5
Chaynatam Rey Salomon Tayta Diospa templonpaq obrakuna rurasqanta tukurachirqa hinaspam taytan Davidpa sapaqchasqan qori-qollqe llapa serviciokunata churarqa Tayta Diospa templonpi kaq tukuy ima waqaychana cuartokunaman.
Diospa baulninta temploman Salomon apachisqanmanta
2 Salomonmi Jerusalen llaqtapi huñurachirqa Israel casta autoridadkunata,
ayllukunapa kamachiqninkunata hinaspa Israel familiakunapi ancha reqsisqa runakunata.
Paykunataqa huñurachirqa “Davidpa Llaqtan” sutiyoq barriomanta Tayta Diospa contrato baulninta apamunankupaqmi,
chay barriopa huknin sutinmi karqa Sion.
3 Rey Salomonmi Israel casta llapallan runakunawan huñunakurqa watapa qanchis kaq killanpi,
paykunaqa huñunakurqa hatun fiestata ruranankupaqmi.
4 Israel castamanta llapallan ancianokuna hamuruptinmi Leviy castakuna baulta hoqarispa
5 aparqaku,
aparqakutaqmi Diosman asuykuna karpatapas,
karpapi Diosllapaqña sapaqchasqa llapallan serviciokunatapas,
chaykunataqa sacerdotekunawan Leviy casta runakunam aparqaku.
6 Rey Salomonmi Israel castamanta llapallan huñunasqa runakunawan asuykurqa baulpa ñawpaqninman hinaspam ovejakunatawan bueyeskunata Tayta Diospaq wañuchirqaku,
chaykunaqa karqa manaña yupay atinam.
7 Sacerdotekunam Tayta Diospa contrato baulninta churaykurqaku maypim kanan templopa ukun lawpi kaq “Chuyay-chuyay” sutiyoq cuartoman,
chay churananku sitioqa karqa querubin sutiyoq angelkunapa rapranpa ukunpim.
8 Querubinkunapa raprankuna baulpa hawanman kicharisqa kaptinmi chay querubinkunaqa taparqa baultawan chay baul hombronanku varillakunata.
9 Baulta hombronanku varillakunam allin largoyoq karqa chaymi hawa law cuartomanraq rikukurqa,
chay cuartoqariki “Chuya” sutiyoq cuartom ichaqa templopa hawa lawninmantaqa manam rikurqakuchu,
chaynam kachkan kay libro qellqasqa kasqan punchawkama.
10 Baulpa ukunpiqa karqa iskay labrasqa tabla rumikunallam,
chay tabla rumikunataqa Horeb Orqo lawpi kachkaptinkuraqmi Moises churarqa,
chay tabla rumikunapi qellqaspam Tayta Dios contratota rurarqa Israelpa mirayninkunawan Egipto nacionmanta lloqsimuchkaptinku.
11 Sacerdotekunam Diospa templonmanta lloqsiramurqaku,
chaypi kaq sacerdotekunaqa mayqan turnonku kaptinpas llapallankum chuyanchasqaña karqaku.
12 Llapallan takiq Leviy casta runakunamantañataqmi Asafwan Heman hinaspa Jedutun llapallan churinkunapiwan chaynataq wawqenkunapiwan fino linowan pachasqakama tocarqaku platillokunata,
taksapas-hatunpas arpakunata,
paykunaqa tocarqaku intipa qespimunan law altarpa waqtanpim,
pachak iskay chunkan sacerdotekunapas paykunawantaqmi tocarqa cornetillakunata.
13 Cornetillakunata tocaptinkum llapallanku takispa huk vozlla Tayta Diosta alabarqaku hinaspa graciasta qorqaku.
Cornetillakunata,
platillokunata hinaspa huk rikchaq tocanakunata tocaspankum hinaspa takispankum Tayta Diosta alabarqaku kaynata:
Allin kasqanraykuyá
Tayta Diosta alabaychik.
Wiñaypaq kuyapayakuq kasqanraykuyá
Tayta Diosta alabaychik.