Diospa baulninta temploman Salomon apachisqanmanta
8
Salomonmi Jerusalen llaqtapi huñurachirqa Israel casta autoridadkunata,
ayllukunapa kamachiqninkunata hinaspa Israel familiakunapi ancha reqsisqa runakunata.
Paykunataqa huñurachirqa “Davidpa Llaqtan” sutiyoq barriomanta Tayta Diospa contrato baulninta apamunankupaqmi,
chay barriopa huknin sutinmi karqa Sion.
2 Rey Salomonmi Israel casta llapallan runakunawan huñunakurqa Etanim sutiyoq killapi otaq watapa qanchis kaq killanpi,
paykunaqa huñunakurqa hatun fiestata ruranankupaqmi.
3 Israel castamanta llapallan ancianokuna hamuruptinmi sacerdotekuna baulta hoqarispa
4 aparqaku,
aparqakutaqmi Diosman asuykuna karpatapas,
karpapi Diosllapaqña sapaqchasqa llapallan serviciokunatapas,
chaykunataqa sacerdotekunawan Leviy casta runakunam aparqaku.
5 Rey Salomonmi Israel castamanta llapallan huñunasqa runakunawan asuykurqa baulpa ñawpaqninman hinaspam ovejakunatawan bueyeskunata Tayta Diospaq wañuchirqaku,
chaykunaqa karqa manaña yupay atinam.
6 Sacerdotekunam Tayta Diospa contrato baulninta churaykurqaku maypim kanan templopa ukun lawpi kaq “Chuyay-chuyay” sutiyoq cuartoman,
chay churananku sitioqa karqa querubin sutiyoq angelkunapa rapranpa ukunpim.
7 Querubinkunapa raprankuna baulpa hawanman kicharisqa kaptinmi chay querubinkunaqa taparqa baultawan chay baul hombronanku varillakunata.
8 Baulta hombronanku varillakunam allin largoyoq karqa chaymi hawa law cuartomantaraq rikukurqa,
chay cuartoqariki karqa “Chuya” sutiyoq cuartom,
ichaqa templopa hawa lawninmantaqa manam rikurqakuchu,
chaynam kachkan kay libro qellqasqa kasqan punchawkama.
9 Baulpa ukunpiqa karqa iskay labrasqa tabla rumikunallam,
chay tabla rumikunataqa Horeb Orqo lawpi kachkaptinkuraqmi Moises churarqa,
chay tabla rumikunapi qellqaspam Tayta Dios contratota rurarqa Israelpa mirayninkunawan Egipto nacionmanta lloqsimuchkaptinku.
10 Sacerdotekuna santuariomanta lloqsimuptinkum Tayta Diospa templonta puyu huntarurqa.
11 Chay puyu otaq Tayta Diospa kanchariynin temploman huntarusqanraykumá sacerdotekuna mana atirqakuchu santuariopi imam rurananku rurayta.
Templota Salomon dedicasqanmanta
12 Salomonmi nirqa:
Dios Taytalláy,
qanmi nirqanki:
“Tutayay puyu ukupim yachasaq” nispa.
13 Ichaqa rurachipurqaykim suma-sumaq templota
chaypi wiñaypaq yachanaykipaq.
14 Rey muyuriykuspanmi Israel casta llapa huñunasqa runakuna sayachkaptin paykunapaq Diospa bendicionninta mañakurqa:
15 —Alabasqayá kachun Israelpa yupaychasqan Tayta Diosqa,
taytay Davidman prometesqantam payqa atiyninwan cumplirun.
Paymá kaynata nirqa:
16 “Israel runaykunata Egipto nacionmanta horqomusqaymantapunim mana akllarqanichu Israel ayllukunapa mayqen llaqtantapas chaypi sutiy reqsisqa kananpaq templota rurachinaypaq,
Israel runaykunata gobiernananpaqqa Davidtam akllarqani” nispa.
17 Taytay Davidmi tukuy sonqonwan munarqa Israelpa yupaychasqan Tayta Diospaq huk templo rurayta.
18 Ichaqa Tayta Diosmi taytay Davidta nirqa:
“Tukuy sonqoykiwan huk templo rurapuway munasqaykiqa allinmi
19 ichaqa manam qamchu chay templotaqa rurapuwanki,
qampa churikim chay templotaqa rurapuwanqa” nispa.
20 —Tayta Diosmi prometekusqanta cumplirqa.
Ñoqam taytay Davidpa rantinpi Israel nacionpi gobiernachkani Tayta Diospa nisqanpi hina,
Israelpa yupaychasqan Tayta Diospaqmi templota rurarachini.
21 Baulpaqpas sitiotam alistaruni,
chay baulpim kachkan Egipto nacionmanta horqomuspa abuelonchikkunawan Tayta Diospa rurasqan contrato —nispa.
22 Tayta Diospa altarninpa ñawpaqninpi Rey Salomon sayaykuspanmi Israel casta llapallan huñunasqa runakunapa qayllanpi altoman makinkunata hoqarispa
23 nirqa:
—Israelpa yupaychasqan Tayta Dios,
qam hina Diosqa manam kanchu hanaq pachapipas nitaq kay pachapipas,
qamqariki tukuy sonqonwan kawsaq serviqnikikunata favorecespa contratoyki cumpliqmi kanki.
24 Serviqniki taytay Davidman prometesqaykitam cumplirqanki,
kunan punchawkunapi pasasqanman hinamá rimasqaykitaqa imam rurasqaykiwan cumplirqanki.
25 Chaynaqa Israelpa yupaychasqan Tayta Dios,
kunanyá cumpliy serviqniki taytay Davidman prometesqaykita,
qanmi payta nirqanki:
“Ñoqapa ñawpaqniypiqa mana tukuytam qampa miraynikimanta Israel nacionpi gobiernaq qari kanqa ichaqa churikikunaqa munasqayman hinayá kawsachun,
qampa kawsasqaykiman hinayá paykunapas kawsachunku” nispa.
26 Israelpa yupaychasqan Tayta Dios,
kunanyá serviqniki taytay Davidman nisqaykiqa cumplikuchun.
27 —Ichaqa Taytáy ¿cheqaptachu qamqa kay pachapi yachawaq?
Cielokunapipas nitaq cielokunapa hanayninpipas manam qamqa kamawaqchu,
chaynaqa ¿imaynataq kay templo rurasqaypiqa yachawaq?
28 Chaywanpas yupaychasqay Dios Taytalláy,
kay serviqnikipa mañakusqaytayá uyariykullaway,
ñawpaqnikipi qayakusqaytayá kunanpuni uyariykullaway.
29 Tuta punchawyá qaway kay templota,
kay sitiomantam nirqanki:
“Sutiymi chaypi reqsisqa kanqa” nispa,
chaynaqa uyariykullawayá kay sitioman qawarispa kay serviqnikipa mañakusqayta.
30 Kay serviqnikipas chaynataq Israel casta runaykikunapas kay sitio lawman qawarimuspa ruegakuptiykumá uyariykullawankiku.
Hanaq pacha yachasqaykimanta uyariykamuspamá pampachaykullawankiku.
31 —Sichu pipas runamasinpa contranpi huchallikuruptin chay runata kay templopi kaq altarnikipa ñawpaqninpi jurachiptinkuqa
32 qanmi hanaq pachamanta uyariykamunki hinaspam serviqnikikunata juzganki,
mana allin ruraqtapas castigaspaykim pagapunki mana allin rurasqanman hina,
mana huchayoqtam ichaqa mana huchayoqta hina chaskispayki allin rurasqanman hina pagapunki.
33 —Sichu Israel casta runaykikuna enemigonkunawan vencerachikunqaku qampa contraykipi huchallikurusqankurayku ichaqa qanman kasqallan kutirikamuspa qamta alabaspa hinaspa mañakuspa kay templo lawman qawamuspa ruegakusuptikiqa
34 qanmi hanaq pachamanta uyariykamunki,
Israel casta runaykikunapa huchantam pampachaykunki hinaspam kutichimunki abueloykuman qosqayki allpaman.
35 —Sichu qampa contraykipi paykuna huchallikurusqanrayku mana para kanmanchu ichaqa humillachisqaykirayku kay sitioman qawarimuspa sutikita alabaptinkuqa hinaspa huchankumanta wanakuptinkuqa
36 qanmi hanaq pachamanta uyarimunki hinaspam serviqniki Israel casta runaykikunapa huchankunata pampachaykunki,
munasqaykiman hina kawsanankupaq yachachispaykim parata kacharimunki runaykikunaman herencia qosqayki allpaman.
37 —Sichu nacionpi yarqaypas,
peste onqoypas karuptinqa otaq kawsaykunapas chakiptinqa otaq ismuptinqa otaq hatunpas-taksapas aqarway urukuna karuptinqa otaq nacionniykutapas enemigo atacananpaq muyuruptinqa otaq huk rikchaq onqoykunapas karuptinqa
38 sonqonpi llakikuspa mayqen runapas otaq Israel casta llapallan runapas kay templo lawman makinkunata hoqarimuspa mañakuptinqa otaq ruegakuptinqa
39 hanaq pacha yachasqaykimantayá uyariykamuy,
paykunataqa pampachaykuspayá sapakamaman pagapuy kawsasqankuman hina hinaspa sonqonku reqsisqaykiman hina.
Qamllamiki llapa runakunapa sonqontaqa reqsinki.
40 Chaynapim paykunaqa respetasunki abueloykuman qosqayki allpapi kawsananku punchawkama.
41 —Forastero runakunapas mana Israel casta runaykikuna kachkaspam qamrayku karu llaqtakunamantaraq hamunqaku.
42 Uyarinqakum hatun sutikimanta,
atiynikimanta chaynataq hatun castigoykimantapas.
Chaynaqa kay temploykiman qawarispa mañakamuptinkum
43 hanaq pacha yachasqaykimanta uyariykamunki,
chay forastero runapa mañakususqaykiman hinamá ruraykunki,
chayna kaptinqa kay pachapi llapallan runakunapas sutikitam reqsinqaku,
paykunapas Israel casta runaykikuna hina respetasuspaykim kay rurachisqay temploqa sutikiwan sutichasqa kasqanta yachanqaku.
44 —Sichu runaykikuna rinman guerraman enemigonpa contranpi qampa kachasqayki ñanninta hinaspa qam Tayta Diosta mañakusunkiman akllasqayki kay llaqtaman qawarimuspanku otaq qampaq rurachisqay temploman qawarimuspanku
45 hinaptinqa qanmi hanaq pachamanta uyarimunki mañakususqaykita hinaspam vencechinki.
46 Mana huchallikuq runaqa manam kanchu.
Sichu qampa contraykipi huchallikurusqankurayku piñakuruspa enemigonkunaman entregaykuwaq chaynapi karumanpas otaq hichpamanpas preso apasqa kanankupaq
47 hinaptinñataq chay preso kasqanku allpapi qanman kutirikamuspa ruegakamusunkiman kaynata:
“Huchallikurunikum,
mana allintam qampa contraykipi ruraruniku” nispa.
48 Sichu preso pusasqa kasqanku enemigonkupa allpanpi kachkaspa tukuy sonqonkuwan hinaspa tukuy vidankuwan qanman kutirikamunmanku abueloykuman qosqayki allpa lawman otaq akllasqayki llaqta lawman otaq kay qampaq rurachisqay templo lawman qawarimuspa mañakamusuptikiqa
49 qanmi uyariykamunki hanaq pacha yachasqaykimanta.
Mañakamususqaykitamá favorninkupi ruraykunki.
50 Contraykipi huchallikuruq runaykikunatamá pampachaykunki,
pampachaykuytaqyá mana kasususqaykikunatapas.
Preso apaqnin runakunawanyá kuyapayariykachiy.
51 Chaynataqa ruraykuy runaykikunaqa herenciayki hina kasqanraykuyá.
Fierro fundina hornomanta horqochkaq hinam paykunataqa Egipto nacionmanta horqomurqanki.
52 —Kay serviqnikipapas chaynataq Israel casta runaykikunapapas mañakamusqaykutayá uyariykuwayku.
53 Señor Diosllayku,
abueloykuta Egipto nacionmanta horqomuspa serviqniki Moiseswan nichisqaykiman hinam paykunataqa kay pachapi llapa nacionkunamanta herenciaykipaq akllakurqanki —nispa.
54 Tayta Diospa altarninpa ñawpaqninpi cieloman brazonkunata hoqarispa qonqoranpa mañakusqantam Salomon tukururqa.
55 Sayariruspanmi Israel casta llapallan runakunapaq Diospa bendicionninta hatun vozpi mañakurqa:
56 —Lliw prometesqanpi hina Israel casta runankunaman hawkayay qoq Tayta Diosyá alabasqa kachun.
Payqariki mana faltaytam cumplirun serviqnin Moiseswan llapa ima allin kaqkuna prometechisqanta.
57 —Yupaychasqanchik Tayta Diosyá ñoqanchikwan kachun imaynam ñawpaq abuelonchikkunawan kasqanpi hina,
amayá payqa wischuruwasunchu nitaq saqeruwasunchu.
58 Sonqonchikpas paypaqñayá kachun chaynapi tukuy munasqanman hina kawsananchikpaq chaynataq kamachisqankunata,
decretonkunata hinaspa reglamentonkunata kasukunanchikpaq,
chaykunatamá abuelonchikkunaman kamachirqa.
59 Yupaychasqanchik Tayta Diosta mañakusqaykunayá paypa qayllanpi tuta punchaw kachun,
chaynapi kay serviqninpaqpas chaynataq Israel casta runakunapaqpas sapa punchaw necesitasqaykuman hina allinta arreglananpaq.
60 Chayna kaptinqa kay pachapi llapallan runakunapas Tayta Diosqa sapallan Dios kasqantam yachanqaku.
61 Chaynaqa kunan punchawpi hinayá tukuy sonqoykichikqa kachun yupaychasqanchik Tayta Diospaq chaynapi decretonkunata cumplispa kamachisqankunata kasukunaykichikpaq —nispa.
62 Chaymantam reywan Israel casta llapallan runakuna animalkunata wañuchispa Tayta Diosta adorarqaku.
63 Rey Salomonmi Tayta Diospaq wañuchirqa iskay chunka iskayniyoq waranqa bueyeskunata hinaspa pachak iskay chunkan waranqa ovejakunata.
Chay animalkunaqa karqa Dioswan allinlla kasqankumanta ofrendam.
Chaynatamá reywan Israelpa llapallan mirayninkuna Diospa templonta dedicarqaku.
64 Reyqa hina chay punchawllapitaqmi Tayta Diospa templonpa ñawpaqninpi kaq pationtapas Diosllapaqña sapaqcharqa,
chaypim kañarqa lliw kañana ofrendakunata hinaspa kawsay ofrendakunata,
kañarqataqmi allinlla kasqankumanta ofrenda animalkunapa wirankunatapas.
Chaynataqa rurarqa Tayta Diospa templonpa qayllanpi kaq broncemanta altar taksalla kasqanraykum,
lliw kañana ofrendakunapaqpas,
kawsay ofrendakunapaqpas chaynataq Dioswan allinlla kasqankumanta ofrenda animalkunapa wirankunapaqpas manamá hayparqachu.
65 Chay tiempopim Rey Salomon rurarqa hatun fiestata huñunasqa Israel llapallan runakunawan.
Paykunam hamurqaku Hamat llaqtaman yaykunanku qasamantaraq chaynataq Egipto sutiyoq chaki wayqomantaraq,
hamurqakuqariki yupaychasqanku Tayta Diospa qayllanpi qanchis punchaw fiestata hatun kusikuywan ruranankupaqmi.
Chaymantapas qanchis punchawtawanraqmi chay fiestataqa rurarqaku,
fiestaqa karqa chunka tawayoq punchawmá.
66 Fiesta tukuypa paqarinnintintam runakunata rey aviarurqa hinaptinmi runakunaqa reyta agradecekuspanku sonqonkupi kusisqallaña ripukurqaku sapakama wasinkuman.
Paykunaqa kusikurqaku serviqnin Davidpaqpas chaynataq Israel casta runankunapaqpas Tayta Dios tukuy allinkuna rurasqanraykum.