Salomonpa imaynam gobiernasqanmanta
4
Rey Salomonmá gobiernarqa enteron Israel nacionpi.
2 Gobiernonpi paypa churasqan kamachikuqkunam kaykuna:
Sacerdotem karqa Sadocpa churin Azarias.
3 Secretariokunam karqa Elihoref sutiyoq runawan Ahias,
paykunaqa karqa Sisapa churinkunam.
Reypa rurasqankunamanta qellqaq runam karqa Ahiludpa churin Josafat.
4 Llapallan tropa kamachiqmi karqa Joiadapa churin Benaia.
Sacerdotekunañataqmi karqa Sadocwan Abiatar.
5 Prefectokunapa jefenmi karqa Natanpa churin Azarias.
Reypa consejaqninmi karqa Natanpa churin sacerdote Zabud.
6 Palaciopi mayordomom karqa Ahisar.
Debaldella llamkaqkunapa jefenmi karqa Abdapa churin Adoniram.
7 Enteron Israel nacionpim Salomon churarqa chunka iskayniyoq prefectokunata.
Paykunam sapakama watapi huk killanka mantieneqku reytawan wasinpi kaqkunata.
8 Chay prefectokunapa sutinmi kaykuna:
Efrain orqokunapim prefecto karqa Ben-Hur sutiyoq runa.
9 Macaz llaqtapa,
Saalbim llaqtapa,
Bet-semes llaqtapa,
Elon llaqtapa hinaspa Bet-hanan llaqtapa prefectonñataqmi karqa Ben-Dacar sutiyoq runa.
10 Arubot llaqtapa,
Soco llaqtapa hinaspa enteron Hefer lawkunapa prefectonñataqmi karqa Ben-Hesed sutiyoq runa.
11 Enteron Dor lawpa prefectonñataqmi karqa Ben-Abinadab sutiyoq runa.
Chay prefectopa warminmi karqa Rey Salomonpa churin Tafat.
12 Taanac llaqtapa hinaspa Meguido llaqtapa prefectonñataqmi karqa Ahiludpa churin Baana.
Paymi gobiernarqa Jezreel llaqtapa uraynin Saretan llaqtapa hichpanpi kaq Bet-sean llaqtamanta qallarispan Abel-mehola llaqtakama hinaspa Jocmeam llaqtapa waklawninkama.
13 Galaad law Ramot llaqtapa prefectonñataqmi karqa Ben-Geber sutiyoq runa.
Paytaqmi cuentallikurqa Manasespa miraynin Jairpa llaqtankunamantapas.
Chay llaqtakunaqa karqa Galaad lawpim.
Cuentallikurqataqmi Basan lawpi kaq Argob sutiyoq lawpi kaq soqta chunka murallasqa llaqtakunamantapas.
Chay llaqtakunapa punkunkunam karqa broncemanta cerrojoyoq.
14 Mahanaim llaqtapa prefectonñataqmi karqa Idopa churin Ahinadab.
15 Neftaliy lawpa prefectonñataqmi karqa Ahimaas sutiyoq runa,
paymi casarakururqa Salomonpa churin Basematwan.
16 Aser lawpa hinaspa Alot lawpa prefectonñataqmi karqa Husaipa churin Baana.
17 Isacar lawpa prefectonñataqmi karqa Paruapa churin Josafat.
18 Benjamin lawpa prefectonñataqmi karqa Elapa churin Simei.
19 Galaad lawpa prefectonñataqmi karqa Uri sutiyoq runapa churin Geber,
chay Galaad lawqa karqa Amor casta runakunapa reynin Sehonpa nacionninwan Basan law Rey Ogpa nacionninmi.
Karqataqmi enteron nacionpaq huk prefectopas.
Salomonpa gobiernon hatunyasqanmanta
20 Juda castamantawan Israel castamanta kaqkunam karqaku lamar qochapa patanpi aqo hina nana-nanaq runakuna,
mikunankupas,
tomanankupas mana pisisqanmi kusisqallaña kawsarqaku.
21 Salomonmi munaychakurqa llapallan nacionkunapi,
payqa munaychakurqa Eufrates Mayumanta Filistea nacionkamam chaynataq Egipto nacionpa linderonkamam.
Impuestokunata Salomonman pagaspankum paytaña wañunankama servirqaku.
22 Salomonpa sapa punchaw mikunanpaqmi karqa:
soqta waranqa soqta pachaknin kilo suysusqa harina,
chunka kimsayoq waranqa iskay pachaknin kilo mana suysusqa harina,
23 kawsaykunawan wirayachisqa chunka torokuna,
pastowan wirayachisqa iskay chunka torokuna hinaspa pachak ovejakuna,
karqataqmi luwichukunapas,
tarukakunapas chaynataq wallpakunapas.
24 Eufrates Mayu intipa seqaykunan law nacionkunapim Rey Salomon munaychakurqa Tifsa llaqtamanta Gaza llaqtakama.
Munaychakurqataqmi Eufrates Mayu intipa seqaykunan law nacionkunapa reyninkunapipas,
chaynapim muyuriqninpi kaq nacionkunawan hawkayaypi yacharqa.
25 Salomonpa gobiernasqan watakunapim Dan llaqtamanta Beerseba llaqtakama Juda castamantawan Israel castamanta kaqkuna sapakama confianzawan yacharqaku uvas huertakunapi chaynataq higos huertakunapipas.
26 Chaykunamantapas Salomonpaqa kapurqataqmi caballonkunapaq tawa chunka waranqa cuartochakuna,
chay caballokunam carretakunata aysaq,
kapurqataqmi chunka iskayniyoq waranqa sillakuqkunapas.
27 Prefectokunam Rey Salomontawan mesanpi mikuqkunata sapakama mantieneqku watapi huk killanka,
manam imamantapas faltachiqkuchu.
28 Tupasqanman hinam caballokunapaqwan carreta aysaq uywakunapaq cebatawan pajata maymi kasqanman apachimuqku.
29 Diosmi Salomonman qorqa yachaytawan entendimientota.
Lamar qochapa patanpi aqo hinam karqa paypa yachayninqa.
30 Intipa qespimunan lawpi yachayniyoqkunamantapas chaynataq Egipto nacionpi llapallan yachayniyoqkunamantapas aswan yachayniyoqraqmi Salomonqa karqa.
31 Llapallan runakunamantapas aswan yachayniyoqmá payqa karqa.
Zera casta Etanmantapas chaynataq Maholpa kimsa churinkunamantapas aswan yachayniyoqmi payqa karqa.
Maholpa churinkunam karqa Heman,
Calcol hinaspa Darda.
Yachayniyoq kasqanmantam muyuriqninpi llapallan nacionkuna Salomonta allinta reqsirqaku.
32 Yachachirqam kimsa waranqa rikchanachiykunatawan waranqa pichqan takikunata.
33 Yachachirqataqmi sachakunamantapas,
yachachirqaqa Libano monte cedro sachamanta qallaykuspanmi raqrakunapi wiñaq hisopo plantapi tukunankama,
yachachirqataqmi animalkunamantapas,
pawaq animalkunamantapas,
qasqonpa puriq animalkunamantapas chaynataq challwakunamantapas.
34 Tukuy hinastinpi kaq reykunam Salomonpa yachayninmanta uyariruspanku runankunata kachamurqaku paypa nisqanta uyarinankupaq.