3 Chaymantam Salomon rirqa Soba lawpi Hamat llaqtaman hinaspam chay llaqtata dueñochakaramurqa.

4 Mosoqmantataqmi rurachirqa chunniq lawpi kaq Tadmor sutiyoq llaqtatapas chaynataq kawsaykuna waqaychanan Hamat lawpi rurachisqan llapa llaqtakunatapas.

5 Mosoqmantataqmi rurachirqa hanay lawpi kaq Bet-horon llaqtatapas hinaspa uray lawpi kaq Bet-horon llaqtatapas chaynapi murallasqa hinaspa cerrojasqa punkuyoq llaqtakuna kananpaq.

6 Mosoqmantataqmi rurachirqa Baalat llaqtatawan kawsaykuna waqaychanan llapallan llaqtakunatapas chaynataq carretakunapa kanan llaqtakunatawan caballokunapa kanan llaqtakunatapas.

Rurachirqataqmi Jerusalem llaqtapi,

Libano Orqokunapi hinaspa enteron gobiernasqan allpapi llapa ima ruray munasqantapas.

7 Puchuqraq Het casta runakunaqa,

Amor casta runakunaqa,

Ferez casta runakunaqa,

Hiv casta runakunaqa chaynataq Jebus casta runakunaqa manam Israelpa mirayninkunachu karqa.

8 Paykunapa mirayninkutamá otaq Israelpa mirayninkunapa mana chinkachiy atisqankutamá debaldella Salomon llamkachirqa kay libro qellqasqa kasqan tiempokama.

9 Ichaqa Israelpa mirayninkunamantaqa manam pitapas debaldellaqa llamkachirqachu,

paykunaqa karqaku soldadokunam,

reypa yanapaqninkunam,

capitankunam,

carretankunapi kaq soldadokunapa jefenkunam hinaspa sillakuqkunapa jefenkunam.

10 Rey Salomonpa rurachisqankunapi llamkaqkunata kamachiqkunam karqa iskay pachak pichqa chunkan capatazkuna.

11 “Davidpa llaqtan” sutiyoq barriomantam Salomon pusachirqa Faraonpa warmi churinta.

Paytaqa pusachirqa paypaq palacio rurachipusqanmanmi,

Salomonmi nirqa:

—Tayta Diospa baulninta apaykusqanku cuartokunaqa Diosllapaqña sapaqchasqam,

chaynaqa warmiyqa manam yachanmanchu Israel nacionpa reynin Davidpa palacionpiqa —nispa.

12 Rey Salomonmi Tayta Diosman ofreceq lliw kañanapaq kaq animalkunata,

chaykunataqa ofreceq templopa corredorninpa chimpanpi kaq rurachisqan Tayta Diospa altarninpim.

13 Moisespa kamachikusqanman hinamá imatapas imam punchawllanpi ofrecerqa samana punchawkunapi,

mosoq killa fiestakunapi hinaspa watapi rurana kimsa hatun fiestakunapi.

Chay hatun fiestakunam karqa:

Mana Qonchuyoq Tanta Fiesta,

Semanakunapa Tukuynin Fiesta hinaspa Ramada Ruray Fiesta.

14 Sacerdotekunatapas kamachirqataqmi taytan Davidpa kamachisqanman hina muyuyninpi ruranankupaq,

kamachirqataqmi Leviy casta runakunatapas chaynapi ruranankuman hina Tayta Diosta alabaspa sacerdotekunatapas tukuy ima ruraypi sapa punchaw yanapanankupaq.

Punkukunawan cuentallikuqkunatapas kamachirqataqmi muyuyninpi sapakama punkukunapi kanankupaq,

kamachirqaqa Diospa runan Davidpa kamachisqanman hina ruranankupaqmi.

15 Sacerdotekunapas chaynataq Leviy casta runakunapas kasukurqakumá Rey Davidpa kamachisqanpi hina imam rurananmanta rurayta,

kasukurqakuqa qori-qollqe waqaychana cuartokunawan imam ruraymantam.

16 Tayta Diospa templon cimientachiy qallarisqanmantam Salomonqa tukuy imata rurachirqa qespichinankama,

chaynatamá qespichirqa Tayta Diospa templonta.

17 Salomonmi rirqa Ezion-geber llaqtamanwan Elat llaqtaman,

chay llaqtakunaqa karqa Edom nacionpi kaq Puka Lamar Qochapa patanpim.

18 Hiranmi lamar qocha allin reqsiq serviqninkunawan apachirqa buquekunata,

kacharqataqmi buquekunapi llamkaqkunatapas.

Paykunam Ofir lawta rirqaku Salomonpa serviqninkunapiwan hinaspam chaymanta apamurqaku Rey Salomonman yaqa chunka pichqayoq tonelada qorita.