7
Salomon chay mañakuyta tukuruptinñataqmi hanaq pachamanta wichiykamurqa nina hinaspam ruparurqa lliw kañanapaq animal wañuchisqanta,
ruparurqataqmi Diospaq wakin animalkuna wañuchisqantapas hinaptinmi Tayta Diospa kanchariynin temploman huntaykurqa.
2 Sacerdotekunam Tayta Diospa templonman mana yaykuyta atirqakuchu paypa kanchariynin chayman huntarusqanrayku.
3 Israelpa llapallan mirayninkunañataqmi nina wichiykamusqanta hinaspa Tayta Diospa kanchariynin temploman huntarusqanta qawaykuspanku qonqoranpa kumuykurqaku lozasqa pampakama,
Tayta Diostam adorarqaku kaynata:
Allin kasqanraykuyá
Tayta Diosman graciasta qosunchik.
Wiñaypaq kuyapayakuq kasqanraykuyá
Tayta Diosman graciasta qosunchik.
4 Chaymantam reywan Israel casta llapallan runakuna Tayta Diospaq animalkunata wañuchispa adorarqaku.
5 Rey Salomonmi Tayta Diospaq wañuchirqa iskay chunka iskayniyoq waranqa bueyeskunata hinaspa pachak iskay chunkan waranqa ovejakunata,
chay animalkunaqa karqa Dioswan allinlla kasqankumanta ofrendam.
Chaynatamá reywan llapallan runakuna Diospa templonta dedicarqaku.
6 Sacerdotekunapas imam ruranankutam rurarqaku,
chaypitaqmi kachkarqaku Leviy casta runakunapas Tayta Diospaq tocanantinkama,
chaykunataqa Rey Davidraqmi rurachirqa Tayta Diosman graciasta qonanpaq,
chay takiqa karqa:
“Payqa wiñaypaq kuyapayakuqmi” niq alabanapaq takim.
Sacerdotekunamá cornetillakunata tocarqaku Leviy casta runakunapa chimpanpi,
Israel casta llapallan runakunañataqmi sayachkarqaku.
7 Rey Salomonmi Tayta Diospa templonpa ñawpaqninpi kaq patiota Diosllapaqña sapaqcharqa,
chaypimá kañarqa lliw kañana ofrendakunatawan Dioswan allinlla kasqanmanta ofrenda animalkunapa wirankunatapas.
Chaynataqa rurarqa broncemanta rurachisqan altar taksalla kasqanraykum,
lliw kañana ofrendakunapaqpas,
kawsay ofrendakunapaqpas chaynataq wirankunapapas manamá hayparqachu.
8 Chay tiempopim Rey Salomon rurarqa hatun fiestata huñunasqa Israel llapallan runakunawan.
Paykunam hamurqaku Hamat llaqtaman yaykunanku qasamantaraq chaynataq Egipto sutiyoq chaki wayqomantaraq,
hamurqakuqariki qanchis punchaw fiestata ruranankupaqmi.
9 Pusaq kaq punchawpiñataqmi rurarqaku hatun huñunakuyta,
chaytaqa rurarqaku qanchis punchawnintinpuni altarta dedicasqankuraykum chaynataq huk qanchis punchawtawanraq hatun fiestata rurasqankuraykum.
10 Qanchis kaq killapa iskay chunka kimsayoq punchawninpim rey aviarurqa runakunata wasinkumanña ripukunankupaq.
Paykunaqa tukuy sonqonkuwanmi kusikurqaku Davidpaqpas,
Salomonpaqpas chaynataq Israel casta runakunapaqpas Tayta Dios allinkunata rurasqanrayku.
Salomonwan Dios contrato rurasqanmanta
11 Tayta Diospa templontapas,
kikinpa palaciontapas chaynataq tukuy ima ruray munasqantapas qespirachiptinmi,
12 payman Tayta Dios tuta rikuriykuspan nirqa:
—Uyariykuykim mañakuwasqaykita chaymi kay sitiota akllaykuni animalkuna wañuchina templopaq.
13 Chaynaqa sichu usyarachimusqayrayku mana paramuptinqa otaq aqarwaykunata kachaykamuptiy chakrapi tukuy kaqkunata mikuruptinqa otaq runaykunaman peste onqoykunata kachaykamuptiyqa
14 hinaptin alabawaqniy runaykuna humillakuspa ruegakuwaptinqa hinaspa tukuy mana allin kawsasqankumanta wanakuptinkuqa ñoqam uyarimusaq hanaq pachamanta hinaspam pampachasaq huchankuta,
allpankutapas hina ñoqataqmi allinyachisaq.
15 Kunanmantapunim kay sitiomanta mañakamuwasqankuta atencionwan uyarisaq.
16 Kunanmi akllakuspay ñoqallapaqña sapaqchani kay templota sutiy wiña-wiñaypaq reqsisqa kananpaq.
Tukuy tiempom kay templotaqa nanachikusaq.
17 Sichu taytayki David hina ñoqapa qayllaypi kawsaspa tukuy kamachisqayta ruraptikiqa chaynataq reglamentoykunatapas hinaspa decretoykunatapas kasukuptikiqa
18 taytayki Davidman nisqaypi hinam gobiernoykita takyachisaq.
Paymanmi nirqani:
“Mana tukuytam qampa miraynikikunamanta Israel nacionpi gobiernananpaq qari kanqa” nispa.
19 Ichaqa sichu qamkunapas ñoqata qepanchakuruspa qosqay decretokunatawan kamachisqaykunata mana kasukuspa huk dioskunataña qatispa adoraptikichikqa
20 ñoqam qarqorusqaykichik qosqay allpamanta.
Kay ñoqapaq sapaqchasqay templotapas chinkarachisaqmi hinaptinmi llapallan runakuna penqaspa burlakusunkichik.
21 —Kay suma-sumaq templotapas purmasqataña qawaykuspankum haykam pasaqkuna admirasqallaña tapukunqaku:
“¿Imanasqamá Tayta Diosqa kay naciontawan kay templotaqa kaynata rurarun?”
nispa.
22 Hinaptinmi uyariqkunañataq ninqaku:
“Abuelonkunapa yupaychasqan Tayta Diosta saqerusqankuraykum chaynaqa kachkanku.
Paymi Egipto nacionmanta horqomurqa ichaqa chay runakunaqa huk dioskunataña qatispam adorarqaku chaymi paykunamanqa diosninku tukuy kay mana allinkunata aparamun” nispa.