3 —Yachasqaykipi hinam taytay Davidqa yupaychasqayku Tayta Diospaq templota mana rurarqachu,

payqariki guerrapim karqa muyuriqninpi enemigonkunata Tayta Dios vencechinankama.

4 Kunanqa yupaychasqay Tayta Diosmi tukuy hinastinpi hawkayaytaña qoykuwan,

manañam enemigoykunapas kanchu nitaq ima mana allinpas.

5 Chaymi tantearuni yupaychasqay Tayta Diospa templon ruranaypaq,

taytay Davidmanmi Tayta Dios nirqa:

“Qampa rantikipi gobiernananpaq churasqay churikim templota rurapuwanqa ñoqapaq” nispa.

6 Kunanqa kamachiyá Libano montekunamanta cedrokunata kuchupamuwanankupaq.

Serviqnikikunatam ñoqapa serviqniykuna yanapanqa,

ñoqaqa mañakusqaykitam pagasqayki,

yachasqaykipi hinapas manam pipas kanchu Sidon llaqtayoq runakuna hina qeruta allin kuchuqkunaqa —nispa.

7 Rey Hiranmi Salomonpa nichimusqanta uyariruspan sinchita kusikurqa hinaspam nirqa:

—Tayta Diosyá kunan alabasqa kachun chay hatun nacionpi gobiernananpaq Davidman yachaysapa churin qoykusqanmanta —nispa.

8 Hiranmi Salomonman kacharqa kaynata nichimunanpaq:

—Uyariykunim lliw nichimuwasqaykita,

munasqaykiman hinam rurasaq chay cedromanta qerukunawanqa chaynataq cipresmanta qerukunawanpas.

9 Serviqniykunam Libano montemanta lamar qochakama aparunqaku,

chaymantañataqmi lamar qochanta balsakunapi aparachimusaq munasqayki sitiokama hinaptinmi qamña chaypi paskachispayki aparachinki.

Kay rurasqaymantam imam munasqayta ruranki,

palacioypi kaqkunapaqmi mikuykunata apachimunki —nispa.

10 Haykam munasqantamá Salomonman Rey Hiram qoykurqa cedromanta hinaspa cipresmanta qerukunata.

11 Salomonñataqmi Rey Hirampa palacionpi kaqkuna mikunanpaq qorqa tawa waranqa tawa pachaknin tonelada trigota chaynataq tawa waranqa tawa pachaknin litro aceitetapas,

chaynatamá Salomon sapa wata qorqa Rey Hiranman.

12 Tayta Diosmá prometesqanman hina Salomonman yachayta qorqa.

Rey Hirampas Salomonwan contratota ruraspam hawkayaypi kawsarqaku.

13 Rey Salomonpa decretasqanman hinam lliw Israel nacionpi hapirurqaku kimsa chunka waranqa qarikunata chaynapi debaldella llamkanankupaq.

14 Paykunamantam chunka waranqa runakunata kacharqa Libano Orqoman chaypi huk killanka llamkamunankupaq hinaspa iskay killañataq wasinkupi kanankupaq.

Debaldella llamkaqkunapa jefenmi karqa Adoniram.

15 Chaymantapas Salomonpaqa karqam qanchis chunka waranqa carga apaq runankuna,

kapurqataqmi orqopi rumikunata labrapuqnin pusaq chunka waranqa runakunapas.

16 Akllarqataqmi llamkapuqnin runakunapa kimsa waranqa kimsa pachaknin capatazninkunatapas,

paykunamá llapallan llamkaqkunata kamachirqa.

17 Reymi kamachirqa hatun sumaq akllasqa rumikunata horqomuspa templopa cimientonpaq labranankupaq.

18 Salomonpaq hinaspa Rey Hirampaq llamkaqkunam Gebal llaqtayoq llamkaqkunapiwan templota ruranankupaq alistaramurqaku qerukunatawan rumikunata.