Templopa llapa imankunamanta
4
Salomonmi altarta rurachirqa broncemanta isqon metro largoyoqta,
isqon metro anchoyoqta hinaspa tawa metro parten altoyoqta.
2 Fundichirqataqmi broncemanta hatun ruyru estanquetapas,
huknin patanmanta huknin patankamam karqa tawa metro parten,
sayayninñataqmi karqa iskay metro cuarton,
muyuriqninñataqmi karqa chunka kimsayoq metro parten cordel sayayniyoq.
3 Chay estanquepa uray law muyuriqninpiñataqmi karqa iskay seqe bueyeskuna,
chunka bueyeskunam karqa sapa tawa chunka pichqayoq centimetropi,
chaykunam fundisqa karqa estanquewan huk piezalla.
4 Chay estanquem tiyarqa broncemanta fundisqa chunka iskayniyoq bueyeskunapa hawanpi,
kimsa bueyeskunam qawarqa norte lawman,
kimsa bueyeskunañataq intipa siqaykunan lawman,
kimsa bueyeskunañataqmi qawarqa surlawman,
kimsa bueyeskunañataq intipa qespimunan lawman,
bueyeskunapa ankanmi uku lawpi karqa.
5 Chay estanquepa raktanmi karqa pusaq centimetro,
patanñataqmi amanqay wayta panchiqman rikchakurqa.
Chay estanquemanmi huntaq soqta chunka soqtayoq waranqa litro yaku.
6 Rurachirqataqmi chunka lavatoriokunatapas,
chaykunatam churarqa pichqata alleq lawninman,
wakin pichqatañataq ichoq lawninman,
chaypim mayllaqku kañanankupaq nakasqanku animalkunatawan nakanapaq kaqkunata,
estanquem ichaqa karqa sacerdotekunapa mayllakunanpaq.
7 Rurachirqataqmi Diospa kamachisqanman hina qorimanta chunka candelerokunatapas,
chaykunatam churarqa temploman,
pichqatam churarqa alleq lawninman wakin pichqatañataq ichoq lawninman.
8 Rurachirqataqmi chunka mesakunatapas,
chaykunatam churachirqa temploman,
pichqatam churachirqa alleq lawninman wakin pichqatañataq ichoq lawninman,
rurachirqataqmi qorimanta tazonkunatapas.
9 Sacerdotekunapaqpas rurachirqam huk patiota,
rurachirqataqmi hawapi huk hatun patiotapas punkuyoqtakama,
chaypa punkunkunatam qaracharqa broncewan.
10 Estanquetam churachirqa templopa alleq lawninman otaq intipa qespimunan surlawman.
11 Rurachirqataqmi mankakunatapas,
palakunatapas chaynataq tazonkunatapas.
Hiranmi tukuy chay obrakunata Salomonpa kamachisqanman hina tukururqa Diospa templonpaq.
12 Paymá fundirqa iskaynin pilarkunata,
pilarkunapa puntanpi pelota kaqlla iskay adornokunata,
chay pelota kaqlla adorno tapaq iskaynin mallakunata.
13 Chay iskaynin mallakunapaqpas rurachirqataqmi tawa pachak granadakunata,
iskay seqe granadakunam karqa sapa mallapaq,
chay mallakunaqa karqa pilarkunapa puntanpi kaq pelota kaqlla adornokunata tapananpaqmi.
14 Fundirqataqmi chunka carretakunatapas,
carretakunapi churasqa chunka lavatoriokunatapas,
15 estanquetapas,
estanquepa tiyanan bueyeskunatapas,
16 mankakunatapas,
palakunatapas chaynataq tazonkunatapas.
Hiranmi Rey Salomonpaq tukuy chaykunata rurarqa llipipipiq broncemanta,
chaykunatam rurarqa Tayta Diospa templonpaq.
17 Chaykunataqa reymi Jordan Mayupa patanpi fundichirqa llinka mitu allpapa kasqanpi,
chay sitioqa kachkan Sucot llaqtamanta Saretan llaqtaman rinapim.
18 Salomonmi broncemanta llapa ima rurachisqanta manaña pesarqachu nana-nanaq hinaspa manaña pesay atina kasqanrayku.
19 Salomonqa rurachirqataqmi Diospa templonpi kaq tukuy imakunatapas,
chaykunam karqa qorimanta altarwan qorimanta mesakuna,
chay mesakunaqa karqa Diospa tantankuna churanapaqmi.
20 Rurachirqataqmi qori-puromanta candelerokunatapas mecherontintakama,
chaykunatam churachirqa “Chuya” sutiyoq cuartopi chaynapi Diospa kamachisqanpi hina ratachisqa kananpaq.
21-22 Qori-puromantam rurachirqa waytakunatapas,
mecherokunatapas,
tenazakunatapas,
mecha kaptanapaq tijeraskunatapas,
tazonkunatapas,
wisllakunatapas chaynataq incienso qontichina kaqkunatapas.
Qorimantataqmi rurachirqa “Chuyay-chuyay” sutiyoq cuartopa chaynataq “Chuya” sutiyoq cuartopa punkunkunatapas hinaspa templopa hawa law punkunkunatapas.