3 Rey muyuriykuspanmi Israel casta llapa huñunasqa runakuna sayachkaptin paykunapaq Diospa bendicionninta mañakurqa:

4 —Alabasqayá kachun Israelpa yupaychasqan Tayta Diosqa,

taytay Davidman prometesqantam payqa atiyninwan cumplirun.

Paymá kaynata nirqa:

5 “Runaykunata Egipto nacionmanta horqomusqaymantapunim mana akllarqanichu Israel ayllukunapa mayqan llaqtantapas chaypi sutiy reqsisqa kananpaq templota rurachinaypaq,

manataqmi huk runatachu akllarqani Israel casta runaykunapa jefenpaqpas.

6 Aswanqa Jerusalen llaqtatam akllarqani chaypi sutiy reqsisqa kananpaq,

Davidtañataqmi akllarqani Israel runaykunata gobiernananpaq” nispa.

7 Taytay Davidmi tukuy sonqonwan munarqa Israelpa yupaychasqan Tayta Diospaq huk templo rurayta.

8 Ichaqa Tayta Diosmi taytay Davidta nirqa:

“Tukuy sonqoykiwan huk templota rurapuway munasqaykiqa allinmi,

9 ichaqa manam qamchu chay templotaqa rurapuwanki,

qampa churikim chay templotaqa rurapuwanqa” nispa.

10 —Tayta Diosmi prometekusqanta cumplirqa.

Ñoqam taytay Davidpa rantinpi Israel nacionpi gobiernachkani Tayta Diospa nisqanpi hina,

Israelpa yupaychasqan Tayta Diospaqmi templota rurarachini.

11 Israelpa mirayninkunawan Tayta Diospa contrato baulnintapas chaymanmi churachirqani —nispa.

12 Tayta Diospa altarninpa ñawpaqninpi Rey Salomon sayaykuspanmi Israel casta llapallan huñunasqa runakunapa qayllanpi makinkunata hoqarirqa.

13 Salomonmi rurachirqaña broncemanta patakta,

chaypa largonmi karqa iskay metro cuarton,

hina chaynallam karqa anchonpas,

altonñataqmi karqa huk metro kimsa chunka pichqayoq centimetron,

chaytam churaykurqa patiopa chawpinman hinaspam hawanman seqaruspa qonqorakuykurqa huñunasqa Israel casta llapallan runakunapa qayllanpi.

Chaypimá makinkunata altoman hoqarispa nirqa:

14 —Israelpa yupaychasqan Tayta Dios,

qam hina Diosqa manam kanchu hanaq pachapipas nitaq kay pachapipas,

qamqariki tukuy sonqonwan kawsaq siervoykikunata favorecespa contratoyki cumpliqmi kanki.

15 Serviqniki taytay Davidman prometesqaykitam cumplirqanki,

kunan punchawkunapi pasasqanman hinamá rimasqaykitaqa imam rurasqaykiwan cumplirqanki.

16 Chaynaqa Israelpa yupaychasqan Tayta Dios,

kunanyá cumpliy serviqniki taytay Davidman prometesqaykita,

qanmi payta nirqanki:

“Ñoqapa ñawpaqniypiqa mana tukuytam qampa miraynikimanta Israel nacionpi gobiernaq qari kanqa,

ichaqa churikikunaqa munasqayman hinayá kawsachun,

yachachikuyniykunata cumplispa kawsasqaykiman hinayá paykunapas kawsachunku” nispa.

17 Israelpa yupaychasqan Tayta Dios,

kunanyá serviqniki taytay Davidman nisqaykiqa cumplikuchun.

18 —Ichaqa Taytáy ¿cheqaptachu qamqa runakunawan kay pachapi yachawaq?

Cielokunapipas nitaq cielokunapa hanayninpipas manam qamqa kamawaqchu,

chaynaqa ¿imaynataq kay templo rurasqaypiqa yachawaq?

19 Chaywanpas yupaychasqay Dios Taytalláy,

kay serviqnikipa mañakusqaytayá uyariykullaway,

ñawpaqnikipi qayakusqaytayá kunanpuni uyariykullaway.

20 Tuta punchawyá qaway kay templota,

kay sitiomantam nirqanki:

“Sutiymi chaypi reqsisqa kanqa” nispa,

chaynaqa kay sitioman qawarimuspayá uyariykullaway kay serviqnikipa mañakusqayta.

21 Kay serviqnikipas chaynataq Israel casta runaykikunapas kay sitio lawman qawarimuspa ruegakuptiykumá uyariykullawankiku.

Hanaq pacha yachasqaykimanta uyariykamuspamá pampachaykullawankiku.

22 —Sichu pipas runamasinpa contranpi huchallikuruptin chay runata kay templopi kaq altarnikipa ñawpaqninpi jurachiptinkuqa

23 qanmi hanaq pachamanta uyariykamunki hinaspam serviqnikikunata juzganki,

mana allin ruraqtapas castigaspaykim pagapunki mana allin rurasqanman hina,

mana huchayoqtam ichaqa mana huchayoqta hina chaskispayki allin rurasqanman hina pagapunki.

24 —Sichu Israel casta runaykikuna enemigonkunawan vencerachikunqaku qampa contraykipi huchallikurusqankurayku ichaqa qanman kasqallan kutirikamuspa qamta alabaspa hinaspa mañakuspa kay templo lawman qawamuspa ruegakusuptikiqa

25 qanmi hanaq pachamanta uyariykamunki,

Israel casta runaykikunapa huchantam pampachaykunki hinaspam kutichimunki paykunaman hinaspa abueloykuman qosqayki allpaman.

26 —Sichu qampa contraykipi paykuna huchallikurusqanrayku mana para kanmanchu ichaqa humillachisqaykirayku kay sitioman qawarimuspa sutikita alabaptinkuqa hinaspa huchankumanta wanakuptinkuqa

27 qanmi hanaq pachamanta uyarimunki hinaspam serviqniki Israel casta runaykikunapa huchankunata pampachaykunki,

munasqaykiman hina kawsanankupaq yachachispaykim parata kacharimunki runaykikunaman herencia qosqayki allpaman.

28 —Sichu nacionpi yarqaypas,

peste onqoypas karuptinqa otaq kawsaykunapas chakiptinqa otaq ismuptinqa otaq hatunpas taksapas aqarway urukuna karuptinqa otaq nacionniykutapas enemigo atacananpaq muyuruptinqa otaq huk rikchaq onqoykunapas karuptinqa

29 sonqonpi llakikuspa mayqen runapas otaq Israel casta runapas kay templo lawman makinkunata hoqarimuspa mañakuptinqa otaq ruegakuptinqa

30 hanaq pacha yachasqaykimantayá uyariykamuy,

paykunataqa pampachaykuspayá sapakamaman pagapuy kawsasqankuman hina hinaspa sonqonku reqsisqaykiman hina.

Qamllamriki llapa runakunapa sonqontaqa reqsinki.

31 Chaynapim paykunaqa respetasunki hinaspam kasusunki abueloykuman qosqayki allpapi kawsananku punchawkama.

32 —Forastero runakunapas,

mana Israel casta runaykikuna kachkaspam qamrayku karu llaqtakunamantaraq hamunqaku hatun sutikirayku hinaspa hatun atiywan castigaspa rurasqaykirayku.

Chaykunarayku hamuspa kay temployki lawman mañakamuptinkum

33 hanaq pacha yachasqaykimanta uyariykamunki,

chay forastero runapa mañakususqaykiman hinamá ruraykunki,

chayna kaptinqa kay pachapi llapallan runakunapas sutikitam reqsinqaku,

paykunapas Israel casta runaykikuna hina respetasuspaykim kay rurachisqay temploqa sutikiwan sutichasqa kasqanta yachanqaku.

34 —Sichu runaykikuna rinman guerraman enemigonkupa contranpi qampa kachasqayki ñanninta hinaspa qam Tayta Diosta mañakusunkiman akllasqayki kay llaqtaman qawarimuspanku otaq qampaq rurachisqay temploman qawarimuspanku

35 hinaptinqa qanmi hanaq pachamanta uyarimunki mañakususqaykita hinaspam vencechinki.

36 —Mana huchallikuq runaqa manam kanchu.

Sichu qampa contraykipi huchallikurusqankurayku piñakuruspa enemigonkuman qoykuwaq chaynapi karumanpas otaq hichpamanpas preso apasqa kanankupaq

37 hinaptinñataq chay preso kasqanku allpapi qanman kutirikamuspa ruegakamusunkiman kaynata:

“Huchallikurunikum,

mana allintam qampa contraykipi ruraruniku” nispa.

38 Sichu preso pusasqa kasqanku allpapi kachkaspa tukuy sonqonkuwan hinaspa tukuy vidankuwan qanman kutirikamunmanku,

sichu abueloykuman qosqayki allpa lawman otaq akllasqayki llaqta lawman otaq kay qampaq rurachisqay templo lawman qawarimuspa mañakamusuptikiqa

39 qanmi uyariykamunki hanaq pacha yachasqaykimanta.

Mañakamususqaykitamá favorninkupi ruraykunki,

pampachaykunkitaqmi contraykipi huchallikuq runaykikunatapas.

40 —Chaynaqa Dioslláy,

kay lugarpi mañakusqaykutayá uyariykullawayku hinaspa atiendeykullawayku.