—Uyariykuykim mañakuwasqaykita,

kay templo rurasqaykitam ñoqallapaqña sapaqcharuni chaypi sutiyta wiñaypaq reqsichinaypaq,

sapa punchawmi nanachikuspay waqaychasaq.

4 Sichu taytayki David hina ñoqapa qayllaypi kawsaspa tukuy sonqoykiwan mana pantaspa tukuy kamachisqayta ruraptikiqa chaynataq reglamentoykunatapas hinaspa decretoykunatapas kasukuptikiqa

5 taytayki Davidman nisqaypi hinam Israel nacionpi gobiernoykita wiñaypaq takyachisaq.

Paymanmi nirqani:

“Mana tukuytam qampa miraynikikunamanta Israel nacionpi gobiernaq qari kanqa” nispa.

6 Ichaqa sichu qamkunapas otaq miraynikichikpas ñoqata qepanchakuruspa qosqay kamachikuyniykunata hinaspa decretoykunata mana kasukuspa huk dioskunataña qatispa adoraptikichikqa

7 ñoqam Israel nacionta qarqosaq qosqay allpamanta.

Kay ñoqapaq sapaqchasqay templotapas chinkarachisaqmi hinaptinmi Israel casta runakunataqa wakin runakunapas penqaspa burlakunqaku.

8 Kay suma-sumaq templotapas purmasqataña qawaykuspankum haykam pasaqkuna admirasqallaña burlakuspa ninqaku:

“¿Imanasqamá Tayta Diosqa kay naciontawan kay templotaqa kaynata rurarun?”

nispa.

9 Hinaptinmi uyariqkunañataq ninqaku:

“Yupaychasqanku Tayta Diosta saqerusqankuraykum chaynaqa kachkanku.

Paymi Egipto nacionmanta paykunapa abuelonkunata horqomurqa ichaqa chay runakunaqa huk dioskunataña qatispam adorarqaku chaymi paykunamanqa Tayta Dios tukuy kay mana allinkunata aparamun” nispa.

10 Rey Salomonmi Tayta Diospa templontawan kikinpa palacionta rurachirqa iskay chunka watapi,

11 chaykunapaqmi Tiro llaqtapa reynin Hiram apachimurqa cedro qerukunata,

cipres qerukunata chaynataq Salomonpa munasqanman hina qoritapas chaymi Hiranman Rey Salomon qoykurqa Galilea lawpi iskay chunka llaqtakunata.

12 Hinaptinmi Tiro llaqtapa reynin Hiram rirqa Salomonpa qosqan llaqtakuna qawamuq ichaqa manam gustarqachu.

13 Chaymi Salomonta nirqa:

—Wawqelláy ¿imamá kay qowasqayki llaqtakunaqa?

—nispa.

Chayraykum suticharqa ^aCabulwan,

chay allpaqa chayna sutichasqamá karqa kay libro qellqasqa kasqan punchawkama.

14 Rey Hiramqariki Salomonmanmi apachirqaña kimsa waranqa isqon pachak soqta chunkan kilo qorita.

15 Rey Salomonmi Tayta Diospa templonta,

kikinpa palacionta,

palacio takyachiq perqakunata,

Jerusalen llaqtapa murallankunata,

Hazor llaqtata,

Meguido llaqtata hinaspa Gezer llaqtata ruranankupaq runakunata debaldella llamkachirqa.

16 Ñawpaqtaraqmi Egipto nacionpa reynin Faraon hamuspa Gezer llaqtata vencerurqa,

chay llaqtapi yachaq Canaan casta runakunata wañurachispanmi chay Gezer llaqtataqa kañaykurqa,

chay llaqtataqa churinmanmi regalaykurqa Salomonwan casarakusqanrayku.

17 Chayraykum chay Gezer llaqtataqa mosoqmanta Salomon hatarichirqa,

hatarichirqataqmi urayninpi kaq Bet-horon llaqtatapas,

18 Baalat llaqtatapas chaynataq chunniqpi kaq Tadmor sutiyoq llaqtatapas.

Chay llaqtakunaqa karqa Rey Salomonpa allpanpim.

19 Mosoqmantataqmi hatarichirqa kawsay waqaychanan llaqtakunatapas,

carretakunapa kanan llaqtakunatapas chaynataq caballokunapa kanan llaqtakunatapas.

Rurachirqataqmi Jerusalen llaqtapi,

Libano Orqokunapi hinaspa enteron gobiernasqan allpapi llapa ima ruray munasqantapas.

20 Puchuqraq Amor casta runakunaqa,

Het casta runakunaqa,

Ferez casta runakunaqa,

Hiv casta runakunaqa chaynataq Jebus casta runakunaqa manam Israelpa mirayninkunachu karqa.

21 Paykunapa mirayninkunatamá otaq Israelpa mirayninkunapa mana chinkachiy atisqankutamá debaldella Salomon llamkachirqa kay libro qellqasqa kasqan tiempokama.

22 Ichaqa Israelpa mirayninkunamantaqa manam pitapas debaldellaqa llamkachirqachu paykunaqa karqaku soldadonkunam,

reypa yanapaqninkunam,

capitankunam,

carretankunapi kaq soldadokunapa jefenkunam hinaspa sillakuqkunapa jefenkunam.

23 Rey Salomonpa rurachisqankunapi llamkaqkunata kamachiqkunam karqa pichqa pachak pichqa chunkan capatazkuna.

24 “Davidpa Llaqtan” sutiyoq barriomanta Salomonpa rurachisqan palacionman Faraonpa warmi churin riruptinmi Salomon rurachirqa palacio takyachiq perqakunata.

25 Salomonmi watapi kimsa kutita Tayta Diosman ofreceq lliw kañana ofrendakunata,

ofreceqtaqmi Dioswan allinlla kasqankumanta ofrendakunatapas.

Chaykunataqa ofrecerqa rurachisqan altarpim,

kañarqataqmi inciensotapas.

Chaynatamá templotaqa qespirachirqa.

26 Rey Salomonqa rurachirqataqmi buquekunatapas Puka Lamar Qochapa patanpi kaq Ezion-geber sutiyoq llaqtapi.

Chay llaqtaqa kachkan Edom sutiyoq allpa Elat llaqtapa hichpanpim.

27 Rey Hiranmi buquekunapi llamkaqkunata kacharqa Salomonpa runankunatawan kuskata,

Hirampa runankunaqa karqa lamar qochapi buque allin manejaqkunam.

28 Paykunamá rirqaku Ofir allpaman hinaspam Rey Salomonpaq apamurqaku yaqa chunka tawayoq waranqa kilo qorita.