Salomonpa huk wasikuna rurachisqanmanta
7
Salomonmi kikinpa palacionta rurachispan chunka kimsayoq watapi qespirachirqa.
2 Rurachirqataqmi “aLibano Monte” sutiyoq palaciotapas.
Chay palaciopa largonmi karqa tawa chunka pichqayoq metro,
anchonñataqmi karqa iskay chunka iskayniyoq metro parten,
sayayninñataqmi karqa chunka kimsayoq metro parten.
Chay palaciopa pilarninkunam karqa cedro qerumanta,
chay pilarkunaqa tawa seqem sayarqa.
Chay tawa seqe pilarkunapa hawanpiñataqmi karqa cedromanta vigakuna.
3 Chay vigakunaqa karqa tawa chunka pichqayoqmi,
kimsaman rakisqa kaptinmi sapa seqepi karqa chunka pichqayoq vigakuna pilarkunapa takyachisqan.
Chay vigakunapa hawanmanmi qatarqaku cedro tablakunawan.
4 Karqataqmi kimsa seqe ventanakunapas,
chay ventanakunaqa karqa kimsa-kimsapura qawanakuqmi.
5 Llapallan punkukunapas chaynataq ventanakunapas karqa cuadradokamam,
chay punkukunawan chay ventanakunaqa kimsa-kimsapuram qawanakurqaku.
6 Rurachirqataqmi pilarsapallaña hatun cuartotapas iskay chunka iskayniyoq metro parten largoyoqta hinaspa chunka kimsayoq metro parten anchoyoqta.
Chay salapa ñawpaqninpipas karqataqmi pilarsapa huk corredor,
chayqa karqa tablamanta alayoqmi.
7 Rurachirqataqmi reypa tiyanan otaq reypa juzganan cuartotapas,
chay cuartoqa cedro tablakunawan tableasqam karqa pampanmanta techonkama.
8 Salomonpa yachasqan palaciopa qepa lawninpim karqa huk patio,
karqataqmi huk cuartopas reypa juzganan cuartowan igualla.
Casarasqan warminpaqpas rurachirqataqmi huk palaciota,
chay palaciopim karqa huk cuarto reypa juzganan cuartowan igualla.
Salomonpa warminqa karqa Faraonpa churinmi.
9 Lliw chay obra rurasqankum karqa ancha-ancha valorniyoq rumikunawan rurasqa.
Hawanpas-ukunpas sierrakunawan kuchusqa kasqanraykum rumikunaqa karqa medidanman hina labrasqa,
cimientonmanta qallarispam perqapa tukuyninkama karqa chaynalla,
chaynallam karqa wasipa uyanmanta hatun patiokamapas.
10 Cimientonmi karqa ancha-ancha valorniyoq hatun rumikunawan rurasqa.
Wakin rumikunam karqa tawa metro parten sayayniyoq,
wakinñataqmi karqa kimsa metro soqta chunkan centimetro sayayniyoq.
11 Perqankunapas karqa ancha-ancha precioyoq rumikunawan hinaspa qerukunawan rurasqam,
chay rumikunaqa karqa medidanman hina labrasqam.
12 Hatun patiopa muyuriqninpiñataqmi karqa kimsa seqe labrasqa rumikuna,
chaypa hawanmanñataqmi yaykurqa huk seqe cedromanta vigakuna,
chaynallam karqa qespinankama,
hina chaynallataqmi karqa Tayta Diospa templonpa uku law pationpas chaynataq templopa corredorninpas.
Hiram sutiyoq runata Salomon contratasqanmanta
13 Rey Salomonmi Tiro llaqtamanta qayachimurqa Hiram sutiyoq runata.
14 Payqa karqa Neftaliy ayllu viudapa wawanmi,
taytanpas Tiro llaqtamanta kaspanmi sumaqllataña yachaq broncemanta imapas rurayta.
Hiramqa allin yuyayniyoq,
entiendeq hinaspa yachaypa huntasqan kasqanraykum broncemanta tukuy imata ruraq.
Rey Salomonpa kasqanman rispanmi llapa obrakuna kamachisqanta rurarqa.
15 Broncemanta iskay pilarkunatam rurarqa,
chay sapa pilarkunapa sayayninmi karqa pusaq metro,
sapakamapa muyuriqninñataqmi karqa pichqa metro parten cordelpa kamaqnin.
16 Rurarqataqmi pilarkunapa puntanpi churananpaq broncemanta fundisqa adornokunatapas.
Sapa pilarpa adornonpa sayayninmi karqa iskay metro cuarton.
17 Chay sapakama adornokunatam muyurirqa broncemanta simpasqa mallakuna hinaspa cadena cordonkuna,
tukuy chaykunaqa karqa pilarkunapa puntanman churanankupaqmi,
sapa pilarpaqmá karqa qanchis adornokuna.
18 Chay mallapa muyuriqninpipas rurarqataqmi iskay seqe granadakunata chaynapi sapa pilarkunapa puntanpi kaq adornokunata granadawan tapananpaq.
19 Corredorpa pilarninkunapa puntanmi karqa amankay wayta hina adornoyoq,
chay adornokunapa sayayninmi karqa yaqa iskay metro.
20 Sapa pilarpa puntanpi kaq adornopa muyuriqninpim karqa iskay pachak granadakuna,
chaykunaqa karqa iskay seqepim pelota hina ruyru adornopa hawanpi,
chay ruyru adornoqa tupanakurqa mallawanmi.
21 Chay pilarkunatam sayarachirqa templopa hawa law corredorninpi,
alleq lawpi pilartam suticharqaku “bJaquin” nispa,
ichoq lawpi kaqtañataqmi suticharqaku “cBoaz” nispa.
22 Pilarkunapa puntanmá amankay wayta hina rurasqa karqa,
chaynatamá pilarkuna rurayta tukururqa.
Templopa llapa imankunamanta
23 Fundirqataqmi broncemanta hatun ruyru estanquetapas.
Huknin patanmanta huklawnin patankamam karqa tawa metro parten,
sayayninñataqmi karqa iskay metro cuarton,
muyuriqninñataqmi karqa chunka kimsayoq metro parten cordel sayaqniyoq.
24 Chay estanquepa patanpa muyuriqninpa urayninmi karqa purun calabaza hina broncemanta ruyrukunawan adornasqa.
Iskay seqepim chayna adornasqa karqa,
sapa tawa chunka pichqayoq centimetropim karqa calabazaman rikchakuq chunka adornokuna,
chay calabazachakunaqa fundisqa karqa estanquewan kuskam.
25 Chay estanquem tiyarqa broncemanta fundisqa chunka iskayniyoq bueyeskunapa hawanpi,
kimsa bueyeskunam qawarqa norte lawman,
kimsa bueyeskunañataq intipa seqaykunan lawman,
kimsa bueyeskunañataqmi qawarqa surlawman,
kimsa bueyeskunañataq intipa qespimunan lawman,
bueyeskunapa ankanmi uku lawpi karqa.
26 Chay estanquepa raktanmi karqa pusaq centimetro,
patanñataqmi amankay wayta panchiqman rikchakurqa.
Chay estanquemanmi huntaq tawa chunka tawayoq waranqa litro yaku.
27 Rurarqataqmi broncemanta chunka carretakunatapas,
sapakama carretapa largonmi karqa huk metro pusaq chunkan centimetro,
anchonñataqmi karqa huk metro pusaq chunkan centimetro,
sayayninñataqmi karqa huk metro kimsa chunkan pichqayoq centimetro.
28 Chay carretakunam kayna rurasqa karqa:
waqtankunapi sapa tablerom marcoyoq karqa.
29 Chay marcoyoq tablerokunapim dibujasqa karqa leonkuna,
bueyeskuna hinaspa querubin sutiyoq angelkuna,
dibujasqataqmi karqa marcokunapa hawanpipas.
Leonkunapa hinaspa bueyeskunapa hawanpi ukunpipas dibujasqataqmi karqa warkusqa wayta hina adornokuna.
30 Sapa carretapim karqa broncemanta tawa ruedakuna,
ruedata hapiqkunapas karqa broncemantataqmi.
Sapakamapa tawan esquinankunapiñataqmi fundisqa karqa chakinkuna lavatoriokunata hapinanpaq,
sapa chakin lawpim dibujasqa karqa warkusqa wayta hina adornokuna.
31 Chay lavatoriopa tiyananmi uku lawninmanta siminkama karqa tawa chunka pichqayoq centimetro,
chay siminqa karqa ruyru toqom,
chay toqota takyachiqñataqmi karqa soqta chunka pusaqniyoq centimetro altoyoq,
chay siminpipas karqam dibujokuna,
chay marcoyoq tablerokunaqa karqa cuadradom,
manam ruyruchu.
32 Tawa ruedakunam karqa marcoyoq tablerokunapa urayninpi,
ruedakunapa hapiqninkunam karqa carretakunawan huklla,
sapa ruedapa sayayninqa karqa soqta chunka pusaqniyoq centimetrom.
33 Ruedakunam rikchakurqa guerra carretakunapa ruedanman,
ruedapa hapiqninkunaqa,
aronkunaqa,
rayonkunaqa chaynataq tamborninkunaqa karqa fundisqakamam.
34 Tawa esquinakunapi tawa tiyanakunapas sapakamam karqa carretawan chulla piezalla.
35 Carretapa hawanpi ruyruñataqmi karqa iskay chunka iskayniyoq centimetro parten altoyoq,
carretapa hawanpim karqa tiyanakuna hinaspa tablerokuna,
chaykunaqa karqa chulla piezallam.
36 Chay Hiram sutiyoq runam tablerokunapipas,
marcokunapipas chaynataq sapa vacio sitiopa kasqanpipas tallarqataq querubinkunata,
leonkunata hinaspa palmerakunata,
muyuriqninkunapipas tallarqataqmi warkusqa wayta hina adornokunata.
37 Chaynatamá rurarqa fundisqa chunka igualkamalla carretakunataqa,
chaykunataqa rurarqa chayna sayayniyoqllatam hinaspa hina chayna rikchakuqllatam.
38 Rurarqataqmi broncemanta chunka hatun lavatoriokunatapas,
chay lavatoriokunamanmi yaykuq pusaq pachak pusaq chunkan litro yaku,
sapa lavatoriom karqa huk metro pusaq chunkan centimetro anchoyoq,
chay sapa lavatoriotam churarqa sapakamata chunkantin carretakunaman.
39 Wasipa alleq lawninmanmi churachirqa pichqa carretakunata,
wakin pichqatañataq wasipa ichoq lawninman,
estanquetañataqmi churachirqa templopa surlawnin intipa qespimunan lawman.
40 Rurarqataqmi mankakunatapas,
palakunatapas chaynataq tazonkunatapas.
Hiranmi tukuy chay obrakunata Rey Salomonpa kamachisqanman hina lliwta tukururqa Tayta Diospa templonpaq.
41 Paymi fundirqa iskaynin pilarkunata,
pilarkunapa puntanpi pelota kaqlla iskay adornokunata,
chay pelota kaqlla adorno tapaq iskaynin mallakunata.
42 Chay iskaynin mallakunapaqpas rurachirqataqmi tawa pachak granadakunata,
iskay seqe granadakunam karqa sapa mallapaq,
chay mallakunaqa karqa pilarkunapa puntanpi kaq pelota kaqlla adornokunata tapananpaqmi.
43 Fundirqataqmi chunka carretakunatapas,
carretakunapi churasqa chunka lavatoriokunatapas,
44 estanquetapas,
estanquepa tiyanan bueyeskunatapas,
45 mankakunatapas,
palakunatapas chaynataq tazonkunatapas.
Hiranmi Rey Salomonpaq tukuy chaykunata rurarqa llipipipiq broncemanta,
chaykunatam rurarqa Tayta Diospa templonpaq.
46 Chaykunataqa reymi Jordan Mayupa patanpi fundichirqa llinka mitu allpapa kasqanpi,
chay sitioqa kachkan Sucot llaqtamanta Saretan llaqtaman rinapim.
47 Salomonmi broncemanta llapa ima rurachisqanta manaña pesarqachu nana-nanaq hinaspa manaña pesay atina kasqanrayku.
48 Salomonqa rurachirqataqmi Tayta Diospa templonpi kaq tukuy imakunatapas,
chaykunam karqa qorimanta altarwan,
qorimanta mesa,
chay mesaqa karqa Diospa tantankuna churanapaqmi.
49 Rurachirqataqmi qori-puromanta candelerokunatapas,
chaykunatam churachirqa “Chuya” sutiyoq cuartopi,
pichqatam churachirqa alleq lawninman,
wakin pichqatañataq ichoq lawninman.
Rurachirqataqmi candelerokunapa waytankunatapas,
mecheronkunatapas,
qorimanta tenazakunatapas,
50 qorimanta medianokunatapas,
mecha kaptanapaq tijeraskunatapas,
tazonkunatapas,
wisllakunatapas chaynataq incienso qontichina kaqkunatapas.
Qorimantataqmi rurachirqa “Chuyay-chuyay” sutiyoq cuartopa chaynataq “Chuya” sutiyoq cuartopa punkunkunatapas.
51 Chaynatam Rey Salomon Tayta Diospa templonpaq obrakuna rurasqanta tukurachirqa hinaspam taytan Davidpa sapaqchasqan qori-qollqe llapa serviciokunata churarqa Tayta Diospa templonpi kaq tukuy ima waqaychana cuartokunaman.