Salomonman Saba nacionpa reinan watukusqanmanta
9
Salomon ancha reqsisqa kasqanmanta Saba nacionpa reinan uyariruspanmi hamurqa ancha sasa tapukuykunawan pruebananpaq.
Jerusalen llaqtamanmá hamurqa achka-achka serviqninkunawan kuska,
camellokunapim apamurqa miski asnaqkunata,
achka-achka qorita hinaspa alhaja rumikunata,
Salomonpa kasqanman chayaramuspanmi sonqonpi llapa ima piensasqanta nirqa.
2 Chaymi Salomonñataq niykarirqa lliw tapukuyninta,
ima tapukuyninpas manam puchurqachu mana contestasqaqa:
3 Saba nacionpa reinanmi qawaykurqa Salomonqa alli-allin yachayniyoq kasqanta,
qawaykurqataqmi palacio rurachisqantapas,
4 mesanpi tukuy rikchaq mikuykunatapas,
palacionpi yanapaqninkunapa imaynam kawsasqankutapas,
sirvientenkunapa imaynam servisqantapas hinaspa imaynam pachakusqankutapas.
Qawaykurqataqmi reyman copa serviqkunatapas,
paykunapa pachankutapas chaynataq Tayta Diospa templonpi animalkunata wañuchispa kañasqankutapas,
chaykunawan admirakuspanmi
5 reyta nirqa:
—Cheqapmi kasqa rurasqaykimanta hinaspa alli-allin yachayniyoq kasqaykimanta niwasqankuqa.
6 Niwasqankutaqa manam creerqanichu ñawiykunawan kunan rikuykunaykama,
manamiki partellantapas willawarqakuchu,
tukuy yachaynikiqa uyarisqaymantapas aswanraqmi kasqa.
7 ¡Mayna kusisqam kachkan runaykikunaqa chaynataq ñawpaqnikipi tukuy tiempo yachayniki uyariq serviqnikikunaqa!
8 ¡Kuyasuspayki gobiernachisuqniki yupaychasqayki Tayta Diosyá alabasqa kachun!
Diosqa Israel nacionta kuyasqanraykum chaynataq chay nacionta wiñaypaq takyachinanraykum qamta churasurqanki paykunapa reynin kanaykipaq chaynapi derechonpi allinta arreglanaykipaq —nispa.
9 Saba nacionpa reinanmá Rey Salomonman qorqa kimsa waranqa isqon pachak soqta chunkan kilo qorita,
miski asnaq achka-achka especeriakunata chaynataq alhaja rumikunatapas.
Saba nacion reinapa nana-nanaq miski asnaqkuna apamusqanta hinaqa manam haykapipas Salomonmanqa apamurqakuchu.
10 Rey Hirampa serviqninkunapas Salomonpa serviqninkunapiwanmi Ofir lawmanta apamurqaku qorita,
Sandalo sutiyoq qerokunata hinaspa alhaja rumikunatapas.
11 Chay sandalo sutiyoq qerukunamantam Rey Salomon rurachirqa Tayta Diospa templonpi kaq gradaspi hapipakuna kaqkunata chaynataq kikinpa palacionpi kaq gradaspi hapipakuna kaqkunatapas.
Tocaqkunapaqpas rurachirqataqmi hatun arpakunatawan taksa arpakunata.
12 Rey Salomonmi Saba nacion reinaman qoykurqa tukuy ima apamusqanpa truequenta,
qoykurqataqmi tukuy ima mañakusqantapas hinaptinmi reinaqa serviqninkunapiwan nacionninman kutikurqa.
Salomonpa riquezanmanta chaynataq reqsisqa kasqanmanta
13 Salomonmi sapa wata chaskiq iskay chunka iskayniyoq tonelada qorita,
14 impuestotapas chaskirqam rantikuq runakunamantawan negociantekunamanta hinaspa Arabia law reykunamanta.
Israel nacionpi prefectokunamantañataqmi Rey Salomonqa chaskirqa qori-qollqeta.
15 Rey Salomonqa qorimantam rurachirqataq iskay pachak harkachikuna armakunata,
sapakamatam rurachirqa soqta kilo masnin martillasqa qorimanta.
16 Hina qorimanta martillasqatataqmi rurachirqa kimsa pachak taksa harkachikuna armakunatapas,
sapakamatam rurachirqa kimsa kilo masnin qorimanta hinaspam “Libano Monte” sutiyoq palaciopi churachirqa.
17 Elefantepa waqonmantapas rurachirqataqmi hatun tiyananta hinaspam qori-purowan qaracharqa.
18 Reypa tiyananmanmi seqarqa soqta gradaskuna,
chaypitaqmi karqa qorimanta sarupakunapas.
Tiyananpa Kaylaw-waklawninpiñataqmi karqa brazonpa samanankuna,
chaykunapa sapa waqtanpim karqa sayachkaq leonkuna.
19 Chay soqta gradaskunapa kaylaw-waklawninpipas karqataqmi chunka iskayniyoq leonkuna,
huk leonmi karqa sapa gradaspa waqtanpi.
Chayna tiyanataqa manam mayqennin reypas rurachirqachu.
20 Rey Salomonpa tomanan vasokunapas karqa qorimantam,
“Libano Monte” sutiyoq palaciopi serviciokunapas qori-puromantam karqa,
qollqemantaqa manam imapas karqachu.
Salomonpa tiemponpiqa manam qollqetaqa qawariqkupaschu.
21 Lamar Qochapi reypa negocio ruranan buquenkunam viajaq Hirampa serviqninkunawan,
sapa kimsa watamantam apamuqku qorita,
qollqeta,
elefantepa waqonta,
monokunata hinaspa pavo realkunata.
22 Chaynapimá Rey Salomonqa masyarurqa tukuy hinastinpi reykunata apu kayninpi chaynataq yachayninpipas.
23 Llapallan kay pachapi reykunam munarqaku Rey Salomon rikuykuyta hinaspa Diospa yachay qosqan uyariykuyta.
24 Llapallankum regalanankupaq sapa wata apamuqku qori-qollqe serviciokunata,
sumaq pachakunata,
armakunata,
miski asnaqkunata,
caballokunata hinaspa mulakunata.
Rey Salomonpa rantisqankunamanta
25 Salomonpaqa kapurqataqmi caballo uywanan tawa waranqa establokunapas chaynataq carretakuna waqaychananpas,
karqataqmi caballoman chunka iskayniyoq waranqa sillakuqkunapas.
Paykunatam carretakunapa kasqan llaqtakunaman churachirqa,
churachirqataqmi Jerusalen llaqtapi reywan kanankupaqpas.
26 Paymi munaychakurqa llapallan reykunapa hawanpi Eufrates Mayumanta Filistea runakunapa nacionninkama chaynataq Egipto nacionpa linderonkamapas.
27 Reymi Jerusalen llaqtapi qollqeta huñurachirqa rumita hinaña,
cedro sachakunañataqmi karurqa waqtakunapi wiñaq purun higos sachakuna hinaña.
28 Mizraim lawmantawan huklaw karu nacionkunamantam apamuqku caballokunata Salomonpaq.
Rey Salomonpa wañukusqanmanta
29 Qallariyninmanta tukuyninkama Salomonpa wakin rurasqankunaqa Diosmanta willakuq Natanpa libronpim qellqasqa kachkan,
qellqasqataqmi kachkan Silo llaqtayoq Ahiaspa libronpipas chaynataq Iddopa libronpipas.
Chay Iddo sutiyoq runam sueñoyninpi rikusqanta qellqarqa Nabatpa churin Jeroboampa contranpi.
30 Rey Salomonmi Jerusalen llaqtapi yachaspa lliw Israel nacionpi gobiernarqa tawa chunka wata.
31 Abuelonkuna hina Salomon wañuruptinmi pamparurqaku taytan “Davidpa Llaqtan” sutiyoq barriopi,
paypa rantinpiñataqmi gobiernarqa churin Roboam.