Templota Salomon rurachisqanmanta
3
Salomonmi Tayta Diospa templon rurachiyta qallaykurqa Jerusalen llaqtapi kaq Moriah sutiyoq moqopi,
chay sitiopim Tayta Dios rikuriykurqa taytan Davidman,
chay sitiotam David alistarqa Tayta Diospa templon rurachinanpaq,
chay sitioqa karqa Jebus casta Ornan sutiyoq runapa eranmi.
2 Tawa watamanña Rey Salomon gobiernachkaspanmi chay templo ruraytaqa qallarichirqa iskay kaq killapa iskay kaq punchawninpi.
3 Kaynatam Salomon cimientachirqa Diospa templonta:
Templopa largonmi karqa iskay chunka qanchisniyoq metro,
anchonñataqmi karqa isqon metro.
4 Templopa corredorninpa largonñataqmi karqa isqon metro templopa anchonwan igual,
altonpas karqa isqon metrotaqmi,
chay corredorpa ukuntam qaracharqa qori-purowan.
5 Hatunnin cuartopa perqantañataqmi tableachirqa cipres tablakunawan hinaspam qaracharqa qori-purowan,
chaypa hawanpiñataqmi tallachirqa palmerakunatawan cadenakunata.
6 Templotam adornachirqa alhaja rumikunawan,
chaypi servikuq qoriqa karqa Parvaim lawmanta kaqmi.
7 Qoriwanmi qaracharqa templopa ukunta:
vigankunata,
punkunpa marconkunata,
perqankunata hinaspa punkunkunata.
Perqankunapipas tallachirqataqmi querubin sutiyoq angelkunata.
8 Rurachirqataqmi “Chuyay-chuyay” sutiyoq cuartotapas,
chaytaqa rurachirqa templopa anchon hina isqon metro largoyoqtam,
hina isqon metrollataqmi karqa chay cuartopa anchonpas,
chay cuartotam qaracharqa qori-purowan,
chay qorim karqa yaqa iskay chunka tonelada.
9 Sapa clavopa llasayninmi karqa parte kilo tumpa masnin,
qoriwanmi qaracharqa altosninpi cuartokunatapas.
10 Rurachirqataqmi “Chuyay-chuyay” sutiyoq cuartopi kananpaq querubin sutiyoq iskay angelkunatapas,
kullumanta tallarachispanmi qaracharqa qoriwan.
11 Iskaynin querubinkunapa rapranpa largonmi karqa isqon metro.
Huknin rapranpa largonmi iskay metro cuarton chaymi hayparqa templopa perqankama,
huknin rapranpa largonpas iskay metro cuarton kaspanmi tupanakurqa huknin querubinpa rapranwan.
12 Hina iskay metro cuartontaqmi karqa huknin querubinpa rapranpas chaymi hayparqa templopa perqankama,
chaynataqmi huknin rapranpa largonpas karqa iskay metro cuartontaq chaymi tupanakurqa huknin querubinpa rapranwan.
13 Chay querubinkunapa kicharayaq rapranmi karqa isqon metro,
chaykunam sayaspa qawarqaku hatun cuarto lawman.
14 Telatapas rurarqataqmi morado qaytumanta,
grosella qaytumanta,
guindo qaytumanta hinaspa fino linomanta,
chay telapa hawanpim rurachirqa kuruyoq querubin sutiyoq angelkunata.
Iskay pilarkuna rurachisqanmanta
15 Templopa ñawpaqninpim Salomon rurachirqa iskay pilarkunata yaqa chunka soqtayoq metro altoyoqtakama,
chaykunapa puntanpim karqa iskay metro cuarton sayayniyoq adornokuna.
16 “Chuyay-chuyay” sutiyoq cuartopipas rurachirqataqmi cadenakunata,
chaykunatam churarqa pilarpa adornonkunapa hawanman.
Rurachirqataqmi pachak granadakunatapas hinaspam chaykunata churarqa cadenakunapa hawanman.
17 Chay pilarkunatam churarqa templopa punkunman,
huknintam churarqa chay punkupa alleqnin lawman huknintañataq ichoqnin lawman,
alleqnin lawpi kaqtam suticharqa “Jaquin” nispa,
ichoqnin lawpi kaqtañataqmi suticharqa “Boaz” nispa.