Templota Salomon rurachisqanmanta
6
Israelpa mirayninkuna Egipto nacionmanta lloqsimusqanku tawa pachak pusaq chunkan wataña pasaruptinmi otaq Israel nacionpi Salomon tawa watamanña gobiernachkaspanmi Ziv sutiyoq iskay kaq killapi Tayta Diospa templon rurayta qallarichirqa.
2 Tayta Diospaq Rey Salomonpa templo rurachisqanpa largonmi karqa iskay chunka qanchisniyoq metro,
anchonñataqmi karqa isqon metro,
sayayninñataqmi karqa chunka kimsayoq metro parten.
3 Templopa corredorninpa largonñataqmi karqa isqon metro templopa anchonwan igual,
chay corredorpa anchonqa karqa tawa metro partenmi.
4 Templopipas rurachirqataqmi rejillayoq ventanakunata.
5 Rurachirqataqmi temploman hapichisqa muyuriqninpi cuartokunatapas,
chay cuartokunaqa hapichisqa karqa “chuya” sutiyoq cuartopa hinaspa “chuyay-chuyay” sutiyoq cuartopa muyuriqninmanmi.
6 Sapa cuartopa anchonmi karqa iskay metro cuarton,
altospi sapa cuartopa anchonñataqmi karqa iskay metro qanchis chunkan centimetro,
chay altospa altosninpi sapa cuartopa anchonñataqmi karqa kimsa metro chunka pichqan centimetro.
Chayna rurasqaqa karqa templopa hawa lawninpi perqakunata menosyarachimusqankuraykum chaynapi qerukunata ustuchinankupaq wasipa perqanta manaña uchkunankupaq.
7 Templota ruranankupaq rumikuna apamusqankum karqa labrasqakamaña chaymi templota ruraspankuqa manaña uyarirqakuchu martillopa,
cincelpa nitaq fierromanta herramientakunapa chalanyasqanta.
8 Templopa waqtankunapi cuartokunaman yaykunapaq punkum karqa templopa alleq lawninpi,
chayninta yaykuspam gradasninta seqaqku punta kaq altospi cuartokunaman chaynataq iskay kaq altospi cuartokunamanpas.
9 Templota Salomon qespirachispanmi cedromanta qerukunawan hinaspa cedromanta tablakunawan qatachirqa.
10 Templopa muyuriqninpipas cuartokunatam rurachirqa iskay metro cuarton sayayniyoqtakama,
chay cuartokunam temploman hapichisqa karqa cedromanta vigakunawan.
11 Tayta Diosmi Salomonta nirqa:
12 —Kay templotam rurachipuwachkanki,
sichu decretoykunata,
reglamentoykunata hinaspa kamachisqaykunata kasukuspa kawsaptikiqa taytayki Davidman qanmanta prometesqaykunatam cumplisaq
13 hinaspaymi Israelpa mirayninkunawan yachasaq,
Israel casta runaykunataqa manam saqesaqchu —nispa.
14 Chaynapimá Salomonqa templo rurayta tukurachirqa.
15 Templopa uku perqankunatam tableachirqa pampanmanta techonkama cedro tablakunawan,
pampantañataqmi tableachirqa cipres tablakunawan.
16 Templopa uku lawninpi “Chuyay-chuyay” sutiyoq cuartotapas cedro tablakunawanmi tableachirqa pampanmanta techonkama,
chay cuartopa largonmi karqa isqon metro.
17 “Chuyay-chuyay” sutiyoq cuartopa ñawpaqninpim karqa huk hatun cuarto.
Chay cuartopa largonmi karqa chunka pusaqniyoq metro.
18 Templopa ukunmi cedro tablakunawan tableasqa karqa,
chay tablakunapim tallarqaku purun calabazaman rikchakuq adornokunata,
tallarqakutaqmi umpariq waytaman rikchakuq adornokunatapas,
lliwmi karqa cedromanta.
Chaypiqa manam ima rumipas rikurirqachu.
19 Salomonmi templopa uku lawninpi “Chuyay-chuyay” sutiyoq cuartota alistachirqa chaypi Tayta Diospa contrato rurasqan baulta churananpaq.
20 Chay “Chuyay-chuyay” sutiyoq cuartopa largonmi karqa isqon metro,
chayna sayayniyoqllataqmi karqa,
anchonpas chaynataq sayayninpas.
Chay cuartotam qaracharqa qori-purowan.
Chay cuartopa ñawpaqninpi kananpaqmi rurachirqataq cedro tablamanta altartapas,
chaytam qoriwan qaracharqa.
21 Salomonmá templopa ukunta qori-purowan qaracharqa,
chay qori-purowan qarachasqa “Chuyay-chuyay” sutiyoq cuartopa punkuntam harkachirqa qorimanta cadenawan.
22 Chaynaqa lliw templotamá qori-purowan qaracharqa uraymanta hanaykama,
qaracharqataqmi “Chuyay-chuyay” sutiyoq cuartopa ñawpaqninpi kaq altartapas.
23 Aceitunas sacha kullumantataqmi rurachirqa querubin sutiyoq iskay angelkunatapas.
Chaykunataqa rurachirqa “Chuyay-chuyay” sutiyoq cuartopi kananpaqmi.
Sapa querubinpa sayayninmi karqa tawa metro parten.
24 Querubinpa huknin rapranpa largonmi karqa iskay metro cuarton,
hina chay sayayllam karqa huknin rapran- pas.
Querubinpa huknin rapranpa puntanmantam huknin rapranpa puntankama karqa tawa metro parten.
25 Iskaynin querubinkunam huk sayayniyoqlla karqaku,
sapakamapa rapranmi karqa tawa metro parten largoyoq.
Iskayninkum huk formayoqlla karqaku.
26 Sapa querubinpa sayayninpas tawa metro partentaqmi karqa.
27 Chay querubinkunatam churarqa templopa ukunpi kaq “Chuyay-chuyay” sutiyoq cuartoman,
querubinkunapa mastarisqa rapranpa puntankunam tuparqa kaylaw-waklaw perqaman.
Iskaynin querubinpa raprankunapa puntanmi tupanakurqa chay cuartopa chawpinpi.
28 Chay querubinkunatapas Salomonmi qoriwan qaracharqa.
29 Perqakunapi kaq tablakunapipas tallachirqataqmi tukuy rikchaq dibujokunata,
querubin sutiyoq angelkunata,
palmerakunata hinaspa umpariq waytakunata,
chaynatamá rurachirqa “Chuyay-chuyay” sutiyoq cuartopipas chaynataq “Chuya” sutiyoq cuartopipas.
30 Templopa pampantapas qoriwanmi qaracharqa,
chaynatamá rurachirqa “Chuyay-chuyay” sutiyoq cuartopipas chaynataq “Chuya” sutiyoq cuartopipas.
31 Chay “Chuyay-chuyay” sutiyoq cuartoman yaykunapaqmi rurachirqa aceitunas sacha tablakunamanta punkukunata,
chay punkukunapa chakankunam sayaqninkunawan karqa pichqa waqtayoq.
32 Iskay punkukunam karqa aceitunas sacha tablakunamanta,
chay tablakunapim tallachirqa querubin sutiyoq angelkunata,
palmerakunata hinaspa umpariq waytakunata,
tukuy chaykunatapas qoriwanmi qaracharqa.
Qoriwanmá qaracharqa querubinkunatawan palmerakunatapas.
33 “Chuya” sutiyoq cuartoman yaykuna punkupaqpas rurachirqam sayaqninta aceitunas sacha tablamanta,
chay sayaqninqa karqa tawa waqtayoqmi.
34 Chay iskaynin punkukunaqa karqa cipres tablamantam,
sapa punkupa iskay hojankunam karqa doblakuq.
35 Chay punkukunapim tallachirqa querubinkunata,
palmerakunata hinaspa umpariq waytakunata,
chay tallachisqankunataqa qoriwanmi qaracharqa.
36 Templopa uku lawninpi patiotapas rurachirqam labrasqa rumikunamanta,
sapa kimsa seqe rumikunapa hawanpim churachirqa huk seqe labrasqa vigakunata,
chay vigakunaqa karqa cedro sachamantam.
37 Tawa watamanña Salomon gobiernachkaptinmi Ziv sutiyoq killapi Tayta Diospa templonpa cimienton churayta qallarirqaku.
38 Chunka hukniyoq watamanña Salomon gobiernachkaptinmi Bul sutiyoq pusaq kaq killapi templota qespirachirqaku,
qespirachirqakuqa llapa imantintam planonman hina.
Qanchis watapimá chay templotaqa qespirachirqaku.