Rey Hiranwan Salomon contrato rurasqanmanta
2
Rey Salomonmi piensarqa Tayta Diospaq templo rurayta,
piensarurqataqmi gobiernananpaq palacio ruraytapas.
2 Chaypaqmi Salomon akllaykurqa imapas apaq qanchis chunka waranqa runakunata hinaspa rumita labramuq pusaq chunka waranqa runakunata,
akllarqataqmi llamkaqkunapa kimsa waranqa soqta pachaknin capatazninkunatapas.
3 Tiro llaqtapa reynin Hiranman Salomon kachaspanmi nichimurqa:
Ñoqawanyá ruray taytay Davidwan imam rurasqaykita,
paymanmi apachimurqanki cedrokunata yachanan palaciota rurakunanpaq.
4 Ñoqam rurasaq yupaychasqay Tayta Diospaq templota paypa qayllanpi miski asnaq inciensota kañanaypaq,
chaypim sapa kutilla churasaq patanasqa Diospa tantantapas.
Chaypitaqmi sapa tempranon hinaspa sapa tarden animalkunatapas wañuchispay lliwta kañapusaq,
chaynallatam rurasaq samana punchawkunapipas,
mosoq killakunapipas chaynataq yupaychasqayku Tayta Diospa fiestankunapipas.
Chaykunaqa wiña-wiñaypaqmi rurasqa kanan Israel nacionpi.
5 Templo rurasqayqa kanqa hatunsum,
chaynaqa kanqa Diosniykuqa llapallan dioskunamantapas hatu-hatunsu kasqanraykum.
6 Aswanqa ¿pitaq atinman paypaq templo rurapuyta?
¡Cielokunapipas nitaq cielokunapa hanayninpipas manam payqa kamanmanchu!
¿Pitaq ñoqaqa kani templonta rurapunaypaq chaynapi paypa qayllanpi inciensollataña kañanaypaqpas?
7 Kachamuwayá imakunapas tallay yachaq runata chaynapi qorimanta,
qollqemanta,
broncemanta,
fierromanta,
puka qaytumanta,
grosella qaytumanta hinaspa azul qaytumanta rurananpaq.
Paymi llamkanqa Juda lawpi yachaq maestrokunawan hinaspa Jerusalen llaqtapi maestrokunawan,
paykunatam taytay David contratarqa.
8 Libano montemantayá apachimuway cedro qerukunata,
cipres qerukunata hinaspa sandalo sutiyoq qerukunata.
Ñoqaqa yachanim serviqnikikuna Libano montepi chay qerukuna kuchuy yachasqankuta,
chaynaqa serviqniykunam qampa serviqnikikunata yanapanqaku.
9 Achka qerukunatayá huñumuchunku,
templo rurasqayqa kanqa suma-sumaq hatun templom.
10 Qeru kuchumuq hinaspa labraq serviqnikikunapaqmi qosaq tawa waranqa tawa pachaknin tonelada kutasqa trigota,
tawa waranqa tawa pachaknin tonelada cebadata,
tawa pachak tawa chunkan waranqa litro vinota hinaspa hina chayna aceiteta.
11 Hinaptinmi Tiro llaqtapa reynin Hiram cartarqa Salomonman kaynata:
Tayta Diosmi kuyarqa runankunata hinaspam churasurqanki paykunapa reynin kanaykipaq.
12 Kay pachapas chaynataq cielokunapas unanchaq Israelpa yupaychasqan Tayta Diosqa alabasqayá kachun.
Paymi Rey Davidman qoykurqa yachaysapa allin piensaq churita.
Chaymi qam ruranki Tayta Diospa templontawan gobiernanaykipaq palaciota.
13 Ñoqam kachamuyki yuyaysapa allin yachayniyoq Hiram-abi sutiyoq maestrota.
14 Payqa Dan ayllumanta kaq warmipa wawanmi hinaspa Tiro llaqtayoq runapa churinmi.
Payqa yachanmi qorimanta,
qollqemanta,
broncemanta,
fierromanta,
rumimanta hinaspa tablamanta tukuy ima rurayta,
yachantaqmi grosella qaytumanta,
morado qaytumanta,
lino qaytumanta hinaspa puka qaytumanta tukuy ima ruraytapas.
Yachantaqmi tukuy ima tallaytapas hinaspa llapa dibujokuna ruraytapas.
Paymi llamkanqa maestroykikunawan hinaspa taytayki Davidpa contratasqan maestrokunawan.
15 Chaynaqa kunanyá kay serviqnikikunaman apachimuwayku trigotawan cebadata chaynataq aceitetawan vino prometewasqaykitapas.
16 Hinaptinqa necesitasqayki qerukunatam kuchumusaqku Libano montemanta hinaspam Jope llaqtakama balsakunapi lamar qochanta aparamuptiyku chaymanta apachinki Jerusalen llaqtaman.
17 Salomonmi yupachirqa Israel nacionpi llapallan forastero runakunata,
payqa yupachirqa taytan Davidpa yupachisqanmanta qepatañam,
yuparachiptinmi karqa pachak pichqa chunkan kimsayoq waranqa soqta pachaknin runakuna.
18 Paykunamantam akllarqa imapas apaq qanchis chunka waranqa runakunata,
akllarqataqmi rumita orqopi labramuq pusaq chunka waranqa runakunatapas chaynataq llamkaqkunapa kimsa waranqa soqta pachaknin capatazninkunatapas.